Romanos 4
4
Abrahampa ijãada
1Kꞌĩsiadáma tai judiorã chonaarãwedapema Abrahampa oodade. ¿Kꞌãata oojima Tachi Akꞌõrepa iru pia akꞌɨmerã? 2Tachi Akꞌõrepa jaradakꞌa jõmaweda ooda paara Abrahampa, ichia jarakꞌaji awaraarãmaa: “Tachi Akꞌõrepa mɨ pia akꞌɨpari ne–inaa oopari perã iru–itꞌee.” Mamĩda Tachi Akꞌõre–itꞌee mãga jara–e pakꞌaji, ne–inaa jõmaweda oo–e pada perã Akꞌõrepa kꞌinia badakꞌa. Mãga bɨta, ¿sãapꞌeda Tachi Akꞌõrepa Abraham pia akꞌɨjima? 3Akꞌõre Ũraa pꞌãdade jara bɨ:
‘Abrahampa Tachi Akꞌõrepa jarada ijãaji. Maperã Tachi Akꞌõrepa iru pia akꞌɨpachi.’ (Génesis 15.6)
4Kꞌĩsiadáma nãgɨde. Eperã mimiakꞌãri awaraa pari, ma mimia aupapꞌeda, ichi pꞌaratꞌa iidinapari mimia chiparimaa. Mãgá tachia oopata pꞌaratꞌa jitadaitꞌee. 5Mamĩda mãga–e Tachi Akꞌõre ome. Irua eperã pia akꞌɨ–e, ma eperãpa mãga iidi bairã ichia ne–inaa pia oopari kꞌaurepa. Jĩpꞌa pꞌekꞌau kꞌachia oopataarã pia akꞌɨpari, mãɨrãpa wãara ijãadakꞌãri irua ãchia pꞌekꞌau kꞌachia oopata wẽpapiitꞌee. 6Chonaarãweda Rey Davidpa ichiaba kꞌawaji Akꞌõrepa eperã pꞌekꞌau kꞌachia wẽe akꞌɨpari, ne–inaa pia oo–e bɨ mĩda iru–itꞌee. Jaraji mãgee eperã tꞌãri o–ĩa bapari, Akꞌõrepa iru mãgá kꞌaripapari perã. Mãgaji:
7‘Pꞌekꞌau kꞌachia oopataarã o–ĩa pꞌanapata Tachi Akꞌõrepa ãchi pꞌekꞌau kꞌachia ãyaa bɨkꞌãri mãikꞌaapa wẽpapikꞌãri. 8Mãgee eperã o–ĩa bapari Tachi Akꞌõrepa iru pꞌekꞌau kꞌachia wẽe akꞌɨkꞌãri.’ (Salmos 32.1-2)
9Davidpa mãga jarada perã, ¿kꞌãata jaradaima? ¿Tachi Akꞌõrepa wẽpapiikꞌã tauchaa iru beerãpa pꞌekꞌau kꞌachia oopatapꞌedaa aupai? Tauchaa wẽe beerãpa pꞌekꞌau kꞌachia oopatapꞌedaa aukꞌa wẽpapiitꞌee, o–ĩa pꞌanapataadamerã Davidpa jaradakꞌa. Waya pedeedáma Tachi Akꞌõre Ũraa pꞌãdade jara bɨ:
‘Abrahampa Tachi Akꞌõrepa jarada ijãaji. Maperã Tachi Akꞌõrepa iru pia akꞌɨpachi.’ (Génesis 15.6)
10Tachi Akꞌõrepa mãga jarakꞌãri, Abrahampa atꞌãri ichi kꞌapꞌɨade tauchaa bɨ–e baji. 11Ma tꞌẽepaita Abrahampa mãga ooji. Mãga ookꞌãri, akꞌɨpiji ichia wãara ijãa bɨ Tachi Akꞌõrepa iru kꞌachia wẽe akꞌɨda, ma ijãa bɨ kꞌaurepa. Tachi Akꞌõrepa Abraham mãgá akꞌɨda perã ma tauchaa bɨi naaweda, kꞌawa pꞌanɨ tauchaa wẽe beerã aukꞌa pꞌekꞌau kꞌachia wẽe pꞌaneedai Tachi Akꞌõre kꞌĩrapite, ijãadakꞌãri Abrahampa ijãadakꞌa. Mãgá ijãadakꞌãri, Abraham warrarãkꞌa padaipata, ãchi kꞌapꞌɨade tauchaa wẽe pꞌanɨ mĩda. 12Jõdee tauchaa iru beerã ichiaba Abraham warrarã. Mãga pꞌanɨ–e tauchaa iru pꞌanadairã ãchi kꞌapꞌɨadepai. Jĩpꞌa mãga pꞌanɨ ijãapata perã tai judiorã chonaarãwedapema Abrahampa ijãadakꞌa, ichi waide tauchaa wẽe bɨde.
Tachi Akꞌõrepa jaradakꞌa oopari ijãapataarã ome
13Akꞌõrepa ichi ũraa pꞌãpii naaweda, Abrahammaa jaraji irudeepa uchiadapꞌedaarãpa Tachi Akꞌõrepa ooda jõmaweda iru pꞌaneedaitꞌee ãchi jua ekꞌari, mãikꞌaapa ãchi kꞌaurepa Tachi Akꞌõrepa na pꞌekꞌau eujãdepemaarã pia akꞌɨitꞌee. Akꞌõrepa mãga jara–e paji Abrahampa ne–inaa oo bada perã iru ũraade jaradakꞌa. Mãga jaraji Abrahampa irude ijãa bada perã. Maperãpɨ Abraham pꞌekꞌau kꞌachia wẽe baji iru kꞌĩrapite. 14Tachi Akꞌõrepa mãga jarada paara ichi ũraa pꞌãdade jara bɨkꞌa oopataarãmaa aupai, ¿kꞌãare–itꞌee irude ijãadaima? Mãga bada paara, oo–e pakꞌaji ichia jaradakꞌa Abrahammaa. Mamĩda mãga–e. Tachi Akꞌõrepa kꞌawa bɨ eperã apidaapa pꞌoyaa ooda–e jõmaweda iru ũraa pꞌãdade jara bɨkꞌa. 15Ma awara eperãarãpa ooda–e pakꞌãri ma ũraa pꞌãdade jara bɨkꞌa, ne–inaa kꞌachia oopata. Mãgá Tachi Akꞌõre kꞌĩraupipata mãikꞌaapa ma kꞌaurepa atuapata. Ma ũraa wẽ–e pada paara, kꞌawada–e pakꞌaji ãchia ne–inaa kꞌachia oo pꞌanɨ.
16Ma jõma jara aupadade kꞌĩsiadakꞌãri, kꞌawa pꞌanɨ Tachi Akꞌõrepa jaradakꞌa, ichia Abrahamdeepa uchiadapꞌedaarã pia akꞌɨpariitꞌee, ãrapa ijãapata perã Abrahampa ijãadakꞌa; ma kꞌaurepapai. Maperã kꞌawa pꞌanɨ Abraham jõmaarã akꞌõchona, judiorã akꞌõchona mãikꞌaapa judio–eerã akꞌõchona, ijãadakꞌãri irua ijãadakꞌa. 17Tachi Akꞌõrepa Abrahammaa jara bɨ ichi ũraa pꞌãdade:
‘Mɨa pɨ eujã awara–awaraadepemaarã akꞌõchona papiitꞌee.’ (Génesis 17.5)
Mãgá kꞌawa pꞌanɨ Tachi Akꞌõre kꞌĩrapite Abraham tachi ijãapataarã akꞌõchona, irudeepa uchiada–e paji mĩda. Abrahampa ijãapachi Tachi Akꞌõrepa piudapꞌedaarã chokꞌai pꞌirabaipipari. Ichiaba ijãapachi Akꞌõrépata jarakꞌãri ichia ooitꞌee bɨ, mãga ooitꞌee, waide oo–e bɨ mĩda.
18-19Abraham perá cien años iru baji Tachi Akꞌõrepa jarakꞌãri:
‘Pɨdeepa uchiadaitꞌeerã cho–kꞌara paitꞌee.’ (Génesis 15.5)
Mãgá taarã–ee piutꞌee baji mãikꞌaapa chi wẽra Sara, chõtrãa bɨta, warra tꞌokꞌaa paji mĩda, Abrahampa ijãaji Tachi Akꞌõrepa jarada; chi wẽrapa warra tꞌoitꞌee. Mãga ijãaji kꞌawa bada perã Tachi Akꞌõrepa ichita oopari ichia jara bɨkꞌa. Mãgá ijãada perã, Akꞌõrepa Abraham awara–awaraa eujãdepemaarã akꞌõchona papiji. 20Abrahampa Tachi Akꞌõrepa jarada ijãa amaa–e paji mãikꞌaapa awaraa ne–inaa kꞌĩsia–e paji. Jĩpꞌa ijãaji Tachi Akꞌõrepa ooitꞌee ichia jaradakꞌa. Maperã Abraham ɨtꞌaa tꞌɨ̃ji Tachi Akꞌõremaa 21jaraitꞌee iruta jõmaarã kꞌãyaara waibɨara bɨ. Kꞌawaji ne–inaa wẽ–e Tachi Akꞌõrepa pꞌoyaa ookꞌaa. 22Maperãpɨ Tachi Akꞌõre Ũraa pꞌãdade jara bɨ:
‘Abrahampa Tachi Akꞌõrepa jarada ijãaji. Maperã Tachi Akꞌõrepa iru pia akꞌɨpachi.’ (Génesis 15.6)
23Tachi Akꞌõrepa mãga jara–e paji Abraham–itꞌee aupai. 24Ichiaba mãga jaraji tachi–itꞌee, irude ijãapata perã. Iruata Tachi Waibɨa Jesucristo chokꞌai pꞌirabaipiji. 25Tachi Akꞌõrepa Jesucristo pëiji piumerã tachia pꞌekꞌau kꞌachia oopata kꞌaurepa. Maapꞌeda iru chokꞌai pꞌirabaipiji tachi pꞌekꞌau kꞌachia wẽe pꞌanadamerã iru kꞌĩrapite.
S'ha seleccionat:
Romanos 4: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.