1 SAMUEL 27
27
David nou Philistin Mai hinou Ho Hrüyu
1David nou haibüa tsüchoe, “Teitheli moa teitheli hai Saul nou Eye southa bailai. Südonou E hai Philistin mai hi tuho bulouyua vei-a bailaire. Sükulouzü Saul nou Eye phoutapu moa E hai kaozhou vei-a bailai.” 2Südonou David nou puhvei mai kaihrou taosü Gath hi veo Maokh nahpoutu Achish hisü veloure. 3David ae puhvei maitao hai puletao vei kihikha maitaoye saloua Gath hinou ve hrüre. David nou puhvei chapfü ahai- Jezreel hinou Ahinoam, ae Karmel hinou Nabal hapu chapfü Abigail puhaiye koa Gath hinou ve bure. 4David hai Gath hi tuho butareshe touyu Saul nou choulou khaie, puhnou David ye sü phoutapu more.
5David nou Achish hi paoe, “Nenou Eye nevei samai khamai ali-e tea polouzü, Eye nuh taitou ali peia panou sühinou hrüo. Nevei nuhdu hinou neye koa hrüzho moyuma vei-e.” 6Südonou Achish nou puhye Ziklag nuhdu nasü peie. Hai vanou zhodao koutea Ziklag nuhdu nasü Judah vei nuh teidei soua nou bue. 7David nou Philistin maiye koa khouh kiarou hai hrüe.
8Teile süphaki, David ae puhvei maitao nou süpehao hi raichokinou hrüa buyu Geshur mai, Girza mai, ae Amalek maiye soureih souta-e. Puhnou Ejipt hi talouyu Shur maivei teidei hi koute hai soureih souta-e, 9ae puletao mai hrülai hai naotu poutu sümoa southa khaiwua puletao vei zhaotu, nghitu, rheisüh ae kikhaorü alia sabanü koute-a poloua Achish hisü dakhai ve-e, 10ae Achish nou puh hi “Zhouvu ne daiki nou soureih souta-e?” tea nouyu phaki, David nou puh hisü “Judah teidei khelova nou reih souta-e,” moyuma “Jerahmeel maivei teidei hi soureih sou-e,” moyuma “Ken mainou hrüyu teidei hinou ho reih sou-e,” tea chila peia baiwe. 11David nou soureih soutayu phaki nuh teidei hi hrüa buyu naotu poutu sümoa southa khaiyu donou Gath nuhdu hisü mai linoua tave puhnou ae puhvei maitao nou soupfüyu vah khesü paopeire mai ha-a baiwe. Haibüa David nou Philistin mai hi buyu phaki soupeie. 12Ana Veo Achish nou David ye sü louche sho-e, ae puhnou lah haibüa tsüchoe, “Puhye sü lah puhvei Israel maitao nou ngaora sho-e, südonou puhnou hria bukisa sü avei kuvah soua bubai shulai.”
S'ha seleccionat:
1 SAMUEL 27: POUMBSI
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.