THUPHUANDOH 21
21
Lei thah leh vaan thah muhna
1Huin ke’n vaan thah leh lei thah ka mu a; ajiahchu vaan masa leh lei masa chu a paimangta a; tui khang lian zong a um nawn sih hi. 2Huleh kei John in khopi siangthou, Jerusalem thah chu, mou a pasal a diing a kichei banga bawlzohsa a Pathian a kuana vaan apata hung kumsuh chu ka mu hi. 3Huleh vaan akipan aw ngaihtah khat in, Ngai in, Pathian biahbuuh chu mihingte lahah a umta hi, amah chu a lahvah a teeng diing a, amahuh chu a mite ahi diing va, Pathian amah ngei a kawmvah a um diing a, huleh a Pathian uh ahi diing hi. 4Huleh Pathian in a mit vapat mittui zousiah a siaah siangsah diing hi; huleh sihna a um nawn sih diing a, lungkhamna leh, kahna leh, natna zong a um nawn sih diing hi; ajiahchu sil masate teng a paimangta hi, a chih ka ja hi. 5Huleh laltouphah tunga toupa’n, Ngai in, sil zousiah ka siam thah hi, a chi a. Huleh ama’n ka kawmah, Gial in; ajiahchu hi thute hi a dih in a ginum ahi, a chi a. 6Huleh ama’n ka kawmah, bawl zoh ahita. Kei Alpha leh Omega, abul leh atawp ka hi. Dangtaah photmah kawmah hinna tui luikhuuh a, a thawn in ka pe diing hi. 7A gualzoutu in chu sil zousiah a luah diing a; huleh a Pathian ka hi diing a, amah zong ka ta ahi diing hi. 8Hizongleh meidawite leh, gingtaloute leh, kihdahumte leh, tualthatte leh, tohuuhte leh, bumhaatte leh, milimbete leh, zuau haatte zousiah tan diing chu mei leh kaat a kaang diil ahi a; huchu sih nihna ahi.
Vaan Jerusalem muhna
9Huleh gawtna sagih nunungpen a dim belhbu sagih tawi angel sagihte laha khat ka kawmah a hung a, ahung houpih a, Hilamah hung in, mou, Belaamnou ji chu ka hung ensah diing hi, a chih a. 10Huin ama’n hagau in taang saang liantah tungah ahung puita a, huleh hu khopi loupitah, Jerusalem siangthou, Pathian a kuana vaan apata hung kumsuh chu ahung ensah a. 11Pathian loupina a nei a; a vaah chu suang mantampen bang, jasper suang bang ahi a, Khristal suang tobang a val ahi. 12Huleh kulhbaang nasatah leh saangtah a nei a, kot sawmlenih a nei a, huleh hu kotte ah chu angel sawmlenih a um hi, huleh hu kotte tungah min kigial a um a, hute chu Israel nam sawmlenihte min ahi. 13Suahlam ah kot thum; maallam ah kot thum; simlam ah kot thum; huleh tumlam ah kot thum a um hi. 14Huleh khopi kulbaang in innbulphuh sawmlenih a nei a, huleh hute tungah Belaamnou sawlleh sawmlenihte min a tuang hi. 15Huleh amah kei hung houpihpa’n, hu khopi leh, a kotte leh, a kulhbaang tehna diingin tehna sana chiang a tawi a. 16Huleh a khopi chu ning li kibang nei in a um a, a dunglam chu a vailam chia ahi a; huleh ama’n hu chiangin khopi chu a teh a, farlong siing khat leh saang nih; A dunglam leh a vailam leh a saanlam a kibang hi. 17Huleh ama’n kulhbaang chu a teh a, mihing tehna a tehin, (huchu angel tehna ahi a) tong zakhat leh tong sawmli leh tong li ahi. 18Huleh a kulhbaang chu jasper suang a kibawl ahi a; a khopi chu sana sianga kibawl limlang bang mai ahi; 19Huleh khopi kulhbaang innbulphuh chu suang mantam chi chintenga jep ahi. Huleh a innbulphuh masapen chu jasper suang ahi a; a nihna chu sapphire suang ahi a; a thumna chu kalsidoni suang ahi a; a lina chu emerald suang ahi a; 20A ngaana chu sardonix suang ahi a; a guupna chu sardia suang ahi a; a sagihna chu krisolit suang ahi a; a giatna chu beril suang ahi a; a kuaahna chu topaz suang ahi a; a sawmna chu krisopra sa suang ahi a; a sawmlekhatna chu jasinth suang ahi a; a sawmlenihna chu amethist suang ahi. 21Huleh a kot sawmlenihte chu tuikep suang sawmlenih ahi a; a kot chin chu tuikep suang khata bawl ahi; huleh khopi kotzing chu sana a bawl, limlang etpailet theih bang ahi. 22Huleh huah chu biahinn mawngmawng ka mu sih hi; ajiahchu Lalpa Pathian Bangkimbawlthei leh Belaamnou chu a biahinn ahi mai uhi. 23Huleh hu khopi inchu a taanvaah diingin ni a ngai sih a, ha zong a ngai sih hi; ajiahchu Pathian loupina in hichu a taanvaah a, huleh Belaamnou chu a thaumei ahi mai hi. 24Huleh hutdama um namte chu hu vaah ah a leeng diing va, leitung a kumpipate’n a loupina uleh a zahumna uh a poluut diing uhi. 25Huleh a kotte chu suun in a kikhaah ngei het sih diing; ajiahchu hu munah jan a um sih diing hi. 26Huleh amahun hu sungah namte loupina leh zahumna ahung poluut diing uhi. 27Huleh hu sung a’chu bangchihmahin silbolhhoh leh, kihdahhuai bawl leh, zuau bawl himhim a luut sih diing a; hizongleh Belaamnou hinna lehkhabu a min tuangte chauh a luut diing uhi.
S'ha seleccionat:
THUPHUANDOH 21: SIMTBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.