JEREMIA 35
35
Jeremia tüsho Rekabrü
1Josia tsührü Juda kiulongthsüpuh Jehoiakim nimungbo ching Atungpuh yu Jeremia kilim arü: 2Rekabrü yam ching yüang, tüsho arü ki asukang, tüsho arübo Atungpuh yam khiungshak khülang ching bedarang; tüsho arü ki ayungpü yukhu jihang. 3Jumonü inü Habazzinia tsührü Jeremia tsührü Jaazania tüsho api keoniorübo, api tsührübo, tüsho Rekabrü yamkhün alala bea lu. 4Inü arübo Atungpuh yam ching, Thrünpuh mihtsürü Igdalia tsührü Hanan tsührübo khiungshak ching bedarü. Ha ripit neakbuh Shallum tsührü Maaseia khiungshak kumung atorübo khiungshak phünide lakheah. 5Judüki inü Rekabrü miki yukhunü mide phüh tüsho pungbo zojih; tüsho inü arü ki tha, “ Yukhu yungang.” 6Tüshe arünü alo, “ Isanü yukhu muyung, tümüde isa jipürü Rekab tsührü Jonadabnü isa ki thiyukhüm jih, ‘ Nüsa yungsho nüsa tsührübonü küyimkishe yukhu muyung; 7yungsho nüsanü thüyam müthsü, yungsho müjih müyang; yungsho nüsanü kurungasolu müthsü, yungsho müla; tüshe nüsa nimungbo alala ching nüsabo khimyambo ching labah, junangde nüsa lakhi lo ching nüsa nimung hihde alabah.’ 8Rekab tsührü isa jipürü Jonadabnü isa ki thiyukhüm jihkhi lüpdükhi isanü anido. Isa yungsho isa niuberü yungsho isa tsührübo le tsührübebonü isa nimungbo ching yukhu muyungchoh, 9yungsho isa lapü thüyam müthsü yungsho kurungasolu le thulu yungsho müjih müla; 10tüshe isanü khimyambo ching lakheah, tüsho isa jipürü Jonadabnü isa ki thiyukhüm jihkhi alala isanü anido. 11Tüshe küyimki Babilon kiulongthsüpuh Nebukednezarnü lomi azhihde atukhea, isanü tha, ‘ Arang, tüsho Kaldea bonungrü tüsho Aram bonungrü trekhinü isa Jirusalem lim yüanü.’ Jumonü isa Jirusalem ching lakheah.”
12Judüki Atungpuh yu Jeremia kilim arü: 13Wuto Atungpuh , Israel Thrünpuhnü ha thachoh: Yüang tüsho Juda mihtsürü le Jirusalem ching larü ki thaang, Nüsanü amütsan manikhitkhukba de tüsho I yubo maniba de? Atungpuhnü thachoh. 14Rekab tsührü Jonadabnü api tsühsoniuso kilim yukhu muyungpü thiyukhüm jihkhi anido; tüsho arünü khihni khiungde muyung, tümüde arünü arü jipürü yukhüm anido. Tüshe inü nüsa ki alochode asuk, tüshe nüsanü I yu mani. 15Inü nüsa kilim I yamlarü wukihrübo alala alochode thaa arüshih, Kheakü nüsa mihbüm abannü nüsa amütsü limro chingnü rholoang, tüsho nüsa rhimobo thsüphuloang, tüsho püpürü thrünpuhbo dunglim arü tankihpü düyü, tüsho inü nüsa le nüsa jipürü kilim jihkhi lo ching nüsa labah. Tüshe nüsanü nüsa nükhün mümupho yungsho I yu mani. 16Rekab tsührü Jonadab tsühsoniusobonü arü jipürünü thiyukhüm jihkhi arünü anido tüshe ha mihtsürübonü I yu mani. 17Jumonü Atungpuh , Wuto Thrünpuh, Israel Thrünpuhnü ha thachoh: Inü Juda tüsho Jirusalem ching larü alala kheak azhihde athakhi thsümütsü lüpdükhi handarübah; tümütüsho inü arü ki asuk tüshe arünü mani, inü arü ki ji tüshe arünü malo.
18Tüshe Rekabrü yamkhün ki Jeremianü tha: Wuto Atungpuh , Israel Thrünpuhnü ha thachoh: Tümütüsho nüsanü nüsa jipürü Jonadab yukhüm anido, tüsho apinü thsangdankhi alala yando, tüsho apinü thiyukhüm jihkhi alala rhimodo, 19jumonü Wuto Atungpuh , Israel Thrünpuhnü ha thachoh: Rekab tsührü Jonadab a kim alala ching I miki tsühsoniuso khülang labah.
S'ha seleccionat:
JEREMIA 35: YIMCBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.