Versets bíblics populars de 2 Korinti 4

Comparteix

Mo kokuri dé ba pae se dé boboŋa tɔge logo baŋa wonnu telo na wae te nae de yia to. Dé boboŋa nam tɔge wonnu telo na ware te nae de yia to. Kokuri dé yia na nae wonnu telo to yeini te ba dáana. Ko daare telo na ba nae de yia to wó taa wora taa taa se ko taa vei wuu.

Wɛ zeinim dem na gaale debam tei ne to, dé vɔna bá pare. Ko ná ye debam nabiina yera yalo dé na jege to, ya wora ya kwe mo dɛ maama wone se ya ba ya bugi. Ko nam ná ye dé jworru, Wɛ wora o fɔge-te mo dɛ maama. Leile konto dé wora dé nae yaara fenfee, ye ya bá dáane. Ya nam wó pa se dé ba dé di ywoni dedɛ Wɛ yiga ne se ko taa vei wuu, ye ko gaale dé logo baŋa yaara yam na mae tei to.

Yaara yeini ya peene debam, ye ya ware dé yiga ya che. Dé boboŋa maa tiini ya vugimi, ye ya ware se ya pa dé vɔna pare. Nɔɔna yeini ba bɛɛse debam, ye dé ba fɔge dé gɛ fara. Dé dona maa pae se dé toe tega ne, ye dé ba fɔge dé gɛ dé ŋwea.

Wɛ na tiini o zeini debam konto to, ko nye de o kwei wonnu telo na ye lonne nyem to mo o ke kɔɔra wone. Dé na nye de kɔɔra konto to, ko bere we debam dae kolokolo, se ko ye Wɛ dam-fɔrɔ kom ŋwaane mo dé toŋa.

Banto ve Wɛ chega kam, kolo ŋwaane setaana pɛ wolo na di dam logo konto baŋa ne to mo pɛ se ba boboŋa kwaale. O ke konto se ba yé wane ba na swa yalo Wɛ kwor-ywoŋa kam na lage ka pa-ba to. Kwora kam konto bere Yezu Krista de o dam dem na ye tei to mo. Wonto mo jege Baŋa Wɛ nyenyego chekke.

Baŋa Wɛ mo ye wolo na maŋe o ta o we, “Pwooni ba de taa nyeene lim wone”. Wonto nam ta mo ye wolo na pɛ se pwooni ba de wora de nye dé bochara ne to. Konto mo o pɛ dé yi poore se dé lɔre o nenɔŋ-fɔrɔ kom na ye tei, ye konto mo nae Yezu Krista yibia ne.