Mariko 8
8
Yesu omiyo ji alufu ang’wen chiemo
(Mathayo 15.32-39)
1Bang’ ndalo matin, oganda moro machielo maduong’ nochako ochokore, to ne gionge gi chiemo. Omiyo Yesu noluongo jopuonjrene, mowachonigi niya, 2“Akecho jogo nikech gisebet koda kuom ndalo adek to koro gionge gi chiemo. 3Ka aweyo gidok thurgi ka gidenyo kamano, to nong’no ditergi e yo, nikech moko kuomgi oa kuma bor ahinya.” 4To jopuonjrene nopenje niya, “Ere kama ng’ato diyudie chiemo e thim kaeri ma dirom jogo duto?” 5Yesu nopenjogi ni, “Un gi makati adi?” Ne gidwoke ni gin makati abiriyo.
6Yesu nowacho ni ji mondo obed piny. Eka nokawo makati abiriyogo, mogoyo ni Nyasaye erokamano, nong’ingogi, momiyogi jopuonjrene mondo opogni ji, mi ne gitimo kamano. 7Bende ne gin gi rech moko manok matindotindo. Mago bende Yesu noguedho, mi owacho ni jopuonjrene mondo opog ni ji. 8Kamano ji duto nochiemo, moyieng’. Bang’e ne okwany ng’injo modong’, mi oromo atonge abiriyo. 9Jogo duto ne alufu ang’wen. Eka Yesu nogonyo ji, moa. 10En to nodonjo e yie kaachiel gi jopuonjrene, mi odhi e gweng’ Dalmanutha.
Jo-Farisai okwayo Yesu mondo otimnigi hono
(Mathayo 16.1-4)
11 #
Math 12.38; Luka 11.16. Jo-Farisai moko nobiro ir Yesu, mochako mino kode wach. Ne gidwaro teme, omiyo ne giwachone mondo otimnigi hono moa e polo manyiso ni Nyasaye ni kode. 12#Math 12.39; Luka 11.29.To Yesu noomo chunye matek, mowacho niya, “Ere gima omiyo tieng’ ma kawuononi kwayo ni mondo otimnigi ranyisi? Adier anyisou ni onge ranyisi ma notim ni tieng’ni!” 13Gikanyono noweyogi, odok e yie, mi ong’ado nam odok loka machielo.
Thop jo-Farisai kod thop Herode
(Mathayo 16.5-12)
14Noyudo wi jopuonjre Yesu owil, mi ok okawo makati moko odhigo, to ne gin mana gi makati achiel kende e yie. 15#Luka 12.1.Yesu nowachonigi niya, “Yawuru wang’u mondo ubed motang’ ni thop jo-Farisai ko thop Herode.” 16Eka ne giwacho e kindgi giwegi niya, “Owacho kamano nikech waonge gi makati.” 17Yesu nong’eyo gima giwacho, omiyo nopenjogi ni, “Ang’o momiyo uwacho ni uonge gi makati? Pok wach odonjonu, muwinjo tiend gik matimore? Koso pod parou odinore? 18#Jer 5.21; Ezek 12.2; Mar 4.12.Un gi wenge, to marang’o ok unyal neno? Bende un gi it, to ere gimomiyo ok unyal winjo? 19Ok unyal paro ni ne ang’ingo makati abich ni ji alufu abich? Koso atonge adi mag ng’injo modong’ mane uchoko?” Ne gidwoke ni ne gin atonge apar gariyo. 20Eka Yesu nomedo penjogi ni, “To kane ang’ingo makati ni ji alufu ang’wen, to atonge adi mag ng’injo modong’ mane uchoko?” Ne gidwoke ni, “Abiriyo.” 21Yesu nochako openjogi niya, “To bang’ mago duto, wach pok odonjonu?”
Yesu ochango muofu Bethsaida
22Bang’e ne gidhi Bethsaida, mi jomoko nokelo ni Yesu ng’at ma muofu, ka gihombe mondo oket lwete kuome. 23Yesu nomako lwet ng’atno mi ogole oko e dala. Ne ong’ulo olawo e wang’e kendo oketo lwete kuome. Eka ne openje niya, “Bende inyalo neno gimoro?” 24Ng’atno norango koni gi koni, modwoke ni, “Ee, aneno ji kawuotho, to gichalo mana gi yien.” 25Eka Yesu nochako oketo lwete e wenge ng’atno, kendo kane ng’atno otemo neno matek, wengene nochango chuth, mi oneno gik moko duto malong’o. 26Bang’ mano, Yesu noweye odok dalane, kokwere ni kik odog e dala mar Bethsaida.
Petro ohulo ni Yesu en Mesia
(Mathayo 16.13-20; Luka 9.18-21)
27Bang’e Yesu gi jopuonjrene ne jowuok, modhi e mier mokiewo gi Kaisaria Filipo. Kane gin e yo gidhi, nopenjogi niya, “Ka ji loso kuoma, to uwinjo ka giwacho ni an ng’a?” 28#Mar 6.14, 15; Luka 9.7, 8.Ne gidwoke ni, “Jomoko wacho ni in Johana Jabatiso, to moko wacho ni in Elija. Moko bende wacho ni in achiel kuom jonabi.” 29#Joh 6.68, 69.Eka ne ochako openjogi ni, “Un to, uparo ni an ng’a?” Petro nodwoke ni, “In e Mesia.” 30Bang’ mano Yesu nokwerogi ni kik ginyis ng’ato ni en ng’a.
Yesu owuoyo kuom sandruokne kod thone
(Mathayo 16.21-28; Luka 9.22-27)
31Bang’ mano, Yesu nochako puonjo jopuonjrene kawacho niya, “Wuod Dhano nyaka ne masiche mang’eny, kendo jodongo gi jodolo madongo kod jopuonj Chik nyaka dage. Enonege, to bang’ ndalo adek nochier.” 32Ne owachonigi wachno ratiro. To Petro nogole tenge, ni ok onego olos kamano. 33To Yesu nolokore, morango, jopuonjrene, mi okwero Petro niya, “Aye nyima Satandni, nikech paro mari ok paro mar Nyasaye, to mana mar dhano.”
34 #
Math 10.38; Luka 14.27. Eka Yesu noluongo oganda mane oyudo ochokore, kaachiel gi jopuonjrene, mi owachonigi niya, “Ka ng’ato dwaro luwa, to nyaka okwerre owuon, mi okaw msalape kendo oluwa, 35#Math 10.39; Luka 17.33; Joh 12.25.nikech ng’ama dwaro reso ngimane, ngimane nolalne. To ng’ama wito ngimane nikech an, kendo nikech Injili, to nores ngimane. 36Ere ohala ma ng’ato yudo, konwang’o piny duto, to owito ngimane? 37Koso ang’o ma ng’ato dichiw kar ngimane? 38Ka wi ng’ato kuot koda, kendo kuot gi wechena e kinde ma ji timoe richo kendo weyoe Nyasaye, to wi Wuod Dhano bende nokuod kode, kobiro e duong’ mar Wuon mare, kaachiel gi malaika maler.”
S'ha seleccionat:
Mariko 8: DHO15
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Dholuo DC Bible © Bible Society of Kenya and Bible Society of Tanzania, 1976.