Versets bíblics populars de Romanos 10

Comparteix

ꞌO̱ se sese caꞌmi̱i̱ yá so̱ꞌ cata̱j so̱ꞌ rihaan tuvíꞌ so̱ꞌ se vaa Jesús me Síí ꞌNi̱j Raꞌa man níꞌ, ne̱ sese gu̱un ya̱ rá nimán so̱ꞌ se vaa cunuu iꞌna̱ꞌ uún Jesús, quiꞌyaj Yaꞌanj, ga̱a caviꞌ soꞌ, ne̱ nani̱i̱ so̱ꞌ rihaan sayuun ne̱ cavi̱i̱ sa̱ꞌ so̱ꞌ a.

ꞌO̱ se nimán níꞌ me se cuchuma̱n rá níꞌ ni̱ꞌyaj níꞌ Jesús, ne̱ caꞌve̱e cunu̱u sa̱ꞌ níꞌ rihaan Yaꞌanj, ne̱ tuꞌva níꞌ me se caꞌmi̱i̱ ya̱ níꞌ cata̱j níꞌ se vaa noco̱ꞌ níꞌ man Jesús, ne̱ caꞌve̱e nani̱i̱ níꞌ rihaan sayuun ne̱ cavi̱i̱ sa̱ꞌ níꞌ ado̱nj.

Tza̱j ne̱ veé dan me se asino aꞌmii natáj nii rihaan yuvii̱ cheꞌé Cristó, ga̱a ne̱ uno nij yuvii̱, ne̱ xcaj nij yuvii̱ cuentá cheꞌé se vaa taj xnaꞌanj Yaꞌanj rihaan nij yuvii̱, ga̱a ne̱ amán rá nij yuvii̱ niꞌya̱j nij yuvii̱ man Yaꞌanj na̱nj ado̱nj.

Dan me se taj uún Danj Yaꞌanj se vaa xa̱ꞌ síí amán rá niꞌya̱j man Yaꞌanj, tza̱j ne̱ se̱ guun naꞌa̱j soꞌ maꞌ. ꞌO̱ se ꞌo̱ cuya̱a̱n vaa nij yuvii̱ israelitá do̱ꞌ, nij yuvii̱ yaníj do̱ꞌ, cheꞌé se maꞌa̱n Síí ꞌNi̱j Raꞌa man níꞌ me se ꞌnij raꞌa soꞌ man cunuda̱nj nij soꞌ, ne̱ uxrá ra̱cuíj soꞌ man cunuda̱nj yuvii̱ achíín niꞌya̱j rihaan soꞌ a. Dan me se taj uún Danj Yaꞌanj a: “Ne̱ cunuda̱nj nij síí cata̱ꞌ tuꞌva se‑chuvi̱i Síí ꞌNi̱j Raꞌa man níꞌ roꞌ, nani̱i̱ nij soꞌ rihaan sayuun ado̱nj.” Da̱nj taj Danj Yaꞌanj a.

Ne̱ asa̱ꞌ cuchi̱ꞌ síí aꞌmii natáj rihaan yuvii̱, sese se̱ caꞌnéé nii man soꞌ ga̱an. Dan me se aꞌmii uún Danj Yaꞌanj, taj yoꞌ a: “Veꞌé ndoꞌo ꞌyaj síí ꞌanj caꞌmi̱i̱ natáj nana̱ sa̱ꞌ ado̱nj.” Da̱nj taj Danj Yaꞌanj a.

Tza̱j ne̱ asa̱ꞌ caꞌve̱e cachi̱nj niꞌya̱j yuvii̱ rihaan Cristó, sese ataa cuchuma̱n rá nij yuvii̱ ni̱ꞌyaj nij yuvii̱ man Cristó ga̱an. Ne̱ asa̱ꞌ caꞌve̱e cuchuma̱n rá nij yuvii̱ ni̱ꞌyaj nij yuvii̱ man soꞌ, sese ataa cuno̱ nij yuvii̱ snana̱ soꞌ ga̱an. Ne̱ asa̱ꞌ caꞌve̱e cuno̱ nij yuvii̱, sese taj síí aꞌmii natáj rihaan nij yuvii̱ ga̱an.

Ga̱a naá, ne̱ canocoꞌ yuvii̱ stucua̱nj Moisés, ne̱ veé dan me se cunu̱u sa̱ꞌ nij soꞌ rihaan Yaꞌanj, rá nij soꞌ, tza̱j ne̱ ya̱j nihánj me se a̱j quisíj stucua̱nj Moisés, quiꞌyaj Cristó, ne̱ ꞌo̱ se ꞌo̱ cuchuma̱n rá níꞌ ni̱ꞌyaj níꞌ man Cristó, ga̱a ne̱ cunu̱u sa̱ꞌ níꞌ rihaan Yaꞌanj na̱nj ado̱nj.