Exodus 3
3
God-im Ququaġmagu Moses
1Uvlut iḷaŋanni Moses qaunaksriḷḷaġmi imnaiŋiñiglu nagruliŋiñiglu aaparuaġmi Jethro-m, aŋaiyyuliqsiqpauruam Midian-mi, aullatiŋagaich niġrutit qaaŋiqł̣ugu nunagluktuaq aasii Sinai-mukłuni, God-im iġġiŋanun. 2#Ac 7.30-34.Tavrani isaġulgata Atanġum niptaġvigiŋagaa ignikun qitqaniñ uqpium. Moses-gum tautukkaa uqpik ikualaruaq aglaan igniġum ikiŋiññiġaa. 3“Uvvauna qanuq,” isumaruq. “Summan una uqpik ikualaruam ikiŋitpauŋ? Qalliḷaaġluŋa tautugiaġaqsigiga.”
4Atanġum tautukkamiuŋ Moses qalliruaq, ququaġaa iḷuaniñ uqpium uqallakłuni, “Moses! Moses!”
Kiugaa, “Ii, uvaniittuŋa.”
5God uqallaktuq, “Qalliḷaavsaaġnak! Aluġutaiġiñ, qanukkii makitarutin salumaruami ilaaguaqtauŋaruami nunami. 6God-iŋa aapakpich, maŋŋuġiraqpich, Abraham-gum, Isaac-gum, Jacob-guvlu.” Tavraasii Moses-gum talugaa kiiñani, qanukkii iqsivḷuni qiñiġniaġumiuŋ God-auruaq.
7Tavraasii Ataniq uqallaktuq, “Qiñiŋagitka aŋalamaqłuktauruat iñugiratka Egypt-mi; tusaaŋagitka iiqtuaġutaat nagliksaaŋaiġukłutiŋ, iḷuñŋusuutigigitka nagliksaaġutiŋich, 8aasii uvva qairuŋa atqaqłuŋa qiḷagmiñ annautisukługich Egypt-miuguruaniñ suli aullautisukługich Egypt-miñ inituruamun nunamun, nunalluatamun naurisuqtuamun, paŋmami ukua nayuqtaŋannun; Canaan-miut, Hit-miut, Amor-miut, Periz-miut, Hiv-miut, Jebus-miullu. 9Tusaapiaŋagiga iiqtuaġutaat iñugiraġma, suli qiñiġitka Egypt-miut iñugiratka nagliksaaqtitaġimmatigik. 10Ki, utiġiñ Egypt-mun. Aasii uqallautilugu Pharaoh aullaqtitqulugich iñutka Egypt-miñ.”
11Aglaan Moses uqallaktuq God-mun, “Uvaŋauvaŋa iñugruiññauruŋa. Qanuġluŋa Pharaoh-mugniaqpik aasii Israel-gum kiŋuvaaŋich aullautisuglugich Egypt-miñ?”
12God-im kiugaa, “Itqatiginiaġikpiñ, aasii qaġġisigupkich iñuich Egypt-miñ, nanġautiqaġniaqtutin uvamnun uumani iġġimi. Taamna nalupqinaiġutauniaqtuq uvamnun tiliŋatilaaġnik.”
13 #
Ex 6.2, 3. Aglaan Moses kiugaa, “Israel-gum kiŋuvaaŋich ullakkupkich aasii uqallautilugich, ‘God-iŋata maŋŋuuvsi tiligaaŋa ilivsiññun,’ apiġiniaġaanŋa, ‘Kimik atiqaqpa?’ Qanuq aasii kiuniaqpik?”
14 #
Rev 1.4, 8. God uqallaktuq, “Uvaŋa uvaŋauruŋa. Inna uqallautiruksraġigitin: ‘Ilaata Uvaŋauruam tiliŋagaaŋa ilivsiññun.’ 15Uqallautisaġitin Israel-gum kiŋuvaaŋich Uvaŋa, Atanġuruaŋa, God-iŋat maŋŋuuvsi, Abraham-gum, Isaac-gum, Jacob-guvlu, tiliŋaniḷutin iliŋiññun. Tavra taamna atiġa isuitchuamun; taaptumiŋa iluqaġmiŋ kiŋuvaaġiich taiguqtaksraġigaanŋa. 16Aullaġlutin katitchaqtukkich aullarriŋich Israel aasii uqallautilugich uvaŋa, Atanġum, God-iŋata maŋŋuuŋisa, God-iŋa Abraham, Isaac, Jacob-guvlu, niptaġniḷuŋa iliŋnun. Uqallautilugiḷḷu ullaŋaniḷugich uvamnun suli tautuŋaniḷugich qanuq Egypt-miunun aŋalatchiqsilaaŋich. 17Sivunniŋaruŋa aullautisukługich Egypt-miñ nagliksaaqtitauvianniñ, nunagiksuamun, naurisuqtuamullu nunaŋannun Canaan-miut, Hit-miut, Amor-miut, Periz-miut, Hiv-miut, Jebus-miullu.
18“Iñugiraġma naalaġniñiaġaatin qanuq uqautigupkich. Tavra ullautiruksraurutin piqatigilugich aullarriŋich Israel Pharaoh-mun aasii uqallautilugu, ‘Ataniq, God-iŋat Hebrew-guruat, iḷitchuġipkaŋaruq uvaptinnun. Tavraasii aullaqtitchigut, piŋasuni uvluni iglauluta nunagluktuamun aitchuiyumaugut ikipkaiḷuta Ataniġmun, God-iptinnun.’ 19Iḷisimaruŋa Pharaoh-m aullaqtitchumiñaitkaasi nunurirauŋisuaġumi. 20Aglaan suaŋŋatiga atuġlugu tatavsaġniaġiga Egypt tatavrualatchiḷugich. Taamna pianikpan aullaqtinniaġaasi.
21 #
Ex 12.35, 36. “Egypt-miut qiksigiliġniaġaasi, aullaġuvsi aullaŋitchumausi tainnaġruiññaq sumik tigumiaġaluaġnasi. 22Israel-gum kiŋuvaaŋich aġnapayaaŋich ullautiyumaut Egypt-miunun siḷallimignun aġnanullu iñuuniaqtuanun iglumigni aasii annuġaaksritqulutiŋ qiñiyunaqsautiniglu kaviqsuaniglu qatiqtuaniglu manigñik piḷianik. Israel-gum kiŋuvaaŋich atipkaġniaġaich tamatkua iġñimignullu paniutimignullu aasii aullautiniaġaich umialgutiŋich Egypt-miut.”
S'ha seleccionat:
Exodus 3: INUPIAQ
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)