PAODAKHAIYU CHIKHA 30
30
Podakhai loure ae Shiha Ngaoloure donou
1“Enou neletao nghoujü hi khaipei khaitouyu shiha ae chaa haitao hai neletao pei hi vepayu phaki, alia neletao Ramai Mapao nou neletaoye huporarou laiwua neletao nou tyahrü kukhe maitao hrohinou buyu phaki, Enou neletao hi shiha molouzü chaa ali dolo tea peikhai touyu nasü licholai, 2alia zhou Enou neletao hi paopeiyu hai bütoua, ne alia ne nahmaitao nou Ramai Mapao hi dakhai velouzü alia ne tsüle teitei nou, nevei rako veishi nou alia nevei pfüchi teitei nou peia puh chi zülouzü, 3neletao Ramai Mapao nou neletaoye kaozhou aveih sü peidakhailai alia neletaoye zhuvea leshi peilai. Puhnou neletaoye porarou khaitouyu tyahrü khemai veishi hrohinou podakhaive jüpeilai. 4Neletaoye deiphao kai dukayu buh hi nüpoho khaitouyuma, buh sühinou neletaoye Ramai Mapao nou podakhai ve peilai. 5Neletao puopao vei soua buyu teidei sühi puhnou neletaoye save khaipeilai alia teidei sünasü neletao vei panou soudakhai loulai. Puhnou neletaoye panou neletao puopao maitao jünou vapulai alia tyakaapulai. 6Nevei tsüle veishi alia ne rako teitei nou neletao Ramai Mapao ye leshi loure donou alia neletao teidei sühinou hria buloure donou, puhnou nevei lüthou ae neletao nahmai lüthou sü heerodepu peia soushee peilai 7Neletao Ramai Mapao nou chaa haitao veishi hai neletaoye ngaorayu alia souveayu ngaobamaitao hisü peilai. 8Süthaisü neletao nou Mapao vei chikha sü züdakhai loulai, alia zhou Enou neletao hi paopeiyu puhvei kharochi haitao teitei neletao nou fülai. 9Sükulouzü, neletao Ramai Mapao nou neletao bah nou souyu vah teitei hi shiha peilai alia nevei toudzü, kikhaorü alia nevei teidei hi taimou veishi vei-a palai. Neletao puopao hi Mapao nou savashoyu peiyu büa neletao hia puhnou sava shoyu sü peilai alia neletaoye sousava peilai, 10ana neletao nou neletao Ramai Mapao chi sü zülai, alia chikha larübvü hi rüthou khaitouyu chikhatao ae kharochikhe soutaosoua reitoua bulai, alia ne tsüle teitei nou ae ne rako teitei nou peia Ramai Mapao hi dakhai vevuzülai.
11“Zhou Enou neletao hi peia buyu kharochi taohai neletaoye donou tatei lalere timoe moa neletao donou kadou lere timoe. 12Süna hai rakiva nou bua neletao nou haibüa noulaiyu moe, ‘Thaonou süna hai poloure donou rakiva khelai alia Etaoye pa züloure donou phoupeilai?’ 13Moa süna hai zaidu thailo bua neletao nou haibüa noulaiyu moe, ‘Süna poloure donou thaonou zaidu tachopalai alia Etaoye pa sünasü züloure donou Etao hi thaonou paopeilai?’ 14Sükumoe, chipao sütao hai neletao hi nghitei-a bubaie; neletaoye pa züloure donou süna hai ne mü ae ne lüthou hinou bubaie.
15“Zhukhaio, zhou Enou neletao nghoujü hi hriyu ae savayu, alia thaiyu ae veahoyu sü khaipei khaitoue. 16Neletao nou zhou Enou peia buyu chikhatao hai züloua neletao Ramai Mapao ye leshi louzü, puhvei ludu hinou talouzü alia puh vei chikhatao züa bulouzü, neletao hai hrilai alia mai-a poupalai, alia neletao nou talou polou laiyu teidei hinou neletao Ramai Mapao nou shiha peilai. 17Ana neletao nou neletao tsüle datashoko-o alia chi züba shoko-o, alia neletao nou rah kukheye thotayu thaio, 18zhou Enou neletao hi paowe, süolouzü neletao hai veikhai mosoua souhawulai, alia neletao nou Jordan tachopaloua talou poloulaiyu teidei hinou phashoa hrülai moe. 19Ahri alia athai, shiha alia chaa hai neletao panou doloure donou neletao nghoujü khaipei khaitoue touyu shaki soure donou raki ae deiphao hai zhou Enou kuwe. Chuo ahri sü dolo, sükure toulouzü neletao alia neletao nahkhemai hai hrilai, 20alia neletao nou neletao Ramai Mapao ye leshilo, puh pai keilo, puhye thaokhai touso, sükulouzü neletao nou ahri sü ngaoloulai, alia neletao puopao Abraham, Isaak ae Jakob hi peilai tea Mapao nou paopei khaitouyu teidei hinou hrüshoa buloulai.”
S'ha seleccionat:
PAODAKHAIYU CHIKHA 30: POUMBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.