PAODAKHAIYU CHIKHA 24
24
Tunaoyu ae Shanghi Soudakhaiyu
1“Hakinou poutu mai alinou naotumai ali nalou-a puhnou naotupai hai dou loumoyu ngaoloua jüpamo palou-a tunaoyu larü rülou-a naotupai peiwua puhye ki hinou seita thai, 2alia puhye thaotayu thainou naotupai nou poutu kukhe mai ali ki velou-a, 3ae honapai vei cha ahai cheyupu-a puhye jüpa molou-a naotupai hi tunaoyu larü rüpei-a seitare toulouzü, moa maipuo hai thai-a baire toulouzü, 4puhye phayu cha raina nou puhye nadakhai loushie; daisounou touyuo honapaiye sü mainou souzhaiwure. Puhnou honapaiye nadakhaiyu hai Mapao nghoujü hinou ngaora-e. Neletao vei Ramai Mapao nou neletao hi peilaiyu teidei hi haibüyu mah sü southouso.
Kukhe Chikhatao
5“Shanghi souloubüa buyu mai ali hai reih hi seita laimoe moa puh hi vah tali leta laimoe. Daiolouzü po ali hai ki hinou dodosou-a bulai alia puhnou nalouyu puh chapfü hisü savayu pfüve peilai.#24.5 puh chapfü hisü savayu pfüve peilai; moyuma puh chapfüye koa sava-a bulai.
6“Paoh pfüyu banda khaire donou moa paoh poka loure donou tea chuhpabvü hai polouso, daisounou touyuo mai alinou teithe teithe hriloure donou poa vah souyu na nasü pota laire.
7“Maitalia puh thaihou jürai Israel mai kukhe aliye nüloua puhye qila mai ali büa sa-a vah soulouzü moa puhye zho louzü, mai sünasü southalai. Neletao hrohinou ashi sü popa laiwulai.
8“Loukhaorah sou soulouzü, Levi napao mainou neletao hi paodou peiyu bütoua soutoulo. Enou puletao hi paopeikhai touyu kharochi sü neletao soutao sou-a zülai. 9Neletao nou Ejipt hinou tapayu phaki, ludu hinou neletao Ramai Mapao nou Miriam hi daisou peie touyu sü liloukhaio.
10“Neletao nou kinapa hi hatali poupao peiyuki, puhnou bandayu na pore donou puh kikha talouso; 11kijü nou kholou baio alia poupao soupeiyu mai honanou pa puhnou bandayu na nasü ne hi popa peibaio. 12Hakinou mai honahai toure hayu mai thaio, puhnou bandayu puhvei saba hai khei teile hi ne ki hisü khaiso. 13Teinghi loure toulouzü puh hi dakhai peio. Sükure toulouzü puhnou kheiko bazü louveie alia puh nou neye kalo sholai. Haihai neletao Ramai Mapao nghoujü hinou veiyu vah ali-e tea polai.
14“Toure ha-a maizho kutouyu ne thaihou jürai Israel mai moa ne nuh hi tuve buyu shetumai ali vei zhohabo sü pokhaiso. 15Puh vei teithe teithe vei zho hai teinghi loumo kinou peio, daiolouzü puh hai toure hae alia zho muh peiyu hai zhishoe. Nenou peilou moyu vanou puhnou ne hi vamoa Mapao hi krangao louzü mah hai ne pei hi velai.
16“Nahmai vanou pfüpuo maiye southalai moe, moa pfüpuo mai vanou nahmai-a southalai moe; ana lah paomai vei mah vanou southa bailai.
17“Shetumai moa pfüpuo hayumai vei kaozü nasü souha laimoe, moa meamaipfü vei sabanü hai bandare donou tea polou laimoe. 18Neletao hai Ejipt teidei hinou qila mai sou-a bue touyu liloukhaio alia neletao vei Ramai Mapao nou neletaoye buh sühinou vupapaie. Südonou chikhatao hai Enou neletao hi peiwe.
19“Neletao nou lu chachiyu phaki rouko louhao loumoa bulouzü, neletao nou dakhaiho polouso. Sühai shetumai, vearolai mai alia meamai donou thaoda peio, sükure toulouzü neletao vei Ramai Mapao nou neletao bahnou souyu vah veishi hi ha peilai. 20Neletao nou oliv süübe hinou oliv shithou bakha ali haolouyu thai, dakhaipa rashithou sü haopu khaiso. Tao-a buyu rashithou haisho taosü shetumai, pfüpuo hamai alia meamai donou khaidaio. 21Neletao nou darkha peida hinou darkha shithou haolouyu thai, darkha be hi dakhaive puso, shithou haoshoyu taosü shetumai, pfüpuo hamai alia meamai donou khaidaio. 22Neletao hai Ejipt hinou qila mai sou-a bue touyu licholo. Süvanou haitao hai zülo tea Enou neletao hi kharochi peiwe.
S'ha seleccionat:
PAODAKHAIYU CHIKHA 24: POUMBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.