ZACARÍAS 14
14
Actomjaclha nelha acnim
1Covac sat acnim apanco Visqui ingac, elnatamoc sat apquilnatam quellhip co Jerusalén, elmilascoc sat cotnaja ingmoc nipyesicsa. 2Ingyansiclhac sat Visqui ingac apyovoclhojo enlhitaoc lhalhma anco, elnapacpoc najan elimpocjac tingma Jerusalén, enatovacsic sat tingma. Elnatovacsic sat quilvanaa, enaliclhac sat apquilmomap, acvaycmo la mitad enlhitaoc. Elhnam sat apcanit apquilaymomap. 3Natamin eyanmongsiclhac sat Visqui ingac apquiltemaclha cotnaja ingmoc, ellingamcojoc sat malha apquilimpocjay. 4Etnamam sat Visqui ingac netin inquilhe Olivos, payjoc tingma Jerusalén nicja actiyapmaclha acnim. Copalhic inquilhe acvinatem nalhit, cotniclhac sat alvata ayinyema actiyapmaclha acnim acyascama actalhningvamlha acnim. Colhingsalhcac sat nilhqueyja nicja inquilhe, najan nipiyam moc nicja inquilhe acvinatem. 5Elinyajamcoc sat quellhip, acno apquinyajaycoc nic nat apquilyeyjamcaa quellhip. Ayinyema ilhnic nat acyovjeycam lhopactic (nalhpop) naysicsa aptimem apvisqui Uzías yoclhilhma Judá. Evotac sat Visqui ingac, apquillhalhmaa sat appintalhnama enlhit netin.
6Mepqui acmajat sat cotnejic as acnim najan mepqui piyam apmatsamangi. 7Cotnejic sat acnim acvoncaclhojo, apyascamco Dios apvamlha pac. Comascoc sat actimem alhtaa, cotalhcac sat ayitsasquiscamalhma cotmongvoyam nelha.#Is 24.23; Ap 22.5. 8Cotalhcac sat ayinyem yingmin tingma Jerusalén#Ez 47.1-12; Jn 7.38; Ap 22.1-2., najan acmocjitmaclha najan piyam. Conyejic sat nicja yingmin payjoc Mar Muerto (Acyitnamaclha yingmin ápac). Conyejic sat mocjam nicja yingmin payjoc Mediterráneo. 9Apvisqui apyimtalhnamo as nalhpop etnejic sat Dios, apvamlha pac lhama apvisay. 10Acyovoclhojo apquileyvomaclha enlhit cotniclhac sat amyip acvanyam, ayenmo Geba acvaycmo Rimón, tingma jerusalén payjoc nipiyam. Apyitnec netin inquilhe Jerusalén apquilmaclha enlhit, ayenmo Atong Benjamín acvaycmo Atong Ángulo (acyitnaclha Atong Nano), najan ayenmo tingma nitno Hananeel acvaycmo acyajapsomalhquilha acyilhna apvisqui apanco. 11Elhnam sat co Jerusalén mepqui ayay apquilvalhoc, metvasacpejec sat mataa tingma, mepqui mataa apquilimpocjay.
12Apquilimpocjac alhta cotnaja ingmoc tingma Jerusalén, ellingamcojoc sat apyanmongsayclha Visqui ingac apquiltemaclha apancaoc: Cotjapoc sat apjapitic enlhit apjalhnancaoc, cotjapoc sat apataoc najan apalhcaoc apquilvalhoc enlhit. 13Cotyamoc sat apquilvalhoc cotnaja ingmoc, elnapacpoc sat nipyesicsa apnaymacoc cotnaja ingmoc. 14Elpasingvoclhac sat co Judá elnapacpoc cotnaja ingmoc tingma Jerusalén. Elnatamoc sat nipyesicsa cotnaja ingmoc cotlaycaoc apquilnatam najan asoc alyinmom plata najan oro najan apava. 15Acno moc cotnejic apquillingaycamco acmasca apquilquinamtem nolhing, najan yeyjaycoc, najan camellos vancayispoc, najan yamelyeyjaycoc, najan acyovoclhojo apnatoscama alyanca carpa tingma cotnaja ingmoc.
16Cotnejic sat nalhit acnim, elpecjam sat enlhitaoc apquilimpocjay siclho tingma Jerusalén, elmiyaclhac sat moclhama año apnaclha Apvisqui apyimtalhnamo, eltimjic apquilayo naysicsa fiesta Enramada jamilh apancaoc.#Lv 23.39-43. 17Am sat anco elmiyaclhac enlhit tingma Jerusalén, mepqui apcayo Visqui apyimtalhnamo, comacyejec sat mataa apcaoclha. 18Am sat ancoc elmiyaclhac co Egipto apnaclha Apvisqui apyimtalhnamo naysicsa fiesta Enramada, colhojoc sat apyanmongsayclha Visqui ingac, acno nipyesicsa poc enlhitaoc. 19Eycaso cotnejic sat apyanmongsayclha Visqui ingac apquiltemaclha apancaoc enlhitaoc najan co Egipto, melyascama tingma Jerusalén elpasmiclhac fiesta Enramada jamilh apancaoc.
20Cotnejic sat as acnim, colvitalhcac sat talhamavo alicnajaycam apquilnatanma nolhing: Dios apquilyacyescama — sat cotnejic talhamavo. Najan moc apquilmaycam vaynca, cotnejic sat acponquinomalhca, noc moc ingjaycoc payjoc altar acvatnamalhquilha. 21Cotnejic sat alponquinomalhca vaynca nipyesicsa co Jerusalén najan nipyesicsa co Judá. Cotnejic sat apquilmaycam aptomja apcajem aptoscama macmescama Dios, cajanalhcac sat apjapitic aptoscama apmatnam. Melvitacpejec sat as acnim enlhit apquilyanmongsomap congne tingma apponquinomap — alhta aptomjac — nic nat aptomjac profeta.
S'ha seleccionat:
ZACARÍAS 14: ENHL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió