Versets bíblics populars de Efeesios 5

Comparteix

Echetz antxh ebʼan u bʼaʼnla itxumbʼal quBʼaal Tiuxh. Tan tira at taanima setiʼ, eche vaʼq bʼaala tiʼ kʼaol imeʼal. Tul aʼxh ebʼan uvaʼ atoq etaanima setiʼ sevatzaq, eche u quBʼaal JesuKriisto uvaʼ atxh taanima setiʼ. Tan taqʼ tibʼ kamoq setiʼ. Tul ech taqʼt tibʼ setiʼ, eche invaʼq u oya, atz invaʼq txoo uvaʼ oqxh itxʼumal itzʼeʼsal ok vatz quBʼaal Tiuxh.

Echetz noqxh etil etibʼ tiʼ vetatineʼ, tul yeʼ laʼ paʼvin ex. Tul jit ech laʼ ebʼan, eche inqʼa xaol inqʼa yeʼ kuxh nik ibʼen yol s-te. Pet ech laʼ ebʼan, eche inqʼa xaol, inqʼa atxh itxumbʼal tiʼ tatineʼ. Echetz bʼanvaqxh u bʼaʼn loqʼxhte laʼ utxh ebʼant s-txheel, tan aʼ u yeʼbʼaʼn yakʼinaʼql ibʼanaxeʼ.

Tul yeʼl ex laʼ qʼabʼan ex tiʼ tukʼal qʼuʼich taʼl uuva, tan kantxhaq vet uvaʼ laʼ ebʼan taʼn; atz yeʼl maqo ibʼ taʼn. Pet aʼl bʼaʼn uvaʼ tira aʼ viTiuxhil Tiuxh tira laʼ bʼanbʼen ex tiʼ ibʼanax u bʼaʼn. Tul bʼitzoqvaq ex: Bʼitzlevaq inqʼa Saalmo sevatzaq; atz bʼitzlevaq inqʼa bʼitz sevatzaq; atz bʼitzlevaq kam kuxh bʼitzil uvaʼ iqʼij quBʼaal Tiuxh laʼ ok s-tuchʼ. Tul oksavaq iqʼij quBʼaal Tiuxh tuchʼ inqʼa bʼitz laʼ tzaj tetaanima. Tul bʼenamen laʼ etaqʼ taʼntiuxh te Tiuxh, u quBʼaal, tiʼ jankʼal inqʼa bʼaʼnil uvaʼ qat ibʼan u quBʼaal JesuKriisto s-qiʼ. Tan aʼ u bʼije uvaʼ nik qunatxhkʼuula.

Tul jit kuxh ex sotznaʼq kʼuul laʼ ebʼana. Pet aʼ etabʼi jabʼiste uvaʼ nik isaʼ quBʼaal Tiuxh, tul aʼxh ebʼane.

Atz kʼuxh inqʼa tzumela, tan laʼ ikʼayi taanima tiʼ isaʼax u tixqel, eche ikʼayit quBʼaal JesuKriisto taanima tiʼ inqʼa niman tetz, tul tetxhal taqʼ tibʼ quBʼaal JesuKriisto kamoq s-tiʼ.

Echiche vetatin s-jatxhaq tzaan, tan tira yeʼich etootzaql vinuqul viyolbʼal quBʼaal Tiuxh, eche ixaon invaʼq xaol tu tokto. Petetz vet uvaʼ s-txheel, tan qat etootzaqil vet inuqul viyolbʼal quBʼaal Tiuxh tiʼ enimat u quBʼaal Jesuus, ech vete ixaon invaʼq xaol uvaʼ iqʼomal itxiqubʼal taʼn. Echetz aʼ ekʼutxh vet u bʼaʼnla txumbʼal, tan ex vet kʼaol imeʼal quBʼaal Tiuxh uvaʼ echatxh, eche u txiqubʼal.

Tul nimavaq etibʼ sevatzaqil. Echetz laʼ ekʼutxhte uvaʼ nik eqeon vatz quBʼaal JesuKriisto.

Tan jankʼal inqʼa ixoq, inqʼa at itzumel, tan laʼ toksa tibʼ jaqʼ ibʼekʼoʼm vitzumel, eche nik qoksat qibʼ jaqʼ vibʼekʼoʼm u quBʼaal JesuKriisto, oʼ inqʼa niman tetz.

Aʼetz inqʼa yol nik val sete, uvaʼ jununil ex inqʼa tzumela, atoqxh etaanima tiʼ vetixqel laʼ ebʼana, eche vetaanima setiʼ sejunal. Atz echat kuxh u ixoqe inpaqte, tan atoq tatin vitzumel s-vatz laʼ ibʼana.

Echetz atxhvabʼalxhtuʼ uvaʼ ech laʼ ibʼan jatvaʼl inqʼa tzumelae te tixqel. Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche: —Tul laʼ taqʼ ka u vinaq vitxutx ibʼaal. Tul laʼ ikʼul tibʼ u vinaq tuchʼ u tixqel. Tul vaʼl kuxh vet itxhiʼoʼl tuchʼ u tixqel laʼ ibʼana, —chich u yol.

Pet jit ant ex laʼ bʼanon inqʼa yaabʼla txhaq txumbʼal uvaʼ yeʼxhkam invaʼq bʼaʼn laʼ taqʼa, inqʼa nik ibʼan inqʼa xaol, inqʼa at bʼen tu tokto, inqʼa yeʼ ootzaqin tetz quBʼaal Tiuxh. Tul yeʼ laʼ ebʼan vet inqʼa yaabʼla txhaq txumbʼal inqʼae. Pet aʼl laʼ etalt vinuqul te u xaol tiʼ u paʼv uvaʼ nik ibʼaneʼ.