Versets bíblics populars de Romaanos 10

Comparteix

Aʼetz inqʼa yole inqʼaa: Tan jaʼl uvaʼ laʼ alon uvaʼ: —Aʼ Jesuuse vinBʼaal, —chaqe, tul laʼ tzaj t-taanima viqejexeʼ uvaʼ, aʼ u quBʼaal Tiuxh itzʼeʼvsan u quBʼaal JesuKriisto, kʼuxh maʼtich ikam veteʼ, tul chiteletz vet tiʼ yeʼ ibʼen tu kʼaxkʼo tiʼ inqʼa ipaʼv laʼ ibʼana.{*}

Tan oq tavaanimaxh laʼ tzajk viqeex u quBʼaal JesuKriisto, tul jitetz vet axh aj paʼvome vatz quBʼaal Tiuxh laʼ ibʼana. Atz tiʼ aalt vatz tenam tuchʼ vatziʼ uvaʼ, aʼ Jesuuse vaBʼaal, tul chiteletz vet axh tiʼ yeʼ abʼen tu kʼaxkʼo tiʼ inqʼa apaʼv.

Tan, tiʼ uvaʼ nik tabʼi inqʼa xaol viyolbʼal quBʼaal Tiuxh, tul nik ikʼuqbʼa ikʼuul tiʼ quBʼaal Tiuxh. Tul tzitzi nik tabʼit inqʼa xaol viyolbʼal quBʼaal Tiuxh uvaʼs nik ex paxsaloq inqʼa bʼaʼnla txhaq yol s-xoʼl tiʼ u Kriisto.{*}

Tan ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche: —Jatvaʼl uvaʼ laʼ kʼuqbʼan ikʼuul tiʼ u Kriisto, tul yeʼl paqul laʼ txhoʼn s-te vinimataʼ, —chich u yol. Tan yeʼl nim, yeʼl txhʼoj vatz quBʼaal Tiuxh, kʼuxh tijaq imam Israeel, atz kʼuxh jit tijaq imam Israeel. Tan vaʼl kuxhte u Tiuxh u quBʼaal s-qukaqaayil, atz vaʼl kuxh tatin s-qiibʼa. Tul sibʼxh vibʼaʼnil nik taqʼ tiibʼa inqʼa nik niman, atz inqʼa nik natxhkʼuulan. Tan ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche: —Jatvaʼl uvaʼ laʼ natxhkʼuulan Tiuxh tiʼ ijaqax ikuya s-te, aʼetz uvaʼe, laʼ chitix tiʼ yeʼ ibʼen tu kʼaxkʼo tiʼ inqʼa ipaʼv, —chich u yol.

Atz keʼchetz laʼ ibʼen vaʼq paxsan tetz u yol s-xoʼl, oq yeʼxhabʼil laʼ txhaqon bʼen. Tan ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh tiʼ jaʼl u xaol uvaʼ laʼ bʼen paxsan viyolbʼal quBʼaal Tiuxh tiʼ u Kriisto s-eche: —¡Chiibʼebʼalxh jaʼl u xaol uvaʼ laʼ bʼen alon tok bʼaʼnil xoʼl inqʼa xaol tuchʼ quBʼaal Tiuxh; atz laʼ bʼen ipaxsa inqʼa bʼaʼnla txhaq yol! —chich u yol.

Pet keʼchetz laʼ inatxhkʼuulat inqʼa tij imam Israeel quBʼaal JesuKriisto, oq yeʼx ikʼuqbʼat ikʼuul s-tiʼ. Atz keʼchetz koq laʼ ikʼuqbʼat inqʼa tij imam Israeel ikʼuul tiʼ u quBʼaal JesuKriisto, oq yeʼx tabʼitaʼ uvaʼ at quBʼaal JesuKriisto. Atz keʼchetz koq laʼ tabʼitaʼ, oq yeʼxhabʼil laʼ bʼen paxsan inqʼa bʼaʼnla txhaq yol tiʼ Jesuus s-xoʼl.

Tan aʼ nikich motx titzʼa uvaʼ, tiʼ inimal inqʼa bʼekʼbʼal laʼich kuyuxik inqʼa ipaʼv. Pet yeʼ motx bʼen s-te uvaʼ, aʼ vet u quBʼaal JesuKriisto ul tzoqpisan inimal inqʼa bʼekʼbʼal tuchʼ inqʼa motx palka. Echetz yeʼ motx bʼen s-te uvaʼ jankʼal inqʼa xaol nik niman quBʼaal JesuKriisto, tul jit vet aj paʼvom vatz quBʼaal Tiuxh laʼ ibʼana.