HAGEO 1
1
Apquillanayclha tingma apponquinomap
1Aptimec nic nat apvisqui Darío acvaycmo segundo año. Invocmec nic nat acnim primero najan piltin sexto. Apcapajasquic nic nat Dios Visqui ingac profeta Hageo, elngacsic sat amyaa apnaclha apvisqui co Judá apvisay Zorobabel, Salatiel apquitca, apnaclha apvisqui sacerdotes apvisay Josué, Josadac apquitca.#Esd 4.24—5.2; 6.14.
2-3Eycaso ilhnic nat Dios Visqui ingac appayvam aplingascama profeta: —Apquiltomjac alhta as enlhitaoc, mongvanquejec ongillaniclha mocjam tingma apponquinomap — alhta apquiltomjac. 4Nasoc lhaja quellhip apquilmaclha tingma apquiltamila apanco, mellhanma mataa aptovasomap tingma apponquinomap. 5Coo sicvisay Dios sicyimtalhnamo, elyasamcojo quellhip apquiltemaclha apancaoc. 6Avanjec alhta quellhip apquilquinayclha actic, asilhtec apquilvitay acyilhna. Avanjec mataa aptoycaoc quellhip, mepqui mataa ayastingam. Avanjec mataa apyinaycaoc quellhip, mepqui mataa ayastingam. Yitnec quellhip apquilalomap, eyquey mataa apyimpeoc. Apquilvita inyicje acyanmongam apquiltimesaycam, quilhvoc mataa colhnanmoc solyayem (covonquepoc solyayem). 7Coo sicvisay Dios sicyimtalhnamo, elyasamcojo quellhip apquiltemaclha apancaoc. 8Elyas sat maa nalhma netin inquilhe, elpatmenta sat yamit, yoyam ongillaniclha mocjam tingma apponquinomap. Copayjiclhac sat evalhoc coo, colhic sat seyaco maa. 9Avanjec mataa apquilquitamsama asoc quellhip, asilhtec mataa apquilvitay. Apquilansaclhec mataa asoc tingma apancaoc quellhip, coo eyca sicvonquipquiscama as asoc. ¿So actomja yi? Ayinyema aptovasomap coo tingma ajac apponquinomap, quellhip eyca apnam tingma apquiltamila apanco. Eycaso sicpayvam sicvisay Dios. 10Melvityejec mataa quellhip yingmin acmamay, paj najan acyilhna ayinyema amyip.#Lv 26.18-20. 11Coo ayinyema mepqui yingmin amyip najan inquilhe, mepqui yingmin apquimjaclha trigo najan uva avjac, najan ayimjaclha olivos. Mepqui mataa acyilhna amyipayc, mepqui sicaa quilvanaa, mepqui apquitcoc apnatoscama, mepqui asoc apancaoc apquiltamjaycam quellhip — alhta aptomjac Dios — nic nat aptomjac profeta.
12Pilapcasquic nic nat, intiyacmec nic nat apquilvalhoc apquillinga amyaa Zorobabel, Josué najan enlhit apquilaymomap. Profeta Hageo ilhnic nat aplingascama, yavamlha eltimjic. 13Aptomjac nic nat mocjam Hageo profeta Dios aplingascama apquilanya: Ellaylhojo sicpayvam sicvisay Dios Visqui apancaoc, siclhalhma mataa quellhip — alhta aptomjac — nic nat aptomjac profeta.
14-15Dios Visqui ingac ayinyema ilhnic nat apquilvascapma Zorobabel, apvisqui co Judá najan apvisqui sacerdotes najan enlhit apquilaymomap, ellaniclhac mocjam tingma apponquinomap, Dios apyimtalhnamo tingma pac.#Esd 5.2. Intomjac nic nat acnim veinticuatro najan piltin sexto, aptimem apvisqui Darío segundo año.
S'ha seleccionat:
HAGEO 1: ENHL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió