Lolmav 9
9
Miqyail Ilsaqleiqlav nail jeq-e bhai tsel dov-a nail ganl
1Ngal Yeiqsul Khali nail sivtavq bhai mal dil tsaq nail phaq ge nail ngaol. Ngal goiqbhaoq maq bhaoq. Meeq nail Haol nail Aqhaqlal bhaq da nee, ngaq nail heeq nia nail neema iqsanl, ngaq-ai nee mail salkhil khanq nail ngaol. 2Ngaq nail neema lavqkhoel bhai noeq haq dee dee khi khaq mao iqsanl khaoqlaol ail nial. 3Ngaq nail jeq-e jaq-a ngaq nail aqivq jaqbheq nail haqbhoil, ngal Khali nee gaoq ceiv ceiv ail khi Miqyail-i mail ivqkhail yavq nail bhai daq movq nail neema aol ail nial. 4Aqyu juq neq, Ilsaqleiqlav nail tsaol-aq ngaol. Aqyu juq neq, Miqyail-i mail tsel dov-ai thaq nail tsaol-aq pevq lal-a nail maqkhaiq, Miqyail nail seiqleiq khaoqsail maqkhaiq, daoqma saljial maqkhaiq, aoldaoq kovqdaoq maqkhaiq, uqhuq thaoq nail aol maqkhaiq, Miqyail nail saljial maqkhaiq, iqsanl mail ya-a nail tsaol-aq pevq nail ngaol. 5Aqyu juq neq, aqmil dov nail Ilsaqleiqlav nail tsaol-aq nail aqphiq aqbhal al juq nail ovq nee jeq lee el lee-a nail tsaol-aq juq ngaol. Aqsivq haqjoil phao nee ge haq neq, Khali iqsanl aqyu juq nail jeq-e jaq-a pevq nail ngaol. Aivq neq, iqsanl nail kovtavq bhai uv thaiq nail Miqyail ngaol. Aivq bhai nqmaq maqluv halyeel tsiq eeq bhel. Aq miq.
6Miqyail nail daoq neq, luq ail seil ail nail maq ngel-ail. Khul khi mail dai ngal-aq neq, Ilsaqleiqlav nail jeq-e jaq-a iqsanl mail, Ilsaqleiqlav nail tsaol-aq mal dil pevq nail maq ngel-ail. 7Aqbhaqlaqhaq nee mail yavq kha lee thaq nail yaq juq iqsanl bhai, aivq nail jeq-e jaq-a ngaol dai, maq ge nia-ail. “Ilcav nail ovq nee doevq lee-a nail juq bhai taivq-ail naoq nail jeq-e jaq-a ngaol dai, saol-nvq bhiq naol” dai, Miqyail Aqbhaqlaqhaq bhai ge bhiq-ai thaq nail ngaol. 8Niailhai ge movq ail nial. Aqsivq haqjoil nee doevq lee-a nail jeq-e jaq-a juq neq, Miqyail nail yaq pevq nail maq ngel-ail. Daoqma saljial jaq-ai thaq nail khe-ai, doevq lee-a nail juq taivq-ail Aqbhaqlaqhaq nail yaq ngaol dai, saol-nvq-ai thaq nail ngaol. 9Khul khi mail dai ngal-aq neq, Miqyail Aqbhaqlaqhaq bhai saljial niail hai jaq-a nail ngaol: “Naqyaq kovq niil yanq bhai, ngal teevq pov gaoq lee naol. Aq-u phao, naoq nail khaqma Saqlal yaqyov teevq gaq tsiq nail ngaol” dai, ge bhiq-a nail ngaol.
10Al ovqtavq, Leiq bhail kavq iqsanl, ngadao nail aqbhu Ilcav bhai maol ail khi, yaq ceiv lai-a nail ngaol. Yaq ceiv lai-a nail al neq, nvq gaq bhee nail ngaol. 11-12Yaq al nvq gaq aqmeeq phaq iqsanl aqdoil phaq iqsanl maq nl haq-al. Miqyail tsaol-aq yaq bhai tsel dov-u phao, aqyu juq nl nail hal nail bhai hel daiq khi tsel dov nail maq ngel-ail. Miqyail-i mail noeqceiv-ai thaq nail khe-ai bhee lal dai, aivq-i mail khul-a nail tsaol-aq bhai taivq-ail tsel dov nail ngaol dai, bhi heeq nia nail haqbhoil, “Aqivq gaq neq, jaqbheq gaq nail yaqkav ya jiovq naol” dai, Miqyail aqma gaq bhai ge bhiq-a nail ngaol. 13Jal liq lavqkhoel bhai gevq-ai thaq nail khe-ai,
“Ngal Yaqkov
bhai gaiq-a khi,
Ilsaol bhai bhe naol” dai,
gevq-ai thaq nail ngaol.
14Al heel ngel-i mail, ngadao khul ge duq jiav nail-aiq. Miqyail maq tsaq maq daol ail laiq. Maq ngel ail dei-eiq. 15Khul khi mail dai ngal-aq neq, aivq Maolseiq bhai ge bhiq-a nail:
“Ngal geeqlaoq eel jaol
bivq movq nail juq bhai
geeqlaoq eel jaol bivq khi,
ngal gaoq haq gaiq-a
movq nail juq bhai
gaoq haq gaiq-a naol” dai,
ge bhiq-a nail ngaol.
16Al heel ngel-i mail, tsaol-aq yaq nail neekhaol oil movq nail bhaq da nee tsel dov lavq nail maq ngel-ail. Laijai-a nail bhaq da nee iqsanl tsel dov lavq-a nail maq ngel-ail. Miqyail nail gaoq haq gaiq-a nail phaq bhaq da nee taivq-ail tsel dov lavq-a nail ngaol. 17Jal liq lavqkhoel bhai Iljiltuv milkhaoq khe heeqphaq bhai niail hai ge bhiq-ai thaq nail jiav nail ngaol:
“Ngaq nail bhaqaoq neq, naoq nail bhaqaoq nee maq tsil eeq jaiq nail ngaol dai, bhi dov lal khi, milkhaoq doi dai, ngaq nail aqmil bhi gaiq doi ail nail haqbhoil, ngal naoq bhai heeqphaq bhi jiovq-a nail ngaol” dai, ge-ai thaq nail ngaol. 18Al heel ngel-i mail, Miqyail neq, aivq gaoq haq gaiq-a movq nail juq bhai gaoq haq gaiq-a khi, neema bhi gaol movq nail juq bhai bhi gaol nail ngaol.
19“Thail hai phal-iq neq, khul khi mail Miqyail oeqbal gaoq thaq lavq nail-aiq. Aivq nail neema tsaq nail phaq bhai khaq sil gaq lav tsoiq nia nail-aiq” dai, nul juq ngaq bhai nal daiq movq ail jaol-aq. 20Miqyail bhai daoq kovq kovq nail tsaol-aq ol, naol neq, khalheel nail tsaol-aq pevq nail-aiq. “Khul khi mail naol ngaq bhai niail hai teivq lavq-a nail-aiq” dai, iqlaoq neq, teivq-a nail gaq bhai ge lai nia naol laiq. 21Iqlaoq lav sav nail gaq, iqlaoq lav sav nail kovtavq bhai khal lav sav movq nail khe-ai lav sav nia nail maq ngel ail laiq. Miltsaq teevq loe bhai, aqphoiq bhao nail iqlaoq teevq heeq lav sav nail maqkhaiq, aqphoiq maq bhao nail iqlaoq teevq heeq lav sav nail maqkhaiq, aivq bhai jiav nail maq ngel ail laiq.
22Miqyail-i mail nl nail phaq iqsanl al hai dul nail ngaol. Aivq nail neema phail nail phaq bhi moel movq khi, aivq nail bhaqaoq bhai bhi heeq nia movq-ai bhiq nail ngaol. Thail hai ngaol-aoq, aivq neema phail khi lav luq lav seil ail bhiq nail dai, lainq-ai thaq nail iqlaoq juq bhai ol ol ail jaol nail ngaol. 23Seiq leiq khaoqsail ya dai, iqmoeq-u nee mail lav sav-ai thaq nail, aivq gaoq haq gaiq-a nail iqlaoq juq bhai, aivq nail seiqleiq khaoqsail kha dai eeq kha dai heel nail dai bhi moel movq nail ngaol. 24Miqyail ngadao juq bhai, al heel nail iqlaoq pevq lal dai, khul-ai thaq nail ngaol. Yuldav nail tsaol-aq juq nail lavqkhoel bhai taivq-ail khul-a nail maq ngel-ail. Yu nail jeq-e jaq-a nail lavqkhoel bhai iqsanl khul-a nail ngaol. 25Al hai dul dai, yu nail jeq-e jaq-a nail ganl, Miqyail nail haqbhoil ge dan nail Holseiq-i mail gevq-ai thaq nail haoqgavq lavqkhoel Miqyail ge nail:
“Ngaq nail jeq-e jaq-a
maq ngel nail juq bhai
ngaq nail jeq-e jaq-a
ngaol dai, khul khi,
ngal maq gaiq-a nail
jeq-e jaq-a bhai,
ngal gaiq-a nail juq dai,
khul nail ngaol.
26Nul juq neq,
ngaq nail jeq-e jaq-a
maq ngel ail dai,
aivq-i mail ge-a nail
aqduq bhai nul juq neq,
doevq nail Miqyail nail
yaq ngaol dai,
gaoq mil phal
bhiq naol” dai,
ge-ai thaq nail ngaol.
27Miqyail nail haqbhoil ge dan nail Ilsaqyal iqsanl Ilsaqleiqlav nail jeq-e jaq-a nail ganl niail hai ge-ai thaq nail ngaol:
“Ilsaqleiqlav nail
tsaol-aq neq,
iqyaq iqma nail
tsalhail khe-ai,
mao khi ngaol-aoq,
hevq kovq nail phaq
ya nail tsaol-aq neq,
micil teevq-eel ngaol.
28Khul khi mail dai ngal-aq neq
Heeqphaq Miqyail miltsaq bhai
aivq nail daoq bhee lal dai
phal lal nail phaq maq jiav dai,
lavqtsail mail nl nail ngaol” dai,
ge-ai thaq nail ngaol.
29Ilsaqyal gaoq ge nail:
“Bhaq aoq eeq nail Heeqphaq Miqyail
ngadao juq nail haqbhoil
jeq-e jaq-a maq bhi doevq ail
ceevq-al nul neq,
ngadao Saoldoq meenq khe-ai pevq-ail khi,
Gaolmaollav meenq khe-ai,
dul nail ngaol” dai,
ge-ai thaq nail ngaol.
Ilsaqleiqlav nail jeq-e jaq-a khi mail lavqkhiq tsail nail geeqlaoq daoq nail ganl
30Ngadao khul ge duq jiav nail-aiq. Yu nail jeq-e jaq-a tsaq nail daol nail phaq bhai maq hal pov khi ngaol-aoq, tsaq nail daol nail phaq ya-a nail ngaol. Ngal niail hai ge nail neq, neema thaq tsaol nail ngel-i mail ya-a nail tsaq nail daol nail phaq bhai ge nail ngaol. 31Thail hai ngaol-aoq, Ilsaqleiqlav nail tsaol-aq juq neq, aoldaoq kovqdaoq bhai tavq nail tsaq nail daol nail phaq bhai hal pov khi ngaol-aoq, maq hal pov moel-al. 32Khul khi mail maq hal pov moel thaq nail dai ge haq neq, neema thaq tsaol nail phaq bhai maq juq dai, nl nail hal nail phaq bhai taivq-ail juq nail ngel-i mail ngaol. Al heel ngel-i mail tsaol-aq yaq phaq thiq thiq nail lovmav bhai aqyu juq iqsanl phaq thiq thiq nail ngaol. 33Jal liq lavqkhoel bhai gevq-ai thaq nail khe-ai:
“Tsaol-aq phaq thiq
bhi thiq khi,
bhi bavq tsuq ail nail
lovmav,
ngal Yeel ovq gaoqjaoq
bhai bhi jiav naol.
Thail hai ngaol-aoq,
aivq bhai neema
khal thaq tsaol nail
tsaol-aq maq ya
haq sil ail” dai,
gevq-ai thaq nail ngaol.
S'ha seleccionat:
Lolmav 9: aeu
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.