Versets bíblics populars de Romaanos 11

Comparteix

Tan jankʼalxh inqʼa kam s-kaqaayil, quBʼaal Tiuxh txhejsan, atz quBʼaal Tiuxh nik atinsan, atz quBʼaal Tiuxh nik ichiibʼisal taʼn. Echetz aʼ, u quBʼaal Tiuxh, laʼ oksal iqʼij s-txheel, atz t-inqʼa jattanulxh yaʼbʼ uvaʼ laʼ uli. Tul echxh laʼ ibʼane.

¡Sibʼxhte vimamala txumbʼal u quBʼaal Tiuxh; tul mam yol u tootzaqibʼal quBʼaal Tiuxh! Tan ¡yeʼxhabʼil invaʼq laʼ bʼen s-te kam titzʼabʼal tiʼ taqʼax kuʼ yol tinuqul! Atz ¡yeʼxhabʼil invaʼq laʼ oleʼv tiʼ tootzaqileʼ kam uvaʼ kʼaqel taʼn quBʼaal Tiuxh!

Tan ech nik tal viyolbʼal quBʼaal Tiuxh s-eche: —¡Yeʼxhabʼil invaʼq ootzaqin tetz kam titzʼabʼal quBʼaal Tiuxh! Atz ¡yeʼxhabʼil invaʼq laʼ aqʼon itxumbʼal quBʼaal Tiuxh tiʼ kam uvaʼ nik ibʼaneʼ! —chich u yol.

Echatetz kuxhte tuulbʼal inqʼa qʼij s-txheel. Tan txaich kuxh vet tant inqʼa tij imam Israeel, inqʼa qat toybʼa quBʼaal Tiuxh ivatz tuchʼ vibʼaʼnil. Qatetz ikʼutxh quBʼaal Tiuxh vibʼaʼnil te inqʼa tij imam Israeel tiʼ itxajteʼl sitenam, poro jit tiʼ kam invaʼq uvaʼ qat ibʼana. Pet eche tiʼ koq kam invaʼq uvaʼ qat ibʼana, tul jitetz vet bʼaʼnile uvaʼ qat ikʼutxh quBʼaal Tiuxh s-te.

Pet txumbʼalimaletz toq valt sete, ex inqʼa jit tij imam Israeel. Tan ech etatin, eche iqʼabʼ viʼoq oliivo uvaʼ nik kuxh titzʼ jaqʼ tzeʼ. Aʼetz inqʼa tij imam Israeel ech tatin, eche bʼaʼnla oliivo. Echetz qat ibʼan quBʼaal Tiuxh tiʼ teesal el joloq inqʼa tij imam Israeel, eche teesal el joloq itzaqail iqʼabʼ tzeʼ. Tul aʼetz vet ex, inqʼa jit tij imam Israeel, qat toksa ex quBʼaal Tiuxh s-tuul, eche nik itxhunal ok viqʼabʼ u oliivo uvaʼ nik kuxh titzʼ jaqʼ tzeʼ kʼatz vikutxhmal u bʼaʼnla oliivo. Echetz nik ekʼult vet u bʼaʼnil uvaʼ tal quBʼaal Tiuxh taqʼax te inqʼa kʼuy imam inqʼa Israeel, eche nik ikʼult vet viqʼabʼ u jaqʼ tzeʼil oliivo vibʼaʼnil u taqʼil u bʼaʼnla oliivo. Kʼuxhetz mam bʼaʼnil nik ekʼul veteʼ, ex inqʼa jit tij imam Israeel, poro yeʼl ex laʼ etaqʼ bʼen etibʼ s-nim viʼ inqʼa tij imam Israeel, inqʼa ech tatin, eche viqʼabʼ u bʼaʼnla oliivo. Pet aʼ laʼ etulsa sekʼuul uvaʼ jit aʼ, ex nik chʼijsan inqʼa tij imam Israeel, eche u qʼabʼ oliivo uvaʼ jit aʼ nik chʼijsan u taqʼil. Pet aʼl aʼe, uvaʼ nik chʼijsan ex, eche viqʼabʼ u oliivo uvaʼ nik itxhunal ok tiʼ u bʼaʼnla oliivo. Tan aʼ vet u taqʼil u bʼaʼnla oliivo nik chʼijsan.