3JƆ̃ 1
1
Daali‐mai
1Nài gè ga Gala pɛlɛ lo‐tuoi, gà kɔlɔi nii wonɛzu ẁõila nui Geea wɔ nii ẁõiyai la gaamai mavele ma.
2Wõìla nui, gà Gala felizu ga fai pɛ ge ƃɛtɛ è ya ga pagɔ, na ɣa ɣɛɛ na è lɔtɔ zu wodo. Gè kwɛ̃ni ga è yɛʋui maʋaa ƃɛtɛvɛ ga pagɔ. 3Ƃɔvɛlaale gè kuu‐zu‐nɛɛ wuloni ga kpakpaa toku ge zei ga tei de vaitiɛ taniga te vaani, gaamai é yà ŋeteai zu te mazeele woo ʋeeni. Ƃɔɔƃɔɔ su è vilegɛ gaamai wulu. 4Kuu‐zu‐nɛɛ ƃakpa ta nɛpɛ gɛ lɛ zooga ɔ́ ɣɛ zèea ɔ́ leve nii va. Na ɣa ga gìɛ mɛni ga dèaitiɛ te vilegɛ gaamai wulu.
Geea lɛɛ ʋai ná nu ƃɔɔ ʋai zu
5Wõìla nui, yà tii nɛpɛ kɛɛ na de vaitiɛ vɛ, niitiɛ te ga wɛ̃ɛya natiɛ ta dɔ vele ƃɔɔƃɔɔ ma, towaa è ɣɛ ga nui nii nu ɣa laa la kɛ́ɛ ʋai zu. 6Natiɛ ta ga de vai niitiɛ te yà wõilai mazeele woo ʋeea Gala pɛlɛi ɣaazu. Yà te leve na ta ziɛi ma, nà ɣa ɣɛ ga faa vagɔ ga velei solowogɛi la Gala na tii ma. 7Toku ge zei ga te wu ziɣia Kolai mazaƃu ma. Tɔwɔ tɛ lɛ yee zeini ŋɛni ta nɛpɛ bu Gala tuo‐wo tala veaitiɛ ya. 8Na ma kɛni a da kpɔ‐ba wo ga nà ɣavele veaitiɛ, kɛɛ ʋaa ma a de ɣɛ ga te vai niitiɛ ta tiɛni te tii ɣɛɛzu gaamai mavele ma.
To fai Diatɔlɔfii la
9Gè faa ta wonɛɛ Gala pɛlɛi wɔ. Kɛ̀ Diatɔlɔfii nii é wõini é ƃɔɔ ziɣi ga to‐tuo ɛ́ lɛ yee zeini bù to‐suvɛ ʋaa ma. 10Na ʋaa ma ani gà vaa na, nii é kɛɛzu yíɛ titi faa ƃakpai zu wulo ga dàa ga yowũa, gà maʋaa wulo kɛnɛ ma. Nà lɛ wɔnɔ zíi laani. Tɔ ɣagi ɛ́ lɛ kɛɛzu ɔ́ yee zei de vaitiɛ wu. Niitiɛ wɔnɔ te wõini te yee zei te wu, tɔ natiɛ ƃe tevezu kɛ́ɛ ʋaa va. Tɔ te wulozu Gala pɛlɛi wu.
Kwena‐bo pagɔi é vile Dimitilia va
11Wõìla nui, mɛ lɛ tuƃo vele yowũ mawo‐kɔ̃ɔ kɛ, kɛ̀ faa vagɔ mawo‐kɔ̃ɔ kɛ. Nui é faa vagɔ ɣɛɛzu tɔ ga Gala na dɔ. Nui é tuƃo vele yowũ wulozu ɛ́ dɛ Gala pɛtɛni. 12Dimitilia mazeele woi wulovɛ nu pɛ da, kuloai gaamai tɔ ɣagi zu. Gà mazeele woo ʋeezu ƃalaa pɛ. Tɔwɔ è kwɛ̃ni ga nà seele woi ɣa ga gaama.
Daali‐ma ɣaa‐ƃelagi
13Faa lamaa ɣa zèea ga gè ponɛ è wɔ. Kɛ̀ pagɛ to mu gè mɛ lɛ kɔlɔ wonɛ ga kɔlɔ‐wonɛ ƃaku ta kɔlɔ‐wonɛ yiɛ. 14Kìgi ɣa na ga su mɛ lɛ wooza gè è vɛtɛ. Na ɣa ɣɛɛ na da yɛpɛ da ya ɣaazu ma. 15Zii‐laa ɣa ɣɛ è ya fãa. De vaitiɛ te è luoni. Gè de vaitiɛ luo— te ƃɔgɔpɛ.
S'ha seleccionat:
3JƆ̃ 1: DN1971
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Loma New Testament © British and Foreign Bible Society, 1971.