ROMANOS 10
10
1Kermanotak, ya skꞌan koꞌtan y sok te ya jkꞌoponbe Dios te israeletike, te jaꞌuk ya staik euk te kolele. 2Jamal ya xjuꞌ ya kalbeyex te ben jun yoꞌtanik ya yakꞌ sbaik ta tuuntesel yuꞌun te Diose. Jaꞌ nax te tut ya skꞌan yoꞌtanike ma jaꞌuk stamojik te tut batsꞌi jiche. 3Yuꞌun ma kꞌoemuk ta yoꞌtanik te tutꞌil Dios ya skoltay yuꞌun smul te winketike. Y jaꞌ yuꞌun jaꞌ ya sleik te skolelik ta skuenta nax te tut ya xjuꞌ ya spasike. Ma jaꞌuk ya yakꞌik ta jkuenta te tut yalojbe skꞌoplal te Diose. 4Porke te mantaliletike kꞌo lajuk skꞌoplal ta skuenta Cristo, yuꞌun jaꞌ ya skoltay yuꞌun smul spisil te machꞌatik ay xchꞌuunel yoꞌtanike.
5Te tutꞌil ay skꞌoplal te kolem ya xkꞌot yuꞌun smul te jaꞌ nax ya xchꞌuunik te mantaliletike, jich a stsꞌibay te jMoisese: “Te machꞌa ya xjuꞌ yuꞌun xchꞌuunel te mantaliletike jich ya xkuxuyin yuꞌun”, xchi me. 6Pero te tutꞌil ya xkolikix yuꞌun smul ta skuenta nax te xchꞌuunel yoꞌtane, jich ya yal: “Ma me xꞌawal ta awoꞌtan: ‘¿Machꞌa me te ya xmo bael ta chꞌulchane?’ ma me xchiukex”, xchi te Moisese. Jaꞌ bi, yuꞌun ya yikꞌ tal koel te Cristoe. 7“Sok ma me jichuk ya awal xan: ‘Machꞌa me te ya xko bael te ba ay yutil chꞌene’, ma me xchiukex”, xchi te Moisese. Jaꞌ bi yuꞌun ya yikꞌ moel Cristo te ba ay te animaetike. 8¿Tut xchi ya awaꞌiy? Jich ya yal te Moisese: “Te skꞌop Diose serka ayix ta atojol sok ta atiꞌ sok ta awoꞌtan”, xchi me. Jaꞌ me te kꞌop te ya kaltik te ya skꞌan chꞌuunele. 9Teme jamal ya awal ta atiꞌ te jaꞌ Kajwaltik te Jesuse, y sok ya xchꞌuun awoꞌtan te Dios a xchaꞌkuses tal te ba animaetik te Jesuse, jich me ya ata akolel. 10Yuꞌun sok koꞌtantik ya jchꞌuuntik yuꞌun jich me ya xkolotik yuꞌun jmultik. Sok ya kaltik ta jtiꞌtik te jchꞌuunejtik te Jesucristoe, yuꞌun jich me ya jtajtik jkoleltik yuꞌun.
11Jich ya yal te Sjun Diose: “Ma xjil ta kꞌexlal ni jtuluk te machꞌa ya xchꞌuune”, xchi me. 12Ma yanuk kꞌoem te juriyoetike y sok te machꞌatik ma juriyouke; yuꞌun te Kajwaltike jaꞌ mismo ajwalil ta spisil. Y ma me pꞌisbiluk ya yaꞌbe bendision ta spisil te machꞌatik te ya xlokꞌ ta stiꞌ te sbiile. 13Jich ya yal te Sjun Diose: “Spisil te machꞌatik ya xlok ta stiꞌ te sbiil Kajwaltike, ya me staik skolelik”, xchi me.
14Pero, ¿tutꞌil kꞌan lokꞌuk ta stiꞌ teme ma xchꞌuunejuke? ¿Y tutꞌil kꞌan xchꞌuunik, teme maꞌyuk yaꞌiyejbe sluwar te skꞌope? ¿Y tutꞌil kꞌan yaꞌiyik, teme maꞌyuk machꞌa ya yal te skꞌop Diose? 15¿Y machꞌa kꞌan ba yal te skꞌop Diose, teme maꞌyuk machꞌa tikonbile? Jich tut ya yal te Sjun Diose: “Ben tsaꞌam a julik tal te machꞌa yichꞌoj tal te lek achꞌ kꞌope”, xchi me.
16Pero ma spisiluk ya yakꞌik ta jkuenta te skꞌoplal te kolele. Jich tutꞌil la yal te jꞌIsaiase: “Kajwal, ¿machꞌa xchꞌuunejix te skꞌop Dios la kaltike?” xchi me. 17Jich yuꞌun, te xchꞌuunel-oꞌtanile jaꞌ ya xtal a teme la kaꞌitike, y te tut ya kaꞌitike jaꞌ te skꞌoplal Cristoe.
18Pero te joꞌone ya jojkꞌoy: “¿Me yuꞌun wan maꞌ yaꞌiybeyik sluwar te skꞌop Diose?” xchion. Puersa ay a yaꞌiyik, porke te Sjun Diose jich ya yal:
“Ta spisil te balmilale pujkix bael ta alel yuꞌunik, y asta ta último srinkonal te balmilale kꞌotix te skꞌopike”, xchi me.
19Y ya jchaꞌjojkꞌoy xan: “¿Me yuꞌun maꞌ yaꞌiybeyik sluwar te jꞌisraeletike?” xchoon. Jaꞌ nail a yal te jMoisese:
“Joꞌon ya kaꞌbeyex slaꞌ-awoꞌtanik yuꞌun te jun jtejklum te ma jtejklumuk ta naile. Ya me kakꞌ ilinanik ta skontrainel jun jtejklum te ma skꞌan yaꞌiybeyik sluwarile”, xchi me.
20Sok la yaꞌbon jnaꞌ xan te Isaiase:
“Te machꞌatik makꞌ sleikone ya me staikon, y ya me kakꞌ jba ta ilel yuꞌun te machꞌatik makꞌ sjojkꞌoyikone”, xchi me.
21Y jaꞌ skꞌoplal te israeletik te jich ya yal te jꞌIsaiase:
“Spꞌejel kꞌaal jtoyoj jkꞌabꞌ ta smaliyel te jun jtejklum te ma xchꞌuun mantale y sok te jkꞌaxintawanejetike”, xchi me.
S'ha seleccionat:
ROMANOS 10: AMANNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento Tzeltal de Amatenango © Sociedad Bíblica de México, 2006.