Romanos 14
14
Awaraa ijãapataarã ãpɨte pedee kꞌachia jaradaikꞌaraa bɨ
1Cristode ijãapari aukꞌa parãkꞌa ijãa–e bɨ pɨrã, pia akꞌɨ́tɨ, awaraa ijãapataarã akꞌɨpatakꞌa. ¿Irua mãgá ijãa–e bɨpaa atꞌãri Akꞌõre Ũraa pia kꞌawa–e bairã? Mapa iru ome aupedeedaikꞌaraa bɨ. 2Abaapa ijãai chikꞌo kꞌĩra tꞌãdoo kꞌoipia bɨ. Jõdee chi pia kꞌawa–e bɨpa kꞌĩsiai nechiara kꞌoikꞌaraa bɨ, ma kꞌaurepa Tachi Akꞌõrepa iru pia akꞌɨ–e pai jĩakꞌaapa. 3Maperã ma chikꞌo kꞌĩra tꞌãdoo kꞌoparipa pia–ee akꞌɨikꞌaraa bɨ ma nechiara kꞌokꞌaa bɨ. Jõdee ma nechiara kꞌokꞌaa bɨpa kꞌachia pedeeikꞌaraa bɨ chi apema ãpɨte. Mãga oodaikꞌaraa bɨ Tachi Akꞌõrepa ãchi aukꞌa pia akꞌɨpari perã Cristode ijãa pꞌanɨ kꞌaurepa. 4¿Kꞌaipa pɨ bɨjima chĩara mimiapari akꞌɨmerã jaraitꞌee irua oopata pia wa kꞌachia? Mimia chiparipapai ichi jua ekꞌari mimiapataarã mãgá akꞌɨipia bɨ. Mãga pɨkꞌa bɨ Cristo ichideerã ome. Tachi Waibɨa Cristopata ichideerãpa oopata akꞌɨpari jaraitꞌee pia wa kꞌachia. Ichiata ichideerãmaa ne–inaa pia oopipari.
5Ne–inaa awaraa jaraitꞌee parãpa aɨde kꞌĩsiadamerã. Ijãapari abaapa ijãai ewari aba ɨaipia bɨ apema kꞌãyaara. Jõdee awaraapa ijãai ewari chaa aukꞌa bɨ. Tachi ijãapataarã chaachaa jɨrɨdaipia bɨ tachi tꞌãride ijãa pꞌanɨ, kꞌawaadaitꞌee wãara mãga ijãa pꞌanɨ wa mãga–e. 6Ma ewari aba ɨaparipa apema kꞌãyaara, mãga oopari Tachi Akꞌõre–itꞌee. Ichiaba ma chikꞌo kꞌĩra tꞌãdoo kꞌoparipa mãga oopari Tachi Akꞌõre–itꞌee, gracias jarapari perã Akꞌõremaa ma chikꞌo kꞌokꞌãri. Jõdee ma nechiara kꞌokꞌaa bɨpa aukꞌa mãga oopari Tachi Akꞌõre–itꞌee, ichiaba gracias jarapari perã Akꞌõremaa nekꞌokꞌãri.
7Tachi ijãapataarã apida ituaba pꞌanadakꞌaa tachia oo kꞌiniata oodaitꞌee. Ichiaba apida ituaba piudakꞌaa, akꞌɨpari wẽe. 8Chokꞌai pꞌanɨ misa, pꞌanapata oodaitꞌee Cristopa oopi bɨkꞌa, irua tachi akꞌɨpari perã. Mamĩda jai–idaaruta pɨjida, atꞌãri Cristopa tachi akꞌɨpari. Mapa jaradai tachi chokꞌai pꞌanɨ misa, Cristo Tachi Waibɨa. Ichiaba jai–idaa pꞌanɨ misa, Cristo Tachi Waibɨa. 9Ma–itꞌee Cristo piuji mãikꞌaapa chokꞌai pꞌirabaiji, jõmaweda ijãapataarã Akꞌõre Waibɨa paitꞌee; chi chokꞌai pꞌanɨɨrã, jai–idaadapꞌedaarã paara.
10Mãga bɨta ¿sãapꞌeda pɨa, Akꞌõre Ũraa pia kꞌawa–e bɨta, pedee kꞌachia pedee bɨma awaraa ijãapataarã ãpɨte? Maa–e pɨrã, ¿sãapꞌeda pɨa, Akꞌõre Ũraa kꞌawa bɨta, pia–ee akꞌɨparima ma ijãapari pia kꞌawa–e bɨ? Tachi jõmaweda pꞌanadaitꞌee Tachi Akꞌõre kꞌĩrapite Akꞌõre ewari waibɨa ewate. 11Mãga kꞌawa pꞌanɨ Tachi Akꞌõre Ũraa pꞌãdade jara bairã:
‘Mɨ ichita chokꞌai baparida a bɨ Tachi Akꞌõrepa. Eperã chaa bedabaidaitꞌee mɨ kꞌĩrapite mãikꞌaapa jaradaitꞌee: “Pɨta Jõmaarã Akꞌõre Waibɨa.” ’ (Isaías 45.23)
12Mapa kꞌawa pꞌanɨ tachi chaachaa panadaitꞌee Tachi Akꞌõre kꞌĩrapite mãikꞌaapa jaradaitꞌee tachia kꞌĩsiadapꞌedaa, jaradapꞌedaa mãikꞌaapa oodapꞌedaa na pꞌekꞌau eujãde pꞌanɨ misa.
Ne–inaa kꞌachia oopináatɨ awaraa ijãapataarãmaa
13Maperã akꞌɨnaadáma awaraa ijãapataarãpa oopata pedee kꞌachia pedeedaitꞌee ãra ãpɨte. Ma kꞌãyaara jõma óotɨ awaraa ijãapataarã pipɨara ijãadamerã, mãikꞌaapa oodamerã Cristopa oopi kꞌinia bɨkꞌa. 14Mɨ jida araa bɨ Cristo ome. Ijãa bɨ chikꞌo kꞌĩra tꞌãdoo kꞌoipia bɨ, Akꞌõrepa ma chikꞌo kꞌoitꞌee ooda perã. Mamĩda awaraapa ijãa bɨ pɨrã chikꞌo kꞌĩra aba kꞌoikꞌaraa bɨ, ichi–itꞌee kꞌoikꞌaraa bɨ. 15Maperã kꞌĩrakꞌaupai pɨ ɨ̃pema Cristo kꞌaurepa tꞌãri pꞌuapii. Iru kꞌĩrapite pɨa kꞌoru pɨrã ne–inaa irua kꞌokꞌaa, iru tꞌãri ãrii beei pɨ ome maa–e pɨrã Tachi Akꞌõre ome, Cristode ijãa amaadarumaa. Cristo ichiaba piuji ma eperã kꞌaripaitꞌee. Mapa chikꞌinia pꞌanapatáatɨ. 16Kꞌĩrakꞌaupai awaraarãpa pedee kꞌachia jaradai pɨa ne–inaa pia oopata ãpɨte, pɨa ijãa bairã chikꞌo kꞌĩra tꞌãdoo kꞌoipia bɨ. 17Tachi Cristode ijãada–e pꞌanɨ irua chikꞌo kꞌĩra tꞌãdoo kꞌopipari perã wa chikꞌo kꞌĩra apai kꞌopipari perã. Ijãada–e ne–inaa topipari perã wa topikꞌaa perã. Jĩpꞌa tachi Cristode ijãapata mãikꞌaapa iru jua ekꞌari pꞌanapata, iru Jaurepa kꞌaripakꞌãri, oopataadai perã Tachi Akꞌõrepa kꞌinia bɨkꞌa mãikꞌaapa kꞌãiwee pꞌanapataadai perã. 18Tachi Akꞌõrepa pia akꞌɨpari mãgá ijãa pꞌanɨɨrã, oo kꞌinia pꞌanadairã Cristopa oopi kꞌinia bɨkꞌa. Mãga oodakꞌãri, kꞌachia ooda–e pꞌanɨ. Mapa ãra ikꞌaawa pꞌanɨɨrãpa ichiaba ãra pia akꞌɨpata.
19Maperã ne–inaa pia oodáma kꞌãiwee pꞌanapataadaitꞌee awaraa ijãapataarã ome. Chikꞌaripa pꞌanadáma, tachi jõmaweda pipɨara Cristode ijãadaitꞌee. 20Kꞌĩrakꞌaupai awaraarã tꞌãri ãriipii Tachi Akꞌõre ome, parãpa ne–inaa kꞌopata kꞌaurepa. Kꞌirãpátɨ Tachi Akꞌõrepa chikꞌo jõmaweda ooji kꞌodamerã. Mamĩda pɨa chikꞌo kꞌĩra tꞌãdoo kꞌo bɨpa awaraa ijãapari kꞌachiade baaipiru pɨrã, Tachi Akꞌõre kꞌĩrapite ne–inaa kꞌachia oomaa bɨ. 21Piara bɨ chikꞌo kꞌĩra tꞌãdoo kꞌo–e paitꞌee maa–e pɨrã ne–inaa kꞌĩra tꞌãdoo to–e paitꞌee maa–e pɨrã ne–inaa awaraa oo–e paitꞌee, ma kꞌaurepa kꞌachiade baaipii kꞌãyaara pɨ ɨ̃pema Cristo kꞌaurepa.
22Maperã pɨa ijãa bɨ pɨrã chikꞌo kꞌĩra tꞌãdoo kꞌoipia bɨ, mãga ijãa béeji pɨchi tꞌãridepai. Mãpai awaraa ijãapari mãga ijãa–e bɨ ome nipakꞌãri, jaraikꞌaraa bɨ pɨchi tꞌãride iru bɨ. Tachi Akꞌõrepa kꞌawa bɨ ne–inaa jõma pɨa ijãa bɨ pɨchi tꞌãride. Chi mãga oo pꞌanɨɨrã o–ĩa pꞌanɨ Akꞌõre kꞌĩrapite, kꞌĩsia pꞌua–ee. 23Mamĩda pɨa ijãa bɨ pɨrã chikꞌo kꞌĩra aba kꞌoikꞌaraa bɨ, kꞌĩsia pꞌuadarii ma chikꞌo kꞌokꞌãri. Mãgá kꞌĩsia pꞌuadaikꞌãri, ne–inaa kꞌachia oomaa bɨ Akꞌõre kꞌĩrapite ma chikꞌo kꞌoru pɨrã. Mapa mɨa ũraapari ijãaparipa kꞌawa–e bɨ pɨrã ne–inaa ooi wa oo–e pai, ooikꞌaraa bɨ, ichi tꞌãripa ijãarumaa ooipia bɨ.
S'ha seleccionat:
Romanos 14: sjaB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©2005, 2010, 2015 Wycliffe Bible Translators, Inc. All rights reserved.