Habakuk 3
3
Habakuk aah mee limeel pu na
1Uwumbɔr aabɔnabr Habakuk aameel sɔ:
2Uwumbɔr, m ŋun saah tun lituln li na pu,
le ijawaan chuu mi sakpen.
Tɔ, ŋa timi aayoonn mumina ŋitukpaan ŋi aa nan ŋani na.
Hali saaŋuul ponn ni kan, san timi kinimbaak.
3Uwumbɔr ki nyan ni Edom aatiŋ ni ki choo;
Uwumbɔr u ye chain na nyan ni Parann aagongon pu ki choo.
Waanyuun gbiin paacham,
le waapak mu gbiin kitiŋ kee pu.
4Waah wiin pu na naahn nwiin aah wiin pu na la;
uŋaal moor lak lak ke mmii na la,
le waapɔɔn ma tee bɔr.
5U cha iween le lolni u pu nsan,
le nkun paa upuwɔb.
6U yaa sil kan, kitiŋ deŋni la;
le u yaa yaar lik kan, ŋitimbol jii.
Ŋijoo ŋi bi n‑yoonn mɔmɔk na wur la;
le n‑yoonn mɔmɔk aagongon na mu ber lir kitiŋ.
Ŋima pu le u nan chuun n‑yaayoonn na.
7M nan kan ke ijawaan nan chuu Kusann aanib,
le Midiann aatiŋ aanib aawon gbaa.
8Uwumbɔr, ŋimɔɔ pu le saaŋuul nan fii ii?
nnyusakpem pu le saaŋuul nan fii ii?
Aa nan jak saataan ni yaatɔroku tiib bi ye linyaŋ yaab na.
9Aa nan gor saatɔm kiir, ki ban ipiin pam;
Aa cha ŋimɔɔ puu ki bɔkl kitiŋ.
10Le ŋijoo kan si ki mur fenni.
Nnyusakpem nyan ni paacham ki lir ni;
le nnyun mu bi kitiŋ na puu mpɔɔn pu,
le mu aanyunkpenn fii jon paacham.
11Nwiin ni uŋmal aah kan saapiin
ni saakpaatuŋ aah san mala mala pu na,
le ni sil paacham chii.
12Aa nan di liŋuul bɔ dii kitiŋ kee pu;
le saaŋuul ponn ni aa taa taa ŋitimbol pu.
13Aa nan dan ke aa ti gaa saanib ni saah nyan ubɔr u na lii la.
Aa nan kuln titunwanbir aatiŋ aayidaan,
aa nan doo u kookoo la.
14Aa di ubaa aakpaatuŋ le too chaar uyil
buyoonn waajab chii ni ke bi nan jenn timi,
ki mɔɔni ke baah ban bi ti loon
le ki ku doo bigiim bi bi limukl ni na.
15Aa di saataan taa taa nnyusakpem,
ki taa taa nnyun mu ti kpaln tipupur.
16M ŋun timina mɔmɔk pu le mpobil gbaa,
le mmɔgban jii ijawaan pu,
le nwon mɔmɔk kpo, le ntaa jii.
Le m tee ga mɔr ki li kii nwiin mundaal Uwumbɔr ga daa
binib bi tak timi na aatafal na.
17Ŋikakan yaa kaa ŋeen,
le ndaan aasubil mu yaa kaa baa isui pu,
olif aakpan aasui mu yaa yii kaa lun,
le tijikaar mu yaa kaa ŋa ikpaakon ni,
ipiih mu yaa kaa bi kibɔkpuk ni,
le inaa mu yaa kaa bi tinaabar ni kan,
18m tee ga li mɔɔni Uwumbɔr pu,
m ga li kpa mpopiin Uwumbɔr u gaal mi lir na pu.
19Ndindaan Uwumbɔr le ye maapɔɔn;
u ŋa maataafar ke upeeman aataabuseen na la,
le ki kii mi ŋijoo paab.
S'ha seleccionat:
Habakuk 3: xonB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©1998, 2014 Wycliffe Bible Translators, Inc. All rights reserved.