Versets bíblics populars de Tashches Pedros 4

Comparteix

Anic dadamꞌ mọjoꞌchaꞌ jemonac q̂uinꞌ paj qui fer mạꞌjitidyeij bäꞌyi miꞌin. Vaj meij mạꞌjitiĉaꞌ bäꞌjaꞌ jụijyaꞌ tsun, aty raꞌ jam dyijtucsebijaꞌ juchaj muꞌin, meꞌ tsanꞌ daiꞌ quiꞌ juchatusinꞌ jụijyaꞌ in jam raꞌ dyijtucsebijaꞌ juchaj muꞌin.

Jenꞌ räjenꞌdye soꞌminac carijtacdyedyes muꞌ, junꞌ junꞌ chuc soꞌminac, meꞌ meꞌ carijtaĉamꞌ nọ́tacsejam yoctyiꞌ in, ĉaĉaij na muꞌ meꞌdyes soꞌminac carijtacdyedyes miꞌin.

Tyi chuc soꞌmac voroꞌtacdyedyes, paj rụij jéyacsi Jenꞌsiꞌ p̂eyacdyeꞌ muꞌ, tyi chuc soꞌmac nọ́tacsedyedyes, paj nọ́tacsi yoctyiꞌ in Jenꞌsiꞌyaꞌ ferdyeꞌ muꞌ. Meꞌ raꞌ carijtaqui miꞌin paj qui timaꞌcac muꞌ Jenꞌ Jesucristoscheꞌ tịj muꞌ. Räjĉan buꞌyiꞌ raꞌ därsiꞌ ferdyeꞌ muꞌ judyeyaꞌ ayoꞌbuꞌyedyeꞌ muꞌ, jam raꞌ jụꞌñisĉan mạyedyeꞌ mọtsimꞌ. Paj meꞌ.

Ñịbedyes qui namꞌ jịꞌĉojtiñeꞌyaꞌ Cristodyes, jam raꞌ tsị́catyetiñeꞌ miꞌin, yoshoropaij jétinte ramꞌ Jenꞌ ĉaĉaij na Cristoty aty miꞌin.

Aty c̣hẹiꞌyaꞌ jadyic raꞌ räj ọij jac, jämꞌ ĉujcatac, rụij dyijyejamꞌ tupuj qui cọdyetinte Jenꞌ.

Chätidyeꞌ, mạꞌjeyacdyety yụ, jam raꞌ äjyi miꞌin därsiꞌ ñịbedyes jịꞌĉojtiñeꞌ jụijyaꞌ miꞌin, mijam raꞌ yi miꞌin: "¿Junꞌ buty meꞌ joꞌmes jịꞌĉojtyejaꞌ?" Dadamꞌ maꞌjovac jịꞌĉojtacdyeꞌĉan miꞌin, yojdyemꞌ muꞌ Cristo ñịbeꞌ cạveꞌ jiquej u, meꞌ buꞌyidye raꞌ shupqui miꞌin. Meꞌ raꞌ chat dadamꞌ cätssistum maꞌjodyeꞌ shupqui miꞌin, atsijbanyaꞌ muꞌ Cristo aty jiꞌcavitiyaꞌ ferdyeꞌ muꞌ.

Chimeꞌdye jiꞌdyäquitac ĉụiꞌsiꞌĉan acaꞌ miꞌin, jam raꞌ doroiꞌjiĉunꞌdyi miꞌin.

Mọꞌdyes tyi chuc ñịbedyes jịꞌĉojtyeꞌ jụijyaꞌ in, Jenꞌsiꞌyaꞌ dyijyedyeꞌ muꞌ, paj rụij bäꞌyi in paj ĉúti Jenꞌcheꞌ in, muꞌ jämꞌtacsity jiquej muꞌdye raꞌ ñutsjeyacsi judyeyaꞌ jämꞌ ĉọjcacsi ĉaĉaij na muꞌ räjĉan jịꞌcätseꞌtyiꞌ p̂eyacdyeꞌ muꞌ.

Cristos ñịbeꞌ cạveꞌ aꞌ muꞌ, meꞌdye raꞌ miꞌin chimeꞌ jịꞌĉojtiñeꞌ, mọꞌdyes q̂uinꞌ jäꞌmiiꞌtyejamꞌ dyijyedyeꞌĉan miꞌin, vatyquej raꞌ meꞌ ñịbeꞌ cạvetiñeꞌ. Tyi chuc ñịbeꞌ cạveꞌ aꞌĉan jụijyaꞌ muꞌ, aty jam jiꞌsäsdyi juchajyaꞌ, aty raꞌ jam meꞌchuiꞌ aꞌc̣his dyijyedyeꞌ aꞌsiꞌ muꞌ úcheꞌ jaccheꞌ, meꞌdye Jenꞌsimꞌ dyijyedyeꞌ meꞌchupte junꞌ quiꞌ chuc jadyic muꞌ.

Ñäñinac jụijyaꞌ in cäc̣häꞌchucdyeꞌyaꞌ Cristo, maꞌjoij raꞌ mọmoꞌ miꞌin ĉaĉaij na mọꞌ jorojĉanyiꞌ Jenꞌsiꞌ Ạꞌedyeꞌ muꞌ, mọꞌ där mọjoꞌchaꞌ jämꞌsiꞌ, mọꞌ räjĉan tŝútyinacsiꞌ.