LOS HECHOS 24
24
Appeyvescasquiclha Pablo napato yatapvisqui Félix
1Cinco acnim alhta intomjac apvoclho tingma Cesarea apquimja apmamyi sacerdote apvisay Ananías. Apquillhalhmaa alhta napocja apquilyimtalhnamo najan Tértulo aptomja appeyvescasquiclha. Aplhenquic alhta Ananías apvisay Pablo, yoyam eyicpilcacpoc. 2Apcanyacpec alhta Pablo. Yejemoc alhta aptomja Tértulo aptipsa apvisay Pablo:
—Visqui ingac Félix. Inlhenquic nincoo ingvalhoc lhip ayinyema actamilaycam ingvalhoc. Lhip aptomja apyascamco nintemaclha najan sintamilquiscama. 3Inlhenquic nincoo mataa ingvalhoc lhip lhalhma anco, Visqui ingac aptamila. 4Mongiltamjoc nincoo ongilyacsilhma lhip aptamjaycam. Ingyojo sat olhenic anit sicpayvam. 5Ningvitac as enlhit aptomja apmapsom (malha apsoycam ningmasquem). Aptomja mataa Pablo apquillanay quimpocjacme nipyesicsa judíos lhalhma anco. Aptomja Pablo lhama apvisqui apancaoc apquilvisay nazarenos. 6Apquiltamjoc alhta Pablo nincoo etvacsic nintemaclha congne tingma apponquinomap. Ningmec alhta nincoo as enlhit. Ningiltamjoc alhta ongyicpilcojo ayinyema nintemaclha inganco. 7Yejemoc alhta apvaa Lisias singilpilhtetemo apvisqui. Aptingyavoc alhta apyimpejic (apvascapquic) singilnatingvactamo as enlhit. 8Apquilanyacpec alhta elvota apnaclha lhip aptomja apquiltipquiscascam apvisay Pablo. Ilmalhnamojo sat lhip apanco. Eyasamcojoc sat lhip actomja nasoc anco ninlhanma apmapsom Pablo —alhta aptomjac.
9Apnasoc alhta moc apquillhanma judíos actomja nasoc anco amyaa.
10Yejemoc alhta apcanyacpo Pablo elhenic. Aptomjac alhta Pablo:
—Payjeclhec evalhoc, yoyam opeyvasiclha amyaa napato lhip. Ayinyemaclha acyasamco coo, lhip aptomja apquilyicpilquemo as enlhitaoc (judíos) aclhamoclhojo años. 11Apvanquic lhip eyasamcojo. Doce acnim invocmoc sicmiyaclho alhta tingma Jerusalén, yoyam olmalhnac Dios Ingyapam. 12Am alhta jelvitac siyatingmoctamo enlhit congne tingma apponquinomap. Am alhta jelvitac ollanac quimpocjacme nipyesicsa enlhitaoc. Paj najan congne apcaneyquiclhilha. Paj najan nipyesicsa tingma. 13Am colapvancaac as enlhitaoc, yavamlha eltimjic jellhenic. 14Lhama asoc pac olhenic. Alanam coo mataa Ingyapam aptomja ningilyeyjamcaa Dios apancaoc. Acyiplovcasquic mataa amay alhnancoc, apquiltimem apquilvisay enlhitaoc nazarenos. Moyascacmoc coo vaycajac actalhesomalhca singanamaclha (Moisés) najan profetas apnatalhescama. 15Yitnec coo lha siljalhanma napato Dios Ingyapam acno as enlhitaoc, yoyam enalhaticjangvomoc apquilmasquingvaycmo, najan apquilpeyvomo najan apquilmapsomcaa. 16Eyca ayinyemaclha silinlhanacmo mataa, yoyam cotamilam evalhoc mepqui sicsilhnanomalhca napato Dios Ingyapam najan napatavo enlhitaoc.
17“Acvoncaclho alhta sictiyascam moc yoclhilhma. Yejemoc alhta sicmiyantama tingma Jerusalén. Acsantimcasquic alhta solyayem enlhitaoc ajancaoc (judíos). Acmesquic alhta najan asoc ningmescama Dios Ingyapam. 18Yejemoc alhta selvita congne tingma apponquinomap naysicsa siyalhnasayclha eyimpejic. Am alhta elhnam enlhit. Paj alhta najan acyinamam olhma. 19Elvitac alhta napocja judíos co Asia.#Hch 21.17-28. Incaymalhqui inyicje elvotac as enlhitaoc, yoyam jellhenic seltanoncama. 20Intasic najan ellhenic as enlhitaoc apnamcaa asi actemaclha sicmasom siyinmaycam alhta napatavo judíos apquilviscaa apquilpamejitsomap. 21Acvamlha inyicje actemaclha sicyimnatescama sicpayvam siyinmaycam nipyesicsa enlhitaoc. Actomjac alhta coo: “Moyasquiyam apnalhaticjangviyam apquilmasquingvaycmo eyca ayinyemaclha selyicpilquemo quellhip acnim nac jay” —alhta aptomjac Pablo.#Hch 23.6.
22Lhama alhta aplinga Félix. Apyasamcoc alhta amay alhnancoc apquiltemaclha enlhit melyasquiyam tasic amyaa. Aptomjac alhta Félix apquilanya:
—Apvoctac sat ancoc singilpilhtetemo apvisqui Lisias, opeyvasiclhac sat coo amyaa —alhta aptomjac.
23Yejemoc alhta apcanyacpo capitán etamilsic Pablo:
—Itamilquis sat mocjam. Ingyojo sat mataa etyisam acyavataclhojo. Ingyojo sat eltiyaningvojo apnaymacoc —alhta aptomjac apcanya.
24Nalhit acnim alhta apvactamo mocjam Félix najan aptava acvisay Drusila. Co Judea alhta quilvana. Apcanyacpec alhta Pablo, yoyam epamejitsic Félix actemaclha mongyasquiyam Jesucristo. 25Yejemoc alhta apquiltimnasamcaa Pablo. Aplhenquic alhta actemaclha acpeyvomo najan actemaclha ningiltamilcasomalhco inganco najan actemaclha, yoyam ongyicpilcalhca actamongvomlha nelha acnim. Apcacac alhta Félix natamin aplingay. Aptomjac alhta apcanya:
—Ilhing siclho. Am sat ancoc otnajam, ongvanic sat mocjam lhip —alhta aptomjac.
26Apquiljalhne inyicje Félix elhca solyayem. Apcanyam alhta mataa Félix, yoyam epamejitsic Pablo. Am alhta ingyamcoc solyayem Pablo. 27Anit años alhta invocmoc apquilvatesa aptimem yatapvisqui Félix. Yatapvisqui Porcio Festo alhta apyamoncasac. Apquiltamjoc alhta melhenacpoc apmapsom Félix nipyesicsa judíos. Am alhta etipcasac Félix Pablo singilpilhtetomaclha.
S'ha seleccionat:
LOS HECHOS 24: ENHL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió