Versets bíblics populars de सभोपदेशक 2

Comparteix

जो माणस परमेसवर की निगांह म्ह आच्छा सै, उसनै वो बुद्धि, ज्ञान अर आनन्द देवै सै; पर पापी नै वो दुख भरया काम देवै सै ताके वो उसनै देण खात्तर कठ्ठा करकै ढेर लगावै जो परमेसवर की निगांह म्ह आच्छा हो। यो भी बेकार अर हवा नै पकड़ण के बराबर सै।

माणस कै खात्तर खाण-पीण अर मेहनत करदे होए अपणी जिन्दगी नै सुखी राक्खण के सिवाय और कुछ भी आच्छा कोनी। मन्‍नै देख्या के यो भी परमेसवर की ओड़ तै मिलै सै। क्यूँके खाण-पीण म्ह उसतै घणा ताकतवर कौण सै? अर सुख भोग्गण म्ह उसतै घणा ताकतवर कौण सै?

फेर मन्‍नै दुबारै तै अपणे हाथ्थां के सारे काम्मां ताहीं, अर अपणी सारी मेहनत ताहीं देख्या, तो के देख्या की सब कुछ बेकार अर हवा नै पकड़ण कै बराबर सै, और सूरज कै नीच्‍चै कोए फायदा न्ही।

अर जितनी चिज्जां ताहीं देक्खण की मन्‍नै लालसा करी, उन सारया नै देक्खण तै मै न्ही रुक्या; मन्‍नै अपणा मन किसे ढाळ का आनन्द भोग्गण तै न्ही रोक्या क्यूँके मेरा मन मेरी सारी मेहनत कै कारण आनन्दित होया; अर मेरी सारी मेहनत तै मन्‍नै योए भाग मिल्या।

फेर मन्‍नै देख्या के चाँदणा अँधेरे तै बढ़िया सै, उतणी बुद्धि भी बेकूफी तै बढ़िया सै।

जो बुद्धिमान सै, उसके सिर म्ह आँख होवै सै, पर बेकूफ अँधेरे म्ह चाल्‍लै सै; फेर भी मन्‍नै जाण लिया के दोनुवां की हालत एक जिसी होवै सै।

क्यूँके इसे माणस भी सै, जिसका काम मेहनत अर बुद्धि अर ज्ञान तै होवै सै अर कामयाब भी होवै सै, फेर भी उस ताहीं इसे माणस की खात्तर छोड़ जाणा पड़ै सै, जिसनै उस म्ह कुछ भी मेहनत न्ही करी हो। यो भी बेकार अर भोत-ए बुरा सै।