Mattá 2
2
Issáay cháragá nojumiáni áyag
1Bádsháh Hirudisay ahd o bárigá, wahdé Issá Yahudiahay damagay shahr Bayt-Lahemá pédá butagat, gorhá cha ródarátká#2:1 Ródarátk, bezán hamá némag ke róch dara kayt, mashrek. lahtén nojumi Urshalimay shahrá átk. 2Jostesh gept: “Hamá nonnok ke pa Yahudiáni bádsháhiá pédá butag, kojá ent? Má áiay estár dar áyagá distag o pa áiay parastesh kanagá átkagén.” 3Cha é habaray eshkonagá, Hirudis bádsháh o Urshalimay sajjahén mardom báz paréshán o deltaparkah#2:3 Deltaparkah, bezán paréshán, deltrakk. butant. 4Hirudisá kawmay sajjahén dini péshwá o Sharyatay zánóger#2:4 Sharyatay zánóger, bezán dini álem o Mussáay Sharyatay zántkár. lóthet o jost geptant ke “Masihay pédáesh kojá bayagi ent?” 5Áyán passaw#2:5 Passaw, bezán jwáb. dát: “Yahudiahay shahr Bayt-Lahemá pédá bit, chéá ke nabiay ketábá nebeshtah ent:
6 ‘Oo Yahudáay shahr Bayt-Lahem!
Taw Yahudáay hákemáni nyámá kasterén naay,
chéá ke cha taw yakk hákemén sardáré pédá bit
ke á mani kawm Bani Esráilay shepánkiá kant.’” # 2:6 Miká Nabiay Ketáb 5:2; Samwél Káziay Domi Ketáb 5:2.
7Gorhá Hirudisá nojumi chérandari lóthetant o á estáray dar áyag o záher bayagay allamén wahdi jost kort ke kadén at. 8Randá áiá nojumi pa hamá nonnokay shóház o dar géjagá Bayt-Lahemá ráh dátant o gwashti: “Berawét o é chokkay bárawá sharr patth o pól bekanét, wahdé shomá dar gétk, maná sahig bekanét tán man ham pa áiay parastesh kanagá berawán.” 9Bádsháhay habaráni eshkonagá rand, nojumi ráh geptant. Ráhá rawán, hamá estár ke áyán dar áyagá distagat, áyáni démá pésh kapán, hamá jágahay sarborá óshtát, ke nonnok ódá at. 10Cha é estáray gendagá, sakk báz washdel butant. 11Lógá shotant o nonnokesh áiay mát Maryamay gwarán dist. Gorhá kóndhán kaptant o chokkesh parastesh kort, wati tohpah o thékiáni hokkah#2:11 Hokkah, bezán gwandhén sanduké ke saht o zéwari mána kanant. o zabáddánesh pach kortant o sohr o sóchoki o morresh pa nonnoká sawgát kortant. 12Randá, Hodáyá wábá á hozzhár kortant ke Hirudisay kerrá per matarrant. Gorhá cha dega ráhé, wati molká shotant.
Dém pa Mesrá
13Nojumiáni per tarragá rand, Hodáwanday préshtagé Issopay wábá átk o gwashti: “Chokk o chokkay mátá bezur o Mesrá betach, tán man tará nagwashán hamódá bedár, chéá ke Hirudis chokkay dar géjag o koshagá delmánag ent.” 14Gorhá, Issop anchosh ke cha wábá ágah but, chokk o chokkay máti zort o shapi shap dém pa Mesrá shot. 15Tán Hirudisay marká hamódá mantant tán Hodáwanday hamá habar rást o paddar bebit ke cha nabiay kawlá gwashag butagat: Man wati bacch cha Mesrá lóthet o áwort.#2:15 Hushá Nabiay Ketáb 11:1.
Hirudis chokkána kóshárénit
16Wahdé Hirudis sahig but ke nojumián á rad dátag, báz zahr gept. Parmáni dát: “Bayt-Lahem o kerr o gwaray do sálig yá kasterén sajjahén mardénchokk koshag bebant.” Anchosh ke áiá pésará nojumi jost o pors kortagatant, hamá hesábá é wahdi gisshént. 17É dhawlá Eremyá Nabiay Ketábá Hodáay hamá habar sarjam butant ke gwashtagati:
18 Cha Rámahay shahrá kukkáré góshán kapt,
mótk o zárié mazanén,
Ráhilá pa wati chokkán grét,
kaséay tasallái nazort,
chéá ke á namantagatant. # 2:18 Eremyá Nabiay Ketáb 31:15.
Dém pa Náserahá
19 Hirudisay marká rand, Mesrá Hodáwanday préshtagé Issopay wábá átk. 20Préshtagá gwasht: “Pád á, chokk o chokkay mátá bezur o padá wati molk, Esráilá per betarr. Chéá ke chokkay koshagay shawr borrók#2:20 Shawr borrók, bezán paysalah kanók. mortagant.” 21Nun Issop pád átk o chokk o chokkay máti zortant o padá Esráilay molká átk. 22Bale wahdé sahig but ke Hirudisay jáhá áiay chokk Arkeláus Yahudiahay damagay bádsháh ent, gorhá óday rawagi torset. Wahdé cha wábéá dháhé#2:22 Dháh, bezán hoshdár, wárning. raseti, watá pa Jalilay damagá rasénti. 23Ódá, Náserahay shahrá jahmenend#2:23 Jahmenend, bezán jágahéay neshtagén mardom, sáken, ábád. but tán é paymá nabiáni habar rást o paddar bebit ke á Náseri gwashaga bit.
S'ha seleccionat:
Mattá 2: HPKB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015-2022, Wycliffe Bible Translators, Inc. and the Balochi Bible Translation Team. All rights reserved.