HECHOS 18
18
Te jPabloe ay ta jtejklum Corinto
1Ta patil te jPabloe lokꞌ bael ta jtejklum Atenas y bajt ta jtejklum Corinto. 2Teꞌ kꞌo sta jtul juriyo-winik a, te jꞌAquila sbiil, te ay slumal ta estado yuꞌun Ponto. Ma to nax jaluk kꞌaal a te jul ta Italia te jꞌAquila sok yinam, te sPriscila sbiile, yuꞌun la yal mantal te mukꞌul rey jClaudio te ya xlokꞌ tal spisil te juriyoetik te ay ta Romae. Te jPabloe ba yuluꞌtay tal. 3Pajal ya snaꞌ spasel nail pakꞌ sok te jꞌAquilae, jaꞌ yuꞌun la sjoyin sbaik y jun nax a aꞌtej sok. 4Ta jujuchoj skꞌaalel te kuxo-oꞌtane, te jPabloe bajtulan ta sinagoga. Teꞌ yalulanbe a y asta la yaꞌbe xchꞌuun te lek achꞌ kꞌop te juriyoetike sok griegoetike.
5Kꞌalal lijkik tal ta Macedonia te Silas sok te jTimoteoe, te jPabloe jaꞌ nax a yaꞌtelin yalel te skꞌop Diose, y jamal a yaltalanbe te juriyoetik te jaꞌix Cristo te Jesuse. 6Pero te juriyoetike lijk skontrainik te jPabloe y la stoyba-kꞌoptayik. Jich te jPabloe la slilin skꞌuꞌ-spakꞌ yuꞌun jaꞌ seña ta stojolik te ya xchꞌoj jilele, y la yaltalanbe:
—Jaꞌex ay ta akuentaik teme chꞌayel ya xbaexe. Te joꞌone maꞌyuk ta jkuenta ya xkꞌot. Liꞌ nax kꞌalal to ya xboon te ba ay te machꞌatik ma juriyouke —xyut jilel.
7Jicha lokꞌ bael te ba sinagogae, bajt ta sna jtul winik Justo sbiil te xiꞌoj te Diose te tijil ay sok sinagoga te snae. 8Te Crispo te statal yuꞌun te sinagogae la xchꞌuun euk te Kajwaltike sok spisil te machꞌa ay yuꞌun ta snae. Ay bayal corintioetik te kꞌalal la yaꞌiyik te skꞌop Diose la xchꞌuunik euk, y la yichꞌtalan jaꞌ.
9Ay jun ajkꞌubal a wayuchej te jPabloe, albot yuꞌun te Kajwaltike:
—Ma me xiꞌan. Akꞌa me puersa yalel te jkꞌope. Ma me akom aba. 10Porke joyinejat, y maꞌyuk machꞌa ya xjuꞌ yilbajinat. Yuꞌun ay bayal machꞌa ay kuꞌun liꞌ ba jtejklume —xꞌutot.
11Jich te Pabloe jalaj jun jaꞌbil sok olil te ba jtejklum Corintoe, te la snojpeslan tutꞌ ay te skꞌop Diose.
12Pero te kꞌalal ochemix ta gobierno ta estado Acaya te jGalion sbiile, te juriyoetike la stsob sbaik ta skontroinel te jPabloe, y la yikꞌik bael te ba ya smeltsaꞌawan te jGalione. 13La yalbeyix te gobiernoe:
—Te winik to yipal ta yaꞌbeyel xchꞌuun Dios te gentee, ma jichuk te tut ya yal te mantaliletike —xchiik.
14Te jPabloe kꞌan kꞌopojuk ta ora, pero te jGalione la yalbe te juriyoetike:
—Jaꞌex te juriyoexe, te jaꞌuk tulan mulil te tut spasoje, joꞌon mismo ya kaꞌibe sluwar te tut ma tsaꞌamuk ya awaꞌibeyike. 15Pero komo kꞌop nax, y sok biililetik, sok mantaliletik awuꞌunik, chapa atukelik. Porke ma jkꞌan jchꞌik jba a te kꞌopetik to —xchi.
16Y la yakꞌ ta ikꞌel lokꞌel te ba ya smeltsaꞌanwane. 17Jicha ba skomon-tsakonik te Sóstenes, te jtul statal yuꞌun te sinagogae, y la smajik teꞌ mismo a te ba ya smeltsaꞌanwan te jGalione. Pero te jGalione ni ma yocheluk.
Te jPabloe sujt bael ta jtejklum Antioquia
18Te jPabloe bayal xan kꞌaal a jalaj a te ba Corintoe. Ta patil la skꞌoponlan jilel te hermanoetike, y sok te jꞌAquila sok te sPriscila, moik bael ta barko yuꞌun laj bajt ta estado yuꞌun Siria. Te kꞌalal ma to xmoik ta barko a te Pabloe, la yakꞌ ta joxel sjol ta jtejklum Cencrea yuꞌun ay tut yaloj ta stojol te Diose.
19Te kꞌalal laj kꞌot ta jtejklum Efesoe, te jPabloe la sjiles te jꞌAquila sok te sPriscilae. Te Pabloe bajt ta sinagoga, teꞌ yaꞌbiyan sok a te juriyoetik te tey ya stsob sbaik ae. 20La skꞌanbeyik pawor te yauk xjalaj xan teꞌae, pero maꞌ skꞌan.
21La skꞌoponlan jilel y la yaltalanbe:
—Yuꞌun ya jkꞌan te ayukon ta Jerusalen ta spasel kꞌin te xnopetix tale. Teme jich ya skꞌan Diose, ya xchaꞌsujton tal, ya xtal kilex bael —xyut jilel.
Patil mo bael ta barko te jPabloe, jil yuꞌun te jtejklum Efeso. 22Te kꞌalal lokꞌ kꞌoel ta jtejklum Cesarea, te jPabloe mo bael ta Jerusalen. Kꞌo spatalanbe yoꞌtan te hermanoetike. Y te nax a bajt ta Antioquia.
Te jPabloe yoxmelal ya slijkes a te ya xba yal te skꞌop Diose
23Teꞌ anin cheꞌoxeb kꞌaal a, y chaꞌlok xan bael. Kꞌa yiltalan te juju-tijkꞌ hermanoetik te ayik ta estado Galacia sok ta estado Frigiae. La yaꞌbe jilel spuersa yoꞌtan te hermanoetike.
Te jꞌApolose la yal skꞌop Dios ta jtejklum Efeso
24Te tiempo abi kꞌot ta Efeso jtul juriyo-winik te jꞌApolos sbiil te ay slumal ta jtejklum Alejandria. Ben lek xkꞌopoj y ben lek ya snaꞌ yilel te Sjun Diose. 25Sok snaꞌojix tutꞌil ay ta chꞌuunel te Kajwaltike y ben jun yoꞌtan ya xkꞌopoj. Tsꞌakal ya yakꞌ ta nopel te tutꞌil ay skꞌoplal te Jesuse, aunke jip nax ya snaꞌbe sluwar a te tutꞌil ay te ichꞌjaꞌ te la yakꞌ te Juane. 26Te jꞌApolose ma xiꞌ ta kꞌop te ba singogae. Pero te kꞌalal la yaꞌiy te sPriscila sok te jꞌAquila, la yikꞌik bael ta parte y la yalbeyik lek te tutꞌil ay ta chꞌuunel te Diose. 27Te kꞌalal la snop te ya xkꞌax bael ta estado yuꞌun Acaya te jꞌApolose, te hermanoetike la yaꞌbeyik bael spuersa yoꞌtan. Y la stsꞌibabeyik bael jun karta te hermanoetik te ay ta estado Acayae, te yauk yikꞌik y yauk xkꞌuxutayike. Te kꞌalal kꞌot ta estado Acaya te jꞌApolose, bayal a skoltay te machꞌatik xchꞌuunejix ta skuenta slekil yoꞌtan te Diose. 28Yuꞌun te jꞌApolose ben toj te skꞌope, jich ma juꞌ te ya stsalot ta kꞌop yuꞌun te juriyoetike. Yuꞌun jamal ya yakꞌ ta naꞌel ta Sjun Dios ta stojol te genteetik te jaꞌ Cristo te Jesuse.
S'ha seleccionat:
HECHOS 18: AMANNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento Tzeltal de Amatenango © Sociedad Bíblica de México, 2006.