GALƐSEAA DIMA 6
6
1M mabiisi, sɔ yi tumni taalli ka ya baŋŋi lala, see ka yarima ban mari Siiya Kasi maa nin zaŋŋi u n‑zaali n‑wulisi u din tu; amaa faasee ka ya niŋi lala maa baalimm baalimm. Nyin gɔsim i mammaŋŋa suŋŋa, din nin kyɛ ka nyin gba di kpɛ zamsigu puuni. 2Ya suŋŋma n‑zi taaba zitibsa, ka ya yi tumni lala, ya nin dɔlisi Kirisita Masiiya zaaligudima zaa. 3Sɔ yi teesi, ni, u nyɛ la bunseelli ka mun siri pa bunseelli, di daama kur yɔmsiri la u mammaŋŋa. 4Kyɛ ka sɔkam zaa zamsi m‑baŋŋi u mammaŋŋa tuma an nyɛ seem; an dee n‑yi nyɛ la bunsuma, dinŋɔna u nin toaai n‑nyu bara di zugu: ka mun ku zaŋŋi u yɛla n‑ŋmamsi u taraansɔ gba ŋɔn tum seela. 5Dama sɔkam zaa ziiri la u mammantoori ziiri. 6Ba yi zaŋŋni Naawunni lahabasuŋŋu maa n‑wulisiri sɔa, ŋɔn purigma u bunsuma n‑tisi u karimba maa. 7Yan di yɔmsiri ya mammansi, ka Naawunni pa la ban niŋni sɔ ansarisi; ka nira yi buri bunseela, ana ka u nin ti kyɛa. 8Sɔ yi buri ningbina kɔrisi beesigu bumbura, u nin ti nya sa'aŋŋu antaam di zugu; u mun yi buri la Siiya Kasi bumbura, lala nin kyɛ ka u ti nya nyɔvuriseaa kan ka naari. 9Dizugu ti di kyɛ ka ti gyɛ tunsuma tumpu zugu; ka ti yi bu kyɛ tuma maa m‑basi, saha kyɛnni na ka ti nin nya ti antaam. 10Ka dinzugu, soori ŋɔn kur yoaai n‑ti ti maa zugu, faasee ka ti tumni suŋŋa n‑tiri sɔkam zaa, ka di mun di tam la ti yiri dima maa ban nyɛ yɛdda niŋniba la.
11Kur gɔsima man ŋɔn zaŋŋi n mammaŋŋa nuu n‑sɔbri bakyi kɔbkarakara seem n‑ti ya na#:-
12Ninvugseeba ban kur mugsiri ya ya gunibu zugu maa n nyɛ ban kur boori ni ba wulisi ba mansi ka nyu kafuga zaŋŋi n‑kyaŋŋi ningbina yɛla. Ban niŋi seem gbinni kur nyɛ la, ni, din nin kyɛ ka niriba ku namsi ba Kirisita dɔpulli maa zugu. 13Halli ninvugseeba ban guni maa bu wumni n‑tiri fukumsi zaaligudima maa; ba boori la ya guni ka ba yi nyu bara, ni, ya daa wum n‑ti ba zaŋŋi n‑kyaŋŋi ningbina yɛttɔ'a wa yɛla. 14Amaa man ŋɔna, m bu boori n nyu la bara bunseelli kam zugu, di yi pa la ti Dugma Yisa Masiiya dɔpulli la zugu kɔkɔa. U dɔpulli wa zugu ka duniya wa nyɛ la bunkpiiŋŋu n‑ti ma, ka man gba nyɛ bunkpiiŋŋu n‑ti duniya. 15Di pa la mugsigu kaman nira guni, bee, u bu guni; din kur mugsi nyɛ la i kur maali n‑niŋi bumpaalli. 16Ninvugseeba ban kur dɔli soori wa, alaafɛ ni sufudoaa nin bɛ ba saani: halli ka laa m‑bɛ niriba zaa saani ban nyɛ Izraɛli dima halaali n‑ti Naawunni la!
17Din baasi nyaaŋŋa: sɔ di laa n‑ti ma yɛlimugsa m‑paasi, dama kyisiseesi an bɛ n ningbina ni wa wulisiya, ni, n nyɛ la Yisa Kirisita nira.
18M mabiisi, ti Dugma Yisa Kirisita Masiiya zaŋŋma u piinisuma n‑niŋi ya zaa sufu ni! Ammi.
S'ha seleccionat:
GALƐSEAA DIMA 6: maw
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2002, Wycliffe Bible Translators, Inc. All rights reserved.