Versets bíblics populars de FILIPAAI DIMA 2

Comparteix

Yan di kyɛ ka beem bee fugbu bɛ ya saani, amaa ya sigsima ya mansi n‑tiri taaba, ka kyɛ ka ya sɔkam gɔsiri u taraana yɛla, ni, u tibsi n‑gaari u mammaŋŋa. Ya kyɛ ka ya sɔkam ba'a bɛ la u taraana bukyi ni, pa la u mammaŋŋa dinni.

Ya laa n‑kyɛ ka ya sufu ni teesa dɔli la ya taaba beebu Kirisita Yisa Masiiya saani. Dama ŋɔn Yisa muna#:

U kur mari la Naawunni beesigu saha kam, Ka di zugu u bu yɛli, ni, u faama lala beesigu Ni u ti sa'ai ni Naawunni beebu. U daa sigsi u maŋŋa n‑kyɛ u toori yuubu yɛla zaa; U daa zaŋŋi u maŋŋa n‑labgi daabri, Ka laa n‑ŋmanni hoo ninsaalidima. Ka ŋɔn daa baŋŋi, ni, u ŋmanni hoo ninsaala, U daa sigsi u maŋŋa ka daa sakki kum - halli dɔpulli zugu kum gba.

Dama Naawunni kur kpalim m‑bɛ ya saani, ka ŋɔn la'amni n‑tumna, ni ya ti sakki ŋɔn boori seem ka laa n‑nyaŋŋi n‑tum.

Dinzugu Naawunni daa duusi u n‑tibgi u zaa, Ka ti u yuuri Ka ka gaari yuya zaa. Dinŋɔ zugu ka sɔkam zaa nin ti gbaani u tooni: Ban bɛ saazugu nin gbaani u tooni, Ban bɛ duniya wa ni gba nin ti gbaani u, Ni ban bɛ tinlɔŋŋu ni gba m‑paasi. Ka sɔkam zaa nin ti mooli u yuuri Ka sakki, ni, Yisa Kirisita nyɛ la ti Dugma, Ka di kyɛ ka u Ba Naawunni nya gyirima.

Tɔ; ya kpalimma n‑tumni lala ka di kyɛ ka birisigu ni nangbankpeemni ti bɛ ya saani. Ka lala zugu nin kyɛ ka galinsi seelli ku paai ya, ka ya nin nyɛ la Naawunni bisuma m‑bɛ duniya wa dima sunsukkuni, halli ni ba zaa n nyɛ tumbeeri dima zaa yɔri. Ya nin ŋmanni hoo saŋmariwuusi ŋɔn nɛ seem la, ka ba nin nya.

M mabiisi, di veeli pam yan daa sakki n‑ti ma, man ŋɔn daa bɛ ya saani la, halli ni man laa n‑ka ya saani wa gba. Amaa ya kur kpalimma n‑kpaŋŋni ya mansi n‑tumna, ni ya ti paai ya tuliginsim zaa ni nimmoosi.