ROMANOS 12
12
Kuxul smajtan Dios ya skꞌan xꞌanotik
1Jich yuꞌun, kermanotak, ya kalbeyex ta skuenta slekil yoꞌtan Dios, jich me ya skꞌan ya awakꞌ abaik ta stojol Dios tutꞌil kuxul smajtan Dios te lek ya yilex te Diose. Jich ya skꞌan ya kakꞌ jbatik ta stojol te batsꞌi ya jchꞌuuntike. 2Ma me jichuk ya xkuxuyinex jich tutꞌil te machꞌatik kuxajtik te ora to. Jaꞌ lek akꞌa me ta jelontesel te tut ya anopike, yuꞌun jich me ya xjelon te tutꞌ kuxulexe. Jich me ya anaꞌbeyik sluwar te tut ya skꞌan yoꞌtan te Diose, jaꞌ bi, jaꞌ te tut lek ta pasele, sok te tut ben tsaꞌame, sok te tut ben toje.
3Jich tutꞌil yakꞌojbon kichꞌ kaꞌtel ta skuenta slekil yoꞌtan te Diose, ya kalbeyex ta apisilik te maꞌyuk machꞌa ya snop ta spensar te mukꞌ ya yakꞌ sbae. Jaꞌ lek nail ta juju-tul aꞌ snop te tut yaꞌiyel ya yaꞌi sbae, chikan te jayeb te xchꞌuunel-oꞌtanil aꞌbot yuꞌun te Diose.
4Jich tutꞌil te jun tiꞌbalulil ay bayal ta jkaj te tut ay yuꞌune, y ma spisiluk jun nax yaꞌtel ta spisil. 5Jich euk te joꞌotike. Aunke ben bayalotik, jun nax ayotik ta skuenta te Cristoe, y jich jun nax ayotik ta jpisiltik ta juju-tul, jich mismo tutꞌil te jtiꞌbalultike.
6Dios la yaꞌbotik skajal skaj te majtaniletike, chikan te tut la skꞌan a yaꞌbotik ta juju-tule. Jaꞌ yuꞌun, teme Dios la yaꞌbotik jmajtantik ta yalel te skꞌop Diose, aꞌ jpastik chikan te xchꞌuunel koꞌtantik te ay kuꞌuntike.
7Teme jaꞌ yakꞌojbotik te majtanil te ya xtuunotik yuꞌun te yane, lek me a wak tuunukotik. Te machꞌa yichꞌoj te majtanil yuꞌun te ya snojpeswanej, a me nojpeswanuk. 8Te machꞌa yichꞌoj te majtanil yuꞌun te ya yaꞌbe spuersa yoꞌtan te yane, a me yaꞌbe xan spuersa yoꞌtan. Te machꞌa ay tut ya skꞌebene, junuk me yoꞌtan a yakꞌ. Te machꞌa ay ta skuenta tsobawe, junuk me yoꞌtan a tsobawanuk. Te machꞌa ya skoltay te meꞌbaetike, junuk me yoꞌtan awak spas.
Te tut ya skꞌan spas te machꞌa xchꞌuunejix Diose
9Kꞌux me xꞌawaꞌiy abaik ta awoꞌtanik juju-tul. Pꞌajaik te tut ma tsaꞌamuke, y jaꞌ xꞌatamik te tut leke. 10Kꞌux me xꞌawaꞌiy abaik jich tutꞌil te machꞌatik jun nax smeꞌ-statike. Talel bael akꞌa abaik me ta jkuenta, y chꞌuunbeya abaik amantalik. 11Pasaik me puersa. Ma me chꞌajubanik. Akꞌa abaik ta mantaltesel yuꞌun te Kajwaltike sok spꞌejel awoꞌtanik. 12Kontento me xꞌamaliyik te lekilale. Kujchuk me awuꞌunik sok apuersaik te wokoletike. Ma me akom abaik ta skꞌoponel Dios. 13Koltayaik me te machꞌatik ayix ta skuenta te Diose teme maꞌyuk tut ay yuꞌune. Junuk me awoꞌtanik ya awikꞌik ochel te machꞌa ya xtal yuluꞌtayexe.
14Kꞌanbeyaik bendision te machꞌatik ya stenexe. Kꞌanbeyaik bendision y ma me awixtaꞌkꞌoptayik. 15Kontento xꞌanex sok te machꞌatik kontento aylane. Okꞌanik sok te machꞌatik ya xlaj okꞌe. 16Junuk awoꞌtan abaik ta juju-tul. Ma me toybaukex. Jaꞌ me pajal ya skꞌan xꞌanex sok te machꞌatik lom chꞌunulike. Ma me xꞌakuy te lom pꞌijexe.
17Ma me apakbe sjelol teme ay machꞌa ma tsaꞌamuk ay tut ya spasbeyate. Akꞌaik ta ilel ta spasel te tut lek ta sitil-komone. 18Asta te ba kꞌalal ay ta akuentaike, pasaik te ba kꞌalal ya xjuꞌ awuꞌunike te jich me jun awoꞌtanik ta apisilik a. 19Kermanotak te lom kꞌuxex ta koꞌtane, ma me pakbeya abaik amulik jaꞌex mismo. Jilesbeyaik ta skuenta te Diose te ya yaꞌbe kastigoe, porke te Sjun Diose jich me ya yal: “Joꞌon ay ta jkuenta te ya jchape. Joꞌon me ya kaꞌbe stoj”, xchi te Kajwaltike. 20Sok jich ay xan: “Teme ya xwiꞌnaj te akontrae, aꞌbeya me sweꞌel. Y teme takin yoꞌtane aꞌbeya me yuchꞌ jaꞌ. Teme jich ya apase, ya me xtal skꞌajkꞌal sit yuꞌun te kꞌexlale”, xchi me. 21Ma me awakꞌ stsalex te tut ma tsaꞌamuke. Jaꞌ lek tsalaik me te tut ma tsaꞌamuke ta skuenta te tut leke.
S'ha seleccionat:
ROMANOS 12: AMANNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento Tzeltal de Amatenango © Sociedad Bíblica de México, 2006.