Yakobo 1
1
Okulamusa
1Yakobo, omuddu wa Katonda era owa Mukama waffe Yesu Kristo, eri ebika ekkumi n'ebibiri (12) ebyasaasaana, mbalamusizza.#1 Peet 1:1, Bik 15:23
Okugezesa okukkiriza
2Mulowoozenga byonna okuba essanyu, ab'oluganda, bwe munaagwanga mu kukemebwa okutali kumu;#Bar 5:3-5, 1 Peet 1:6 3nga mutegeera ng'okugezebwa kw'okukkiriza kwammwe kuleeta okugumiikiriza.#1 Peet 1:7 4Era omulimu gw'okugumiikiriza gutuukirirenga, mulyoke mubeere abaatuukirira, abalina byonna, abataweebuuka mu kigambo kyonna.
5Naye oba ng'omuntu yenna ku mmwe aweebuuka mu magezi, asabenga Katonda atamma awa bonna so takayuka; era galimuweebwa.#Nge 2:3-6 6Naye asabenga mu kukkiriza, nga taliiko ky'abuusabuusa, kubanga abuusabuusa afaanana ng'ejjengo ery'ennyanja eritwalibwa empewo ne lisuukundibwa.#Mak 11:24 7Kubanga omuntu oyo talowoozanga ng'aliweebwa ekintu kyonna okuva eri Mukama waffe; 8omuntu ow'emyoyo ebiri, atanywera mu makubo ge gonna.
Omwavu n'Omugagga
9Naye ow'oluganda omwavu yeenyumirizenga olw'obukulu bwe;#Yak 2:5 10era n'omugagga yeenyumirizenga olw'okutoowazibwa kwe, kubanga aliggwaawo ng'ekimuli ky'omuddo.#1 Peet 1:24 11Kubanga enjuba evaayo n'omusana omungi n'ewotosa omuddo; n'ekimuli kyagwo ne kigwa n'obulungi bw'ekifaananyi kyagwo ne bubula, era n'omugagga bw'atyo bw'aliwotoka mu kutambula kwe.#Is 40:6,7
Okukemebwa n'Okugezesebwa
12Alina omukisa omuntu agumiikiriza okukemebwa, kubanga bw'alimala okusiimibwa aliweebwa engule ey'obulamu, Mukama waffe gye yasuubiza abamwagala.#Dan 12:12, 2 Tim 4:8, 1 Peet 5:4, 1 Kol 9:25, Kub 2:10 13Omuntu yenna bw'akemebwanga, tayogeranga nti Katonda ye ankema, kubanga Katonda takemebwa na bubi, era ye yennyini takema muntu yenna. 14Naye buli muntu akemebwa, ng'awalulwa okwegomba kwe ye n'asendebwasendebwa.#Bar 7:7-10 15Okwegomba okwo ne kulyoka kuba olubuto ne kuzaala okwonoona, n'okwonoona okwo, bwe kumala okukula, ne kuzaala okufa. 16Temwerimbalimbanga, baganda bange abaagalwa. 17Buli kirabo ekirungi, na buli kitone ekituukirivu kiva waggulu, nga kikka okuva eri Kitaffe ow'ebyaka, atayinza kuba na kufuukafuuka newakubadde ekisiikirize eky'okukyuka.#1 Yok 1:5, Mat 7:11 18Olw'okuteesa kwe yatuzaala n'ekigambo eky'amazima, tulyoke tubeere ng'omwaka omubereberye ogw'ebitonde bye.#Yok 1:13, 1 Peet 1:23
Okuwulira n'Okukola
19Mumanye kino, ab'oluganda abaagalwa, buli muntu abeerenga mwangu wa kuwulira, alwengawo okwogera, alwengawo okusunguwala.#Mub 7:9 20Kubanga obusungu bw'omuntu tebukola butuukirivu bwa Katonda.#Bef 4:26 21Kale muteekenga wala obugwagwa bwonna n'obubi obusukkiridde, mutoolenga n'obuwombeefu ekigambo ekisigibwa ekiyinza okulokola obulamu bwammwe.#Bak 3:8, 1 Peet 2:1 22Naye mubeerenga bakozi ba kigambo, so si bawulizi buwulizi, nga mwerimbalimba.#Mat 7:26, Bar 2:13 23Kubanga omuntu yenna bw'aba omuwulizi w'ekigambo, so nga si mukozi, oyo afaanana ng'omuntu eyeeraba amaaso ag'obuzaaliranwa bwe mu ndabirwamu; 24kubanga yeeraba n'agenda, amangu ago ne yeerabira bw'afaananye. 25Naye atunula mu mateeka amatuukirivu ag'eddembe n'aganyiikiriramu, nga si muwulizi eyeerabira naye mukozi akola, oyo anaaweebwanga omukisa mu kukola kwe.#Yak 2:12, Bar 8:2, Yok 13:17 26Omuntu yenna bwe yeerowooza nga wa ddiini, bw'ataziyiza lulimi lwe, naye nga yeerimba omutima gwe, eddiini y'oyo teriiko kyegasa.#Zab 34:13 27Eddiini ennongoofu eteriimu kko mu maaso ga Katonda Kitaffe ye eno, okulambulanga abafuuzi ne bannamwandu mu bunaku bwabwe, n'okwekuumanga obutaba na mabala ag'omu nsi.
All rights are reserved to the Bible Society of Uganda.