HIIƂULUITIƐ 7
7
Mɛkisidɛ na laa‐ʋaale deʋei
1Mɛkisidɛ nii é ɣɛni ga Seelɛ̃ɛ ɣalaso gwalai é ga Galagi é ŋɛni pɛ maazu na laa‐ʋaalegi, ta Eeƃɔlɔhɛ̃ɛ te wũini nà ziɣiai ma ɣalasogitiɛ vaazu kɔi zu. É tuuyiɛ looni nà ma. 2Towa ŋɛnii nɛpɛ é ɣɛni Eeƃɔlɔhɛ̃ɛ ya nà gaa wɛɛni su ga puu‐puu é sei‐zu ɣile‐gilegi ʋe zéea. Mamaa wũgi pa ná daa‐zeigi zu‐wulo‐zuvɛ ɣa ga tele‐bo‐tuoi maɣalasogi. Na ɣa wulo na su tɔ wɔnɔ ƃalaa ga Seelɛ̃ɛ ɣalasogi, na ɣa ga zii‐lai maɣalasogi. 3Dée ʋaa lɛ ŋɛni ba ta kéea ʋaa ɔ́ nɔ ɣɛ ga mazuwu ziɣizu ɣɛ ma. Na ɣa ɣɛɛ na ná ŋeteai lɔɔ‐zei‐zu lɛ ŋɛni ma ɔ́ nɔ ɣɛ ga zɛʋui maʋaa wɛ̃ɛ ge ɣɛ ma. Kɛ̀ tei tɔwɔ maʋaa wuloai ga Gala dui, towaa yɛ ga laa‐ʋaalegi wɔlɔ‐wɔlɔ ta wɔlɔ‐wɔlɔ.
4A wɛlɛ lɛɛ velei va é la ga nu ƃakpa! Eeƃɔlɔhɛ̃ɛ nii é ɣɛni ga numaitiɛ te ɣeea walai, ŋɛnii nà sɔlɔ woni kɔi zu é gaa wɛɛni su ga puu‐puu é sei‐zu ɣile‐gile fe zéea. 5Tɔwɔ niitiɛ te ga Liiʋai manu zuwuitiɛ te ga numai niitiɛ ta laa‐ʋaale tii maa zɔlɔ wo, deʋe ɣa te ya tɔgi zu ga numaa weli gaa yìɛ wɛɛ su ga puu‐puu tiɛ sei‐zu ɣile‐gilegi wulo te ya. Nà wɔ su‐wulo‐zu ɣa ga tiɛ kulo te vaitiɛ ya, velei ƃalaa natiɛ ta ƃalaa te la ga Eeƃɔlɔhɛ̃ɛ manu zuwui ta. 6Kɛ̀ zunui nii ɛ́ lɛ ŋɛni ga te manu zuwui ta é Eeƃɔlɔhɛ̃ɛ weligi puu keleitiɛ zɔlɔ woni zéea. É tuuyiɛ loo Eeƃɔlɔhɛ̃ɛ nii ma ki‐togitiɛ wogɛi la. 7Nui nii to‐su wɔɔlɔi tuuyiɛ loo ʋai bɛ́ nui nii vɛ toai bu sakpe gɛ lɛ maʋai zu. 8Nii zu ná dɛi taitiɛ ta numaa weli puu kelei zɔlɔ wo te ya ta ga numaitiɛ saa ʋai ta te va. Kɛ̀ na zu ná dɛi mazeele woo ʋeevɛ Gala kɔlɔi zu ga nui ɔ́ sɔlɔ wo tɔ ga nui nii yá yɛ ŋetea wɔ. 9Nu ɣa ʋɔlɔ ƃalaa a bo ga Liiʋai ɣagi nii yá numaa weli puu kelei zɔlɔ wo te ya tɔ ƃalaa é weligi puu kelei ʋeeni Mɛkisidɛ ya Eeƃɔlɔhɛ̃ɛ zaala zu, 10toku ge zei ga Liiʋai ƃɔɔ ɣɛni mama gwɔlɔ Eeƃɔlɔhɛ̃ɛ wuu zu nà ƃɔga Mɛkisidɛ tiɛ wũi.
11Liiʋai nu zuwuitiɛ ta laa‐ʋaaledai yee wu nɔ ɣa tɔgi ʋeea na. Nu ɣɛɛ ʋai ga nui maa‐wulo‐zu lɛ ɣɛɛ maʋaa va, è ɣɛ ná maa zɔlɔ woni laa‐ʋaaledai nii zaala zu, zɛƃɛi sa ɔ́ kɛ na wulu wɔnɔ laa‐ʋaale ta ƃɔnɔ maƃala ɣɛ nu ma ga é wu ziɣi é ɣɛ Mɛkisidɛ na laa‐ʋaaledai maleʋei zu é wulo nii wulu yá ɣɛ Eelɔ̃ na dɔ laa‐ʋaaledai maleʋei zu? 12Toku ge zei ga ani maa‐ʋeli faa ɣa ɣɛ na laa‐ʋaale fai zu, pagɛ maa‐ʋeli faa ɣɛ tɔgi zu ƃalaa pɛ. 13Tɔwɔ de maliɣii Ziizɛi nii fai wogɛi é vile ba é ɣɛni ga zii ta ƃɔnɔ kuloai zii niitiɛ zu te ta nɛpɛ gɛ lɛ tii ɣɛɛni Gala zeke‐kɛɛ vanagi ma, na ɣa ga laa‐ʋaalegitiɛ ta lii. 14Gaa wodovɛ ga de maliɣii wuloni Juda manu zuwui zu. Tɔwɔ Mooze lɛ faa ta nɛpɛ boni ɔ́ vile laa‐ʋaale faa va nu zuwui na zu. 15Nii wala ɣaa ɣa wodo ƃalaa wɔnɔ ga ani laa‐ʋaale ta ƃɔnɔ ka wu ziɣi na Mɛkisidɛ na laa‐ʋaaledai mawo‐kɔ̃ɔgi zu. 16Na ɣa ga nui nii é ɣɛɛ ga laa‐ʋaale, tɔwɔ ná laa‐ʋaale fai lɛ wuloni deʋei nii zu tɔgi daa é vile nu ƃuse mazuwu va. Kɛ̀ to mu zɛʋui nii su lɛ ŋala‐ŋalaga kuloai na maɣaa‐ƃai zaala zu. 17Ƃɔvɛlaale seele woo ʋeevɛ manui ʋaa ma mawoi ga
“Yà ga laa‐ʋaale wɔlɔ‐wɔlɔ ta wɔlɔ‐wɔlɔ.
Yà laa‐ʋaale fai ɣa ɣɛ Mɛkisidɛ na laa―
ʋaaledai maleʋei zu.”
18A lii na ga pelei gila su vele, deʋe maa wũgi ziɣivɛ sa ba é la ga tee, toku ge zei maʋai ʋii‐ƃɛɛ ʋai va ta tɔnɔ vala fai ba. 19Ƃɔvɛlaale tɔgi lɛ faa ta nɛpɛ kɛɛni ɔ́ kɛ maa‐wulo‐zu ɔ́ ƃe ɣɛɛzu nu va. A lii na wɔnɔ ga pelei zɔi zu vele, ki‐to ta maʋaa maala levevɛ sa pagɛi é leve mamaa wũgi va. Ki‐togi na zaala zu ɣa da lɔtɔ da Gala ba.
20Tɔwɔ ɛ́ lɛ ŋɛni ga fai nii koto‐leve ʋaa lɛ ŋɛni maʋaa va. 21Numai niitiɛ te ɣɛɛni ga laa‐ʋaalega wɔlɔ te vilini malii zu koto‐leve ʋaa lɛ ŋɛni ba. Kɛ̀ laa‐ʋaalegi nii loni ná koto‐leve‐woga maazu. È ɣɛ velei ponɛi la Gala kɔlɔi zu mawoi ga,
“De maliɣii Gala ge woto levea yíɛ ɣɛ tea,
‘Yà ga laa‐ʋaale wɔlɔ‐wɔlɔ ta wɔlɔ‐wɔlɔ.’
Ɛ́ lɛ sa ná ki‐gaa‐ziɛi nii maa ʋeliga.”
22Nii wɔ ka é Ziizɛ ɣɛɛ ga nui é ƃaazu deʋei nii maazu pagɛi é leve mawɔlɔ‐zaɣagi va. 23Laa‐ʋaale maa wũgitiɛ te lamai ɣɛ ta wuwui zu, ƃɔvɛlaale saa ɔ́ kɛ te ƃe ge leve yɛga va ta lii zu wɔ. 24Kɛ̀ Ziizɛ na dɛi towaa yɛ laa‐ʋaaledai zu wɔ, ƃɔvɛlaale towaa yɛ ŋetea wɔlɔ‐wɔlɔ ta wɔlɔ‐wɔlɔ. 25Nii mazaƃui ma zobo ka bɛ́ ga ɣee nɛpɛ ga é numai niitiɛ valo ta lɔtɔ Gala ba saala zu. Toku ge zei ga tɔ ŋetea wɔ ga yíɛ te vaa vee ʋe Gala bɛ.
26Solowogɛi ɣɛ de ʋaa ma ga de na ɣavele laa‐ʋaale gwalai zɔlɔ wo. Na ɣa ga nii maa wuai, faa lɛ yɛni ma, ɛ́ lɛ wɔtɔni, kuloai faa yowũ‐ɣɛɛ vea va, tɛi ga gee wɔlɔgi maazu vele. 27È ɣɛ velei laa‐ʋaale gwalaitiɛ ta ɣɛ zalaɣa wulozu la ga ɣee nɛpɛ, mamaa wũgi pa ta kulo dɛ ta ƃɔɔ ta ʋaa yowũi ʋaa ma. Na wului te kulo numaitiɛ ta ʋaa yowũi ʋaa ma. Ziizɛ na dɛi nà maƃala lɛ ma. É zalaɣai wulola ɣɛɛni nɔ ɣilekpu, nà wɔ ge kulo‐ɣɛɛ wo. Na ɣa ga tei é ƃɔɔ wuloni ga zalaɣa. 28Ƃɔɔƃɔɔ su tɔgi laa woi numai niitiɛ wuloni ga te ɣɛ ga laa‐ʋaale gwalaa. Te ɣɛni ga zobo‐bala‐bɛ vea. Kɛ̀ koto‐leve woi nii é tɔgi wulu ɣaa ƃelani é Gala dui wuloni nii é ɣɛɛni ga nui nii maa‐wulo‐zu lɛ maʋaa va wɔlɔ‐wɔlɔ.
S'ha seleccionat:
HIIƂULUITIƐ 7: DN1971
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Loma New Testament © British and Foreign Bible Society, 1971.