Lin 4
4
Kein Horu Abel
1Inum pe Adam imtir mbrulun, pe mbrulun ikuni kom ile mundren pe iduwe nedun kamal homou. Ewah ipe ihpah, “Lapan ipu huyen ile todo pe yu kah nedu homou kamal.” Ile pe iy iyuwen rangan Kein.#4.1 Kein: Ile nolou Hibru ti kuruwen ihpa ndre nolou ikunii. 2Ndruwen ti pe iy iduwe nedun kamal homou yi, rangan Abel.
Horu harla ndre nusuwo’ horu ti pe Abel madan iso tan sipsip pe Kein ti impo marai odo tuhe sane. 3Song odo langah tan Kein hala sengin ti pe, iy ikuni se pe isurkon Lapan ile eriy. 4Pe Abel iruhe sipsip homou ndrihou, itngwii, pe isurkon Lapan ile kahen se nama-an. Lapan irih tan Abel ndroda song pe surok tadan. 5Odoke Lapan ihmboren Kein ndroda song tadan. Kein ihpusuw pe madan imo ile mo-on.
6Ile pe Lapan ipe ile tan Kein ihpah, “Ou madam kimo pe opo loroh kolwii. 7Lehpe ou opo huyen eri Yu kuhposon ou, pe ou we ondrupo loroh pwi. Pe uh ou endretahrung punou todo pwi, eri ampahar, to-ir we kihndrusi ou. To-ir ingkeli-iy kopwi ipe kikuni ou ala lewen, odoke ou epkwe pe ahtaran iy.”
8Ndre omur ti pe Kein ipe ile tan tinton ihpah, “Toru torndrou kile kotile’ toru.” Horu harla ndre alau ti pe Kein iyepwi tinton imet.
9Lapan ihndremte Kein ihpah, “Abel inna kehe?”
Kein ipe ihpah, “Yu tuno pwi. Ou apa we yu kulla ke kelye-en?”
10Eri pe Lapan ipe ihpah, “Ou erehe tintom imet ti odosa? Ndrayen tintom iyin poi ti irrah ile Todo, ipe Yu kuhmbrus iy pe kupu nuhen. 11Ou eri ka we elnget pede-en. Poi indrelumwi ndrayen tintom, ile pe ou andranon ondrupo langah kile pule-en pwi yi. 12Uh ou edehe song kile poi, eri we poi kindrehlingi song tadam pwi. Ile pe ou kah atlang pe owou. Ou ka we enerolila kopwi, sehir kile sehir, odo pule-en lokpoi.”
13Pe Kein ipe ile ta Lapan ihpah, “Pede-en Ou eduwe ile todo kiti mandra lakopwi. 14Ou ana-as yu odo lok ketih. Apa yu kumwin hun Ou kolwii. Pe yu ka we kunelila sehir kile sehir odo lokpoi. Pe homou kihrah todo eri we kepwi yu kumwet.”
15Odoke Lapan ipe ihpah, “We kindrahpa kiti pwi. Uh homou lau kepwi ou amat, eri Yu we kuse nuhem pe kupu muden kile ta sa lau ndre ndrotulmuu.” Ile pe Lapan ide kalmene-en Kein, odo uh sa lau hahrah tadan, eri we handrapwi iy pwi. 16Pe Kein itlang iyeu odo madan Lapan pe ilmin lok sehir yi rangan Nod,#4.16 Nod: Ile nolou Hibru eri Nod ti ihpa ndre nolou sehir ile sehir. ilso wuron rai ea odo Iden.
Yayan Kein Su
17Kein iyesou pe imtir ndrodan mbrulun, pe nedu’ horu kamal homou ihir, pe horu hartawe rangan Enok. Inum pe Kein ihtungon lok hokor pe iyuwen ile seren nedun. 18Kom ndrihou tan Kein ti Enok.
Enok nedun ti Irat,
Irat nedun ti Mehujael,
Mehujael nedun ti Metusael, pe
Metusael nedun ti Lamek.
19Lamek iyesou pedih rumuu, homou rangan Adah pe homou Silah. 20Adah nedun homou rangan Jabal. Su yayan Jabal ti mada’ su iso tam makau pe hene-en um pelei. 21Jabal ti tinton homou rangan Jubal. Pe su yayan Jubal eri hompo weriy ile kita pe horruh kuweh. 22Silah iduwe nedun homou rangan Tubalkein, iy ndramat odo takun bras pe ain pe inahnan ndrake-en sane odo marai ile eriy. Timso-on Tubalkein eri Namah.
23Lamek ipe ile ta mbrulun horu ndre rumuu ihpah,
“Adah pe Silah, artahrung yu.
Oruu mbrulun Lamek, artawe ndralnga’ oruu.
Anah homou eleheu iruh yu, pe yu urehe iy imet.
24Oruu tuno’ oruu ihpa ndre uh homou lau kepwi Kein eri
Petngendrei we kipu muden pe kiruhe lau ndrotulmuu hamat.
Odoke yu, eri uh homou kiruhe yu kumwet,
eri we ndramat ndre ndrotulngeh-pe-ndrotulmuu (77) we hamat kile mudi.”
Set Horu Enos
25Adam imtir Ewah yi pe Ewah ile ndriyen pe iduwe nedun kamal homou yi. Ewah ipe ihpah, “Petngendrei indretawe nedu homou yi ile muden Abel ndre Kein iruhei imet.” Ile pe iy iyuwen rangan ile Set.#4.25 Set: Ile nolou Hibru eri Set ti ihpa ndre nolou indretawei. 26Set iyesou pe nedun kamal homou. Iy irson rangan ile Enos. Idu mundrun eriy, eri sa ndramat kah hesurok pe hoyuw Lapan ile rangan nembruwen.
S'ha seleccionat:
Lin 4: KTM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.