San Marcos 14
14
Chujni kjuathexin ixin rutse na̱ Jesús
(Mt. 26:1-5; Lc. 22:1-2; Jn. 11:45-53)
1Bitjaan yoo nchaꞌon ixin rukii thi kiai diꞌin pascua, thi kiai jine na̱ niuthja chundaꞌa thi nchegeꞌen nchoꞌo. Ko are mee kain xi daana baketuꞌan ngain icha xi daana ko kain xi tjaago ley kjuathexin xa kexreen runcheyeꞌe xa Jesús ixin rutse xa ko naruguenxon xa. 2Aro ndachro xa:
—Sunthoꞌa ná jiꞌi ngain kiai ixin kain chujni tsuñaua ná na̱.
Naa nchrii kuinthjithe ndaxrajni jaa Jesús
(Mt. 26:6-13; Jn. 12:1-8)
3Are Jesús xra beꞌe ngain rajna Betania, ko beꞌe ngain nthanchaon nthi̱ꞌa̱ nchianduꞌa Simón thi banchegiꞌin na̱ thi leproso, nthi̱ꞌa̱ kunchieꞌen naa thi nchrii kunixin xruxrao dikunchjianxin juxon xro marmol ko jiria naa ndaxrajni dikunchjianxin tsjo diꞌin nardo ko anto renthe. Ko kunthai nchra xro mee ko kuinthjithe nchra ndaxrajni ngataꞌa jaa Jesús. 4Ko kanxion chujni beꞌe nthi̱ꞌa̱ bikon na̱ jiꞌi bintheguñao na̱ ko kuexiꞌin na̱ ndachro na̱:
—¿Unda kuxinkua ndaxrajni yaa? 5¡Icha nchao rukuchjixin nda inchin tsjexin dacha naa thi ncheꞌe xra nguixin nano, ko tumi mee nchao ruchjee ná chujni nua!
Ko binchesatheꞌe na̱ thi nchrii mee.
6Aro Jesús ndachro ngain na̱:
—Tanchrjanda ra nchrii yaa, ¿unda ncheñao ra nchra? Ixin thi bincheꞌe nchra ngajin anto jian. 7Chujni nua kainxin nchaꞌon sinthe na̱ ngayaꞌa ra, ko nchao tsjengijna ra na̱ are jaꞌa ra sinao ra. Aro jaꞌan kainxinꞌa nchaꞌon sariꞌi ngayaꞌa ra. 8Nchrii jiꞌi bincheꞌe nchra thi nchao bincheꞌe nchra, ko ukuinga na nchra ndaxrajni ixin ruxrabaxin na are undaseꞌen na. 9Atho ndua thi jaꞌan rindathjo ra ixin nguii thi sikekin na̱ thi jian juajna jiꞌi, kai rundachro na̱ thi bincheꞌe nchrii jiꞌi, ixin jañaa ruxraxaunxin na̱ nchra.
Judas ndachro ixin rutse na̱ Jesús
(Mt. 26:14-16; Lc. 22:3-6)
10Kuthimejan Judas Iscariote, naa thi theyoo chujni bakao Jesús, kjui bitsjeꞌe kain xi daana icha renthe ko nichjee xa ixin kexreen jeꞌe rugajon Jesús ngain xa. 11Ko are jeꞌe xa kuiꞌin xa jiꞌi, anto chee xa ko ndachro xa ixin rugajon xa tumi. Kuthimejan Judas kuexiꞌin xraxaon ixin kexreen sincheꞌe ixin sinchechieꞌen Jesús ngain xa.
Jesús binekaꞌo thi theyoo chujni bakao
(Mt. 26:17-29; Lc. 22:7-23; Jn. 13:21-30; 1 Co. 11:23-26)
12Nchaꞌon saꞌo are thexinxin kiai bajine na̱ niuthja bagankeꞌa na̱ thi denxin nchoꞌo ko baguen na̱ kuleko. Ni theyoo bakao Jesús kunchieꞌen na̱ ngain jeꞌe ko banchiangiꞌi na̱:
—¿Thinoo sinthachjianxin ná thi sunthexin ná kiee pascua?
13Kuthimejan Jesús kuetuꞌen yoo chujni bakao ko ndachro ngain na̱:
—Thji ra Jerusalén, ko nthi̱ꞌa̱ setan ra naa thi xii jidikao naa nchiixra jinda ko rueꞌe ra xa. 14Ko ngain nchia sixiꞌin xa, nthi̱ꞌa̱ ndachexin ra thi nchianduꞌa: “Xi tjaago danchiangi xa: ¿Thinoo sinekianxin chujnina pascua jiꞌi?” 15Ko thi nchianduꞌa mee tsjaguꞌa ra naa nchia jié ngain piso yuxin. Nthi̱ꞌa̱ nchechjianxin ra thi sunthe ná.
16Kuthimejan kayui ni mee sakjui na̱ ko are biji na̱ ngain rajna bithja na̱ kain inchin Jesús ndachro. Ko nthi̱ꞌa̱ binchechjian na̱ thi rune na̱ ngain kiai.
17Ko are undakunaxin xeꞌe Jesús bijikao ni theyoo chujnii bagakao. 18Ko are utene na̱ ngain nthanchaon, Jesús ndachro ngain na̱:
—Jaꞌan ndua rundathjo ra ixin naa ra xro tenthe ra ngajin sajon na ngain chujni ningakunna.
19Ko kain na̱ ndabinthechiin na̱ ko kuexiꞌin na̱ banchiangiꞌi na̱ Jesús, ko ndachro na̱:
—¿A jaꞌan?
20Ko Jesús ndachro:
—Jaan, naa xro theyoo ra, thi jinchetjao niuthjee ngain laato rinenxin jaꞌan. 21Ndua, jaꞌan thi Xii juixin ngajni, rugunda seꞌen na inchin jitaxin ngain xruen Ndo Dio, aro ¡anto tangi tsuꞌen thi xii sajon na ngain chujni ningakunna! Icha jian xii mee rukunkjiꞌa xa.
22Ko are xrateneo na̱, Jesús kuaa niuthja ko kuexruxiꞌin Ndo Dio, ko kunchjenga nio, kuthimejan bajon nio ngain ni theyoo ko ndachro ngain na̱:
—Jinthe ra, jiꞌi ruchro nthauꞌna.
23Kuthimejan kuaa thi jiria vino ko kuexruxiꞌin Ndo Dio ko bajon ngain na̱ ko kain na̱ biꞌi na̱ vino. 24Ko ndachro ngain na̱:
—Jiꞌi jnina, thi jitunchjianxin inaa trato narua ngain Ndo Dio. Ko jnina singo jni ixin ruxengaxin ꞌna thi jianꞌa ncheꞌe tsjé chujni. 25Aro rindathjo ra ixin jaꞌan irukjanꞌa na siꞌi ndee tho uva, tsija nchaꞌon are siꞌi vino naruaxin nthi̱ꞌa̱ thi thetuꞌan Ndo Dio.
Jesús ndachro ixin Pedro rundachro ixin chunxinꞌa jeꞌe
(Mt. 26:30-35; Lc. 22:31-34; Jn. 13:36-38)
26Ko are juexin binthetsje na̱ Salmos, sabinthekji na̱ ngain jnanchjan diꞌin Ntha Olivo. 27Kuthimejan Jesús ndachro ngain na̱:
—Kain ra sinthechiꞌin ra ko tatsinthuna ni ra, ixin ngain Xruen Ndo Dio ndachro: “Nasuenxon thi thingaria kuleko ko kain kuleko ndaruchjekee ba.” 28Ko are jaꞌan ruxechon na, jaꞌan icha saꞌo tsji ngain nunthe Galilea ke jaꞌa ra.
29Kuthimejan Pedro ndachro ngain Jesús:
—Maski kainxin na̱ tatsinthuꞌa na̱, aro jaꞌan naꞌi.
30Kuthimejan ndachro Jesús:
—Jaꞌan ndua rindathjo ixin ngain thie jiꞌi, xra rutsjeꞌa kunthaxichia yoo nthiꞌa ko jaꞌa uninxin nthiꞌa rundachro ixin chunxinꞌa na.
31Pedro ndachro:
—Maski nasuenxon na na̱ inchin seꞌen suixin, aro rundachrjanꞌa ixin chunxinꞌa.
Ko xrajeꞌo nichja ni ikainxin bagakao Jesús.
Jesús nichjee Ndo Dio ngain Getsemaní
(Mt. 26:36-46; Lc. 22:39-46)
32Kuthimejan Jesús kunixin chujni bakao biji na̱ ngain nunthe diꞌin Getsemaní, ko nthi̱ꞌa̱ Jesús ndachro ngain na̱:
—Nthiꞌi dinthe ra ko chunna ra ixin jaꞌan sinichjaa Ndo Dio.
33Ko Jesús sabikao Pedro, Jacobo ko Juan, ko kuexiꞌin kunuꞌe naa juachjaon anto suji ngain anseen. 34Kuthimejan jeꞌe ndachro:
—Jaꞌan tununa ngain ansenna naa juachjaon anto suji ko tununa ixin ndaseꞌen na. Dithuꞌa ra nthiꞌi ko dinthechrinꞌa ra.
35Ko Jesús sakjui nchion icha kjín ko nthi̱ꞌa̱ bethuxin ko bisetaꞌa nunthe ko nichjee Ndo Dio. Ko banchia ixin ja̱ nchao, rugathoꞌa thi anto tangi rukuꞌen. 36Ko are jinichjee Ndo Dio ndachro:
—¡Suixin, Ndudana! Suixin nchao dincheꞌe kain, mexinxin ja̱ nchao tanchrjandaꞌa na satho thi anto tangi tsunna; aro tsuenꞌa inchin jaꞌan rinaꞌo, ncho tsuꞌen inchin Suixin rinao.
37Kuthimejan jeꞌe kjan ngain thi nii chujni bikao, ko are jeꞌe biji nthi̱ꞌa̱, jeꞌe na̱ utadinthejua na̱. Ko ndachro ngain Pedro:
—Simón, ¿autarichrin? ¿Akuixianꞌa tabaritsjeꞌe naa hora? 38Tadinthetsjeꞌe ra ko nchetseꞌen ra ñao Ndo Dio ixin xruꞌin thi jianꞌa sitaꞌa ra. Ndua, espiritua ra tajichueꞌon keꞌe sikuꞌen, aro nthauꞌa ra sujiꞌa nthao.
39Ko yuxin nthiꞌa jeꞌe kjan nichjee Ndo Dio ko xrajeꞌo nichja ngain ndo. 40Kuthimejan jeꞌe kjan ko bithja na̱ tatejua na̱ inaa ixin jmakon na̱ ikuixinꞌa ixin kuthachrin, ko ibenueꞌa na̱ keꞌe rundachro na̱ ngain Jesús. 41Kuthimejan are ukjan nthiꞌa ninxin, Jesús ndachro ngain na̱:
—Xra tadinthechrin ra ko nchejugaꞌa ra. ¡Uxingamaꞌa ra! Ixin ujuii thi hora are jaꞌan, thi Xii juixin ngajni, sinchechieꞌen na na̱ ngaa raa chujni jianꞌa. 42¡Dingathjen ra sachjin ná, ixin ujuii thi tsjaago na ngain ni rutse na!
Tse na̱ Jesús
(Mt. 26:47-56; Lc. 22:47-53; Jn. 18:2-11)
43Ko Jesús xra jañaa jinichja are juibeꞌo Judas, naa ni theyoo bakao, ko jirue anto tsjé chujni teyaa na̱ espada ko nthaa, ixin xi daana baketuꞌan ngain icha xi daana ko ni thetuꞌan ngain rajna, ni mee ni ruaꞌan kain chujni teꞌi. 44Ko Judas, thi bindachro kexreen rutse na̱ Jesús, mee udindachro ngain kain chujni juiaꞌo:
—Thi jaꞌan tsetuxin ixin ruchjaꞌa juajna, jeꞌe mee Jesús, tse ra jian ko sathjiꞌo ra.
45Ko are Judas ujuii, jeꞌe kunchieꞌen ngain Jesús ko ndachro:
—Suixin thi tjaago.
Ko kuetuxin Jesús ixin chjee juajna. 46Kuthimejan chujni tse na̱ Jesús.
47Aro naa ni bakao Jesús bantsje espadee ko kunchrijiꞌin ndatsjuen naa xi ncheꞌe xree xi daana icha renthe. 48Ko Jesús ndachro ngain kain chujni:
—¿Aujuiꞌi ra kunixin espada ko nthaa ixin bitse ni ra, inchin ja̱ rukji naa xi cheꞌe? 49Kain nchaꞌon bariꞌi ngayaꞌa ra ixin banthakuaꞌan ra ngain niꞌngo icha renthe ko tseꞌa ni ra. Aro kain jiꞌi jituꞌen, ixin sikuenxin kain thi dikji̱n ni bagayee juajnee Ndo Dio ngain Xruen ndo.
50Ko kain ni bakao Jesús kuinthuꞌe na̱ jeꞌo, ko sakuinga na̱.
Naa xan xii sakuinga
51Kai naa xan xii baruee Jesús, jeꞌo naa manta betsaa xan, ko are tse na̱ xan, 52jeꞌe xan bachrjengaxin xan lunthue xan ko thulucho xan sakuinga xan.
Jesús ngathexin kon ni ncheꞌe jie̱
(Mt. 26:57-68; Lc. 22:54-55, 63-71; Jn. 18:12-14, 19-24)
53Kuthimejan ni tse Jesús sabikao na̱ ngain nchianduꞌa xi daana thetuꞌen icha xi daana, ko nthi̱ꞌa̱ binthexrathe kain xi daana icha renthe, xi tjaago ley ko ni thetuꞌan ngain rajna. 54Ko Pedro kjín jiruexin ko biji ngain patiue nchianduꞌa xi daana thetuꞌen kain xi daana. Nthi̱ꞌa̱ bixiꞌin Pedro ko tabeꞌe ngayee xi tenda nchia ko xixruꞌe ngain xruꞌi jiche nthi̱ꞌa̱ 55Kain xi daana icha renthe ko kain xi ncheꞌe jie̱ kjuee xa thi jianꞌa runchekaxin xa Jesús ixin nchao naruguenxon xa. Aro xruꞌin jianꞌa bithjeꞌe xa. 56Ko tsjé chujni kunchieꞌen ixin ndachro na̱ thi nduaꞌa ixin Jesús, aro jejee banichja na̱. 57Kuthimejan binthekunchieꞌen kanxion chujni ixin nichja na̱ thi nduaꞌa ixin Jesús ko ndachro na̱:
58—Jaꞌan na̱ kuian na̱ ndachro xii yaa: “Jaꞌan nchao tsunxanthe ninguꞌe Ndo Dio, niꞌngo binchechjian chujni, ko ngain nchaꞌon ninxin sinthachjian inaa ningo ko jeꞌa chujni sinchechjian ningo.”
59Ko xra kjuathexinꞌa choo na̱ jian ixin xra jejee banichja na̱.
60Kuthimejan xi daana thetuꞌen kain xi daana bingathjen xa ngayee kainxin na̱ ko banchiangiꞌi xa Jesús:
—¿Axruꞌin rundachro jaꞌa? ¿Axruꞌin rundachro ixin thi jinichja chujni teꞌi ixin jaꞌa?
61Aro Jesús tenkua ko xruꞌin batheꞌe, mexinxin jeꞌe xa kjan xa banchiangiꞌi xa inaa ko ndachro xa:
—¿Ajaꞌa thi Cristo, thi Xeꞌen Ndo Dio?
62Ko Jesús ndachro:
—Jaan, jaꞌan. Ko sikon ni ra jaꞌan, thi Xii juixin ngajni, sariꞌi ngain rajianxiin Ndo Dio, thi chunda kainxin juachaxin, ko kai sikon ni ra are rukjan na siꞌi ngakjan thjui.
63Kuthimejan jeꞌe xi daana thetuꞌen kain xi daana anto guñao xa ko kuinchje xa lunthue xa ko ndachro xa:
—¡Irugundaꞌa tsjee ná icha chujni runichja ixin thi bincheꞌe xii jiꞌi! 64Jaꞌa ra ukuiꞌin ra kexreen nichja xa jianꞌa ixin Ndo Dio. ¿Keꞌe xraxaon ra?
Ko kainxin na̱ ndachro na̱ ixin Jesús jikininxin seꞌen.
65Kuthimejan kanxion na̱ kjuanito na̱ ndathee na̱, ko kuejeꞌe na̱ jmakon Jesús ko xrangii na̱ thon ko xra ndache na̱:
—¡Ndachro kensen bintja!
Ko kain xi tenda nchia kjuaaya xa ngain Jesús.
Pedro ndachro ixin jeꞌe chunxinꞌa Jesús
(Mt. 26:69-75; Lc. 22:56-62; Jn. 18:15-18, 25-29)
66Are Pedro tajii nduja ngain patio, biji ngain jeꞌe, naa nchri ncheꞌe xree xi daana thetuꞌen kain xi daana. 67Ko are bikon nchra Pedro tajixixruꞌe ngandeꞌe xruꞌi, jeꞌe nchra ndachro nchra:
—Jaꞌa kai bakjiꞌo Jesús, thi juixin rajna Nazaret.
68Aro Pedro ndachro ixin nduaꞌa ko ndachro ngain nchra:
—Jaꞌan chunxinꞌa xii yaa, ko nunaꞌa keꞌe rinichja jaꞌa.
Kuthimejan sakjui thi dixinxin ni patio. Ko tuin tsje kunthaxichia. 69Aro nchri ncheꞌe xra mee kjan nchra bikon nchra Pedro inaa, ko kuexiꞌin ndachro nchra ngain ni te nthi̱ꞌa̱:
—Xii jiꞌi naa xi bagakao Jesús.
70Ko Pedro kjan ndachro ixin nduaꞌa. Kuthimejan kain ni te nthi̱ꞌa̱ kjan ndachro na̱ ngain Pedro:
—Jaan ndua, jaꞌa naa chujni bakao Jesús, ixin jaꞌa kai chujni juixin nunthe Galilea.
71Kuthimejan Pedro banchia rugetsingataꞌa thi jianꞌa ko ndachro:
—Chunxinꞌa xii yaa, thi jaꞌa ra ndachro ra.
72Ko tuinxion tsje kunthaxichia inaa. Kuthimejan Pedro xraxaon thi ndachro Jesús ngain jeꞌe: “Xra rutsjeꞌa kunthaxichia yoo nthiꞌa ko jaꞌa uninxin nthiꞌa urundachro ixin chunxinꞌa na.” Ko are xraxaon jiꞌi beꞌe tsjanga.
S'ha seleccionat:
San Marcos 14: plsNT
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2017, Wycliffe Bible Translators, Inc. All rights reserved.