Versets bíblics populars de Romanos 6

Comparteix

Dan me se cheꞌé cacunꞌ ꞌyaj yuvii̱ me se ꞌo̱ gu̱un yaníj nimán nij yuvii̱ rihaan Yaꞌanj nu̱ꞌ cavii nu̱ꞌ caꞌanj, tza̱j ne̱ quiꞌyaj maꞌa̱n Yaꞌanj se lu̱j ga̱ níꞌ cheꞌé Cristó Jesús Si̱j ꞌNi̱j Raꞌa man níꞌ se vaa caꞌve̱e ca̱yáán níꞌ ga̱ soꞌ nu̱ꞌ cavii nu̱ꞌ caꞌanj ado̱nj.

Se̱ guun chij cacunꞌ rihaan soj ya̱j a̱ maꞌ. ꞌO̱ se neꞌen soj se vaa se̱ cutaꞌ Yaꞌanj cacunꞌ xráá soj sese se̱ canocoꞌ soj nu̱ꞌ stucua̱nj Moisés maꞌ. Tza̱j ne̱ me rá Yaꞌanj quiꞌya̱j Yaꞌanj se lu̱j cheꞌé soj, ne̱ navi̱j cacunꞌ tumé soj, ne̱ cavi̱i̱ sa̱ꞌ soj, quiꞌya̱j maꞌa̱n Yaꞌanj ado̱nj.

Dan me se ase vaa quiranꞌ Cristó ga̱a cachinꞌ nii man soꞌ roꞌ, da̱nj quiranꞌ níꞌ ga̱a cataꞌ ne níꞌ a. Ne̱ ase vaa ne cache̱e̱ soꞌ rihaan yoꞌóó rque vaꞌnu̱j güii roꞌ, da̱nj ga̱a̱ níꞌ cuano̱ cheꞌé se cataꞌ ne níꞌ, ne̱ se̱ cachéé níꞌ chrej chiꞌi̱i̱ cuano̱ maꞌ. Ga̱a ne̱ ase vaa cunuu iꞌna̱ꞌ uún Cristó ga̱a caviꞌ soꞌ, quiꞌyaj snucua̱j Rej soꞌ Yaꞌanj roꞌ, da̱nj ga̱a̱ cunu̱u naca̱ nimán níꞌ, ne̱ veꞌé uxrá quiꞌya̱j níꞌ ca̱yáán níꞌ ga̱ tuviꞌ níꞌ, quiꞌya̱j Yaꞌanj ado̱nj.

Cheꞌé dan se̱ caꞌvej rá soj gu̱un chij cacunꞌ rihaan nee̱ man soj maꞌ. Neꞌen soj se vaa vaa güii cavi̱ꞌ nee̱ man soj, ne̱ cheꞌé dan se̱ guun caꞌve̱j rá soj quiꞌya̱j nee̱ man soj náá guun se nij maꞌ. Dan me se ase vaa síí caviꞌ vaa soj ga̱a rque̱, tza̱j ne̱ racuíj Yaꞌanj man soj, ne̱ cheꞌé dan ase vaa síí cunuu iꞌna̱ꞌ uún vaa soj, ne̱ cheꞌé dan nu̱ꞌ nee̱ man soj quiꞌya̱j se‑su̱u̱n Yaꞌanj, quiꞌya̱j soj, ne̱ ina̱nj suun sa̱ꞌ quiꞌya̱j soj cheꞌé Yaꞌanj á.

Neꞌen níꞌ se vaa vaa chiꞌi̱i̱ nimán níꞌ ga̱a ataa cavi̱ꞌ Cristó cheꞌé níꞌ, tza̱j ne̱ caviꞌ soꞌ rihaan rcutze̱ cheꞌé níꞌ, ne̱ veé dan me se navij se chiꞌi̱i̱ ma̱n nimán níꞌ, quiꞌyaj soꞌ ga̱a caviꞌ soꞌ, ne̱ taj cheꞌé quiꞌya̱j níꞌ se chiꞌi̱i̱ ne̱ gu̱un níꞌ se‑mo̱zó cacunꞌ ya̱j a̱ maꞌ.

Ne̱ cheꞌé dan cata̱j maꞌa̱n soj se vaa a̱j caviꞌ se chiꞌi̱i̱ ma̱n nimán nij soj, ne̱ se̱ quiꞌyaj uún nij soj cacunꞌ a̱ maꞌ. ꞌO̱ se canacoꞌ nij soj man Cristó Jesús, ne̱ da̱j se ꞌyaj gue̱e̱ soꞌ, yáán soꞌ cheꞌé rej quiꞌya̱j soꞌ se‑su̱u̱n Yaꞌanj roꞌ, da̱nj quiꞌya̱j níꞌ uún a.

Da̱j quiꞌya̱j níꞌ, rá soj ga̱. ꞌO̱ quiꞌya̱j níꞌ cacunꞌ cheꞌé rej quiꞌya̱j Yaꞌanj doj se lu̱j cheꞌé níꞌ, rá soj naꞌ. Taj maꞌ. Se̱ guun quiꞌya̱j níꞌ da̱nj maꞌ. ꞌO̱ se a̱j tanáj níꞌ chrej chiꞌi̱i̱ á. Asa̱ꞌ caꞌve̱e canoco̱ꞌ uún níꞌ chrej chiꞌi̱i̱, rá soj ga̱.

Ne acaj soj cuentá se vaa sese chrej chiꞌi̱i̱ canoco̱ꞌ soj, ne̱ gu̱un soj se‑mo̱zó cacunꞌ a. Da̱nj ina̱nj gu̱un chij cacunꞌ rihaan soj, ne̱ ina̱nj cacunꞌ quiꞌya̱j soj, quiꞌya̱j cacunꞌ, ga̱a ne̱ quiri̱ꞌ nimán soj, quiꞌya̱j cacunꞌ tumé soj a. Tza̱j ne̱ sese cuno̱ soj rihaan Yaꞌanj, ne̱ cu̱nuû soj rihaan Yaꞌanj, ne̱ cunu̱u sa̱ꞌ nimán soj rihaan Yaꞌanj na̱nj á.

Ga̱a rque̱ me se se‑mo̱zó cacunꞌ me soj, tza̱j ne̱ guun rá maꞌa̱n soj cuno̱ soj tucuáán tucuꞌyón núj rihaan soj cheꞌé Yaꞌanj, ne̱ cheꞌé dan taj ꞌu̱nj guun niꞌya̱j níꞌ rihaan Yaꞌanj ado̱nj. Dan me se nanii soj rihaan cacunꞌ, ne̱ ina̱nj se sa̱ꞌ ꞌyaj soj a.