JEREMIA 27
27
Sangkaplak Amütsan
1Josia tsührü Juda kiulongthsüpuh Zedekia kiulongthsü atankih ching, Atungpuh kilimnü ha yu Jeremia kilim arü, 2Atungpuhnü I ki ha tha: Shihküp-liu tüsho sang-sümkhibonü nü thsungkheak sangkaplak thsang, tüsho jurü nü hung kheak yihkihang. 3Edom kiulongthsüpuh, Moab kiulongthsüpuh, Amon kiulongthsüpuh, Tair kiulongthsüpuh tüsho Sidon kiulongthsüpuh kilim Jirusalem ching Juda kiulongthsüpuh Zedekia kilim arükhi yunithsürü khah hode thiyusheak yüshang. 4Arü putungrü thsungkheak arü ki ha thiyukhüm jihang: Wuto Atungpuh Israel Thrünpuhnü ha thachoh: Nüsanü ha nüsa putungrübo ki thabah: 5I wu ato tüsho I khah chungkhitkhinü alomi kheak lakhi mihtsürü tüsho shiwühbo bede inü alomi thrün, tüsho inü amulongrü kilim ju jih. 6Kheakü inü harü lomi alala I yamlarü, Babilon kiulongthsüpuh Nebukednezar khah ching jihdo, tüsho inü api kilim mütüm shiwühbo she api tankihpü jihdo. 7Anihbuh lomi keampü kim mukhiungyi khiungde trükshih alalanü api le atsührü tüsho atsührütsührü tankihbah; jushu trükshih ahihdo tüsho kiulongthsürü atobonü api arü azhorü kamshihbah.
8Tüshe trükshih khürü yungsho kiulongthsünü ha Babilon kiulongthsüpuh Nebukednezar mütankihsho, tüsho Babilon kiulongthsüpuh sangkaplak khüp ahung müyüzahsho, inü ju trükshih nukshang, khümzung tüsho arüm-tukthsünü, api khah hode inü ha thsümünimkhi mükheamyi khiungde athsümüchibah, Atungpuhnü thachoh. 9Jumonü nüsanü nüsa wukihrübo, müchitrübo, milim yihnakrübo, müchityu tharübo, yungsho wurük-huhrü ki dani, sherünü nüsa ki thacho, “ Nüsanü Babilon kiulongthsüpuh mütankih.” 10Tümüde arünü nüsa ki akeangyu müchitchoh, ju hode nüsa lomi chingnü nüsa limshude atsoshihbah; inü nüsa yankhitbah, tüsho nüsa dükheakbah. 11Tüshe trükshih khürünü nihbuh hung Babilon kiulongthsüpuh sangkaplak khüp mükhümsho inü nihbuh lomi ching wochakde alashihbah, Atungpuhnü thachoh.
12Inü Juda kiulongthsüpuh Zedekia ki ju ruk asukdo: Babilon kiulongthsüpuh sangkaplak khüp nü hung mükhümang, tüsho api le api mihtsürü tankihang tüsho laang. 13Tümüde nü tüsho nü mihtsürübo, trükshih khürünü Babilon kiulongthsüpuh mütankihpü dünkheak Atungpuhnü asukkhi nangde nukshang, khümzung tüsho arüm-tukthsünü ashepü? 14Babilon kiulongthsüpuh mütankihpü wukihrübonü nüsa ki thakhi yubo dani, tümüde arünü nüsa ki akeangyu müchitchoh. 15Inü arübo müthiyi, Atungpuhnü thachoh, tüshe arünü I mung chingnü akeangyu müchitchoh, ju hode inü nüsa yankhitbah tüsho nüsa le nüsa ki müchitrü wukihrübo dükheakbah.
16Judüki inü amükeamrübo tüsho ha mihtsürü alala ki tha, Atungpuhnü ha thachoh: Nüsa ki hade müchitrü wukihrübo ki dani, “Atungpuh yam phühlungbo Babilon chingnü nahde hanlodarübah,” tümüde arünü nüsa ki akeangyu müchitchoh. 17Arü ki dani; Babilon kiulongthsüpuh tankihang tüsho laang. Tümüde ha kiuto zhikrangkhündo kamshihpü? 18Atsütsü arü wukihrübo a sho, tüsho Atungpuh yu arü kheak lasho, arünü Wuto Atungpuh ki mushushang, junangde phühlungbo Atungpuh yam ching lakhi, Juda kiulongthsüpuh yam ching lakhi, tüsho Jirusalem ching lakhi Babilon ching müyü. 19Tümüde Wuto Atungpuhnü dungjingbo, kekung, atobe, tüsho aningkhi phühlungbo ha kiuto ching aninga lakhi dünkheak ha thachoh, 20küpü Babilon kiulongthsüpuh Nebukednezarnü Jehoiakim tsührü Juda kiulongthsüpuh Jehoiakin, tüsho api lung Juda tüsho Jirusalem ching mükheahmudurü Jirusalem chingnü Babilon lim ramde ayüchoki mulude ayükhea– 21Wuto Atungpuh , Israel Thrünpuhnü Atungpuh yam ching lakhi, Juda kiulongthsüpuh yam ching tüsho Jirusalem ching lakhi phühlungo dünkheak ha thachoh. 22Jurübo Babilon ching hande ayübah tüsho arü thsungkheaknü inü rhuakheahpü nimung khiungde arü ju ching labah, Atungpuhnü thachoh. Judüki inü arü belodarübah tüsho ha dangpung ching zobah.
S'ha seleccionat:
JEREMIA 27: YIMCBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.