Versets bíblics populars de Kɛ́nsísɔ́ 14

Comparteix

Nǔ e wɛ kpowun ɔ́ ɖíe: mi ma fɔ́n gǔ dó Mawu Mavɔmavɔ jí ó, mi ma ka ɖi xɛsi nú to ɔ́ mɛ nu lɛ́ɛ ó, ɖó mǐ nǎ ɖu ɖo jǐ yětɔn; vodún e nɔ́ cyɔ́n alɔ yě jí lɛ́ɛ ɖě sɔ́ ɖo jǐ yětɔn ǎ. Mawu Mavɔmavɔ ka ɖo kpɔ́ xá mǐdɛɛ lɛ́ɛ; mǐ ní bó má ɖi xɛsi nú yě ó.”

‘Mawu Mavɔmavɔ wɛ un nyí; un nɔ yá wǔ sin xomɛ ǎ; un nyí Mawu xomɛnyɔ́tɔ́; un nɔ sɔ́ nǔ nyanya e è wa lɛ́ɛ kpódó tónú e è ma se ǎ lɛ́ɛ kpó kɛ mɛ. Un ká nɔ mɔ mɛ e hu hwɛ ɔ́ dó mɔ hwɛjijɔnɔ ǎ. Hwɛ e vǐtɔ́ lɛ́ɛ hu ɔ́, vǐ yětɔn lɛ́ɛ ná sún sin tɔn; vǐvú yětɔn lɛ́ɛ, vitikli yětɔn lɛ́ɛ kpó kpaba yětɔn lɛ́ɛ kpó ná sún sin tɔn.’

Nú Mawu Mavɔmavɔ nyɔ́ xomɛ dó mǐ wú ɔ́, é ná kplá mǐ yi to ɔ́ mɛ, bó ná ná to ɔ́ mǐ. Anɔ̌sin kpó wǐin kpó wɛ nɔ́ sa ɖo fínɛ́.

Amɔ̌, mɛsɛntɔ́ ce Kalɛ́bu ɔ́, ayi ɖo xomɛ nú éyɛ́, bɔ é nɔ gbejí nú mì. Énɛ́ ɔ́ wú ɔ́, un ná kplá ɛ yi to e é yi ba do ná ɔ́ mɛ, bó ná ná to ɔ́ vǐ tɔn lɛ́ɛ.

Mi yi ɖɔ nú yě ɖɔ: ‘Nyɛ Mawu Mavɔmavɔ ɔ́, un ɖo gbɛ; xó e mi ɖɔ bɔ un se lɛ́ɛ wɛ un ná dó wa nǔ xá mi.

Bɔ Mawu Mavɔmavɔ ɖɔ nú Mɔyízi ɖɔ: “Káká hwetɛ́nu wɛ togun élɔ́ ká ná gbɛ́ wǎn nú mì yi jɛ? Nǔjíwǔ tobutóbú e un bló ɖo tɛ́ntin yětɔn ɔ́ nɛ́ có, yě ɖǒ jiɖiɖe dó wǔ ce ǎ. Káká hwetɛ́nu wɛ yě ká ná nɔ mɔ̌ yi jɛ?

Yě bǐ ɖó gbe kpɔ́, bó jɛ nǔ hlún ɖɔ dó Mɔyízi kpó Aalɔ́ɔn kpó wú jí, bó nɔ́ ɖɔ nú yě ɖɔ: “Ényí mǐ kó kú ɖo Ejípu ɔ́, é nyɔ́ hú; abǐ ényí mǐ gbɔ bó kú ɖo gbětótló ɔ́ mɛ fí ɔ́, é nyɔ́ hú!

Nya we ɖé lɛ́ɛ ká ɖo mɛ e yi ba do nú to ɔ́ lɛ́ɛ mɛ: Jozuwée, Nuni ví ɔ́, kpódó Kalɛ́bu, Yefunnɛ́ɛ ví ɔ́ kpó. Yědɛɛ lɛ́ɛ sin xomɛ, bó vún awu dó kɔ nú yěɖée, bó ɖɔ nú Izlayɛ́li ví lɛ́ɛ ɖɔ: “To e mǐ yi ba do ná ɔ́, to ɖagbe wɛ.

Amɔ̌, nyɛ Mawu Mavɔmavɔ ɔ́, un ɖo gbɛ, bɔ susu ce kpé ayǐkúngban ɔ́ bǐ jǐ. Yě mɛ e mɔ susu ce, bó mɔ nǔjíwǔ e un bló ɖo Ejípu, bó bló ɖo gbětótló mɛ lɛ́ɛ, yě mɛ énɛ́ lɛ́ɛ e tɛ́n mì kpɔ́n azɔn mɔ̌kpán, lobo ma ɖótó mì ǎ lɛ́ɛ ɔ́, ɖokpó ná mɔ to e un dó akpá tɔn nú tɔ́gbó yětɔn lɛ́ɛ ɖɔ un ná ná yě ɔ́ ǎ. Yě mɛ e gbɛ́ wǎn nú mì lɛ́ɛ ɖě ná mɔ to ɔ́ ǎ.