Versets bíblics populars de Efeesios 4

Comparteix

Pet aʼ ebʼan uvaʼ ayaʼlxh bʼaʼn sete. Atz laʼ toybʼa tibʼ evatz sevatzaq. Tul laʼ ikuy tibʼ epaʼv sevatzaq, eche uvaʼ qat ikuyt quBʼaal Tiuxh epaʼv taʼn vibʼaʼnil u quBʼaal JesuKriisto.

Tul yeʼ laʼ etaqʼ bʼen etibʼ s-nim. Pet tzʼuʼkinla xaol ex laʼ ebʼana. Tul laʼ etiqʼo kuʼl etibʼ tuchʼ vetxumbʼal; atz laʼ ekotxʼ evatz kʼatz vemol, tiʼ uvaʼ at etaanima setiʼ sevatzaqil.

Poro yeʼl invaʼq txʼiila yol laʼ etala. Pet aʼ laʼ etal bʼaʼnla txhaq yol uvaʼ lotxhoʼm laʼ ibʼan tiʼ ichʼij inqʼa xaol kʼatz quBʼaal Tiuxh. Tul bʼaʼn laʼ elkaʼp te inqʼa xaol inqʼa nik abʼin.

Echetz tira yeʼ laʼ ebʼan vet jankʼalxh inqʼa yeʼbʼaʼn inqʼaa: kʼayunchil, ulchil viʼ, kʼaʼnal, txʼetxʼuʼm tiʼ yaj, yoqʼoʼm, atz jankʼalxh inqʼa yeʼbʼaʼn.

—Oqetz laʼ ul ekʼaʼnal, poro laʼ emaq etibʼ tiʼ epaʼvin taʼn, —chich viyolbʼal quBʼaal Tiuxh uvaʼ tzʼibʼamal ka. Pet jit tetxhal kuxh ikuʼ qʼij sete tuchʼ kʼaʼnal. Atz echetz yeʼ laʼ etaqʼt tokebʼal Satanaase sekʼatza tiʼ ekuʼ t-paʼv.

Echetze inqʼa txumbʼal uvaʼ jit ikʼulel nikich motx ebʼan s-jatxhaq tzaan, tul jalpuvaqetz veteʼ. Ech eteesat el, eche laʼ ikʼonil el invaʼq kam uvaʼ yeʼl vet itxaʼk. Tan aʼ u kantxhaqla txumbʼale uvaʼ chianaʼqich kuxh ibʼanax sete s-jatxhaq tzaan. Tan ayaʼl inqʼa tatxhaʼv vetxhiʼoʼle uvaʼ nik eesan ex t-bʼey. Pet aqʼvaq etibʼ, tul laʼ jalp vetitzʼabʼal taʼn quBʼaal Tiuxh. Tul laʼ ekʼul vaʼt akʼ txumbʼal laʼ taqʼ sete. Tul aʼ ekʼutxh vet inqʼa bʼaʼnla txumbʼal uvaʼ taqʼ quBʼaal Tiuxh sete uvaʼs etok s-niman tetz Jesuus. Tan aʼ u akʼ txumbʼale uvaʼ iviinqixsa sekʼatza, uvaʼ ech, eche vitxumbʼal quBʼaal Tiuxh. Aʼetz laʼ ebʼan u jik, atz laʼ ejetxhoʼk etibʼ kʼatz quBʼaal Tiuxh, eche uvaʼ nik tal inqʼa bʼaʼnla txhaq yol tiʼ Jesuus, uvaʼ inuqulxhtuʼ.

Tul bʼanvaqxh yaʼl tiʼ ibʼanax eela eyol, tiʼ uvaʼ vaʼl kuxh vet etxeyex taʼn viTiuxhil Tiuxh. Tan aʼ nik isaʼ viTiuxhil Tiuxh uvaʼ laʼ atin bʼaʼnil sexoʼl sevatzaq. Tan vaʼl kuxh viTiuxhil Tiuxh at sekʼatza.

Tul antxh quBʼaal JesuKriisto aqʼon vet tiqleʼm inqʼa niman tetz. Tan at inqʼa toksa quBʼaal JesuKriisto siapoostol. At inqʼa toksa quBʼaal JesuKriisto s-qʼexsan tetz viyolbʼal. At inqʼa toksa quBʼaal JesuKriisto s-paxsan tetz inqʼa bʼaʼnla txhaq yol s-tiʼ. At inqʼa toksa quBʼaal JesuKriisto s-iqʼon iviʼ xoʼl inqʼa niman tetz. At inqʼa toksa quBʼaal JesuKriisto s-txhusul tetz inqʼa niman tetz. Tan aʼ titzʼabʼal quBʼaal Tiuxh uvaʼ laʼ motx ichʼijsa txha vet inqʼa niman tetz Jesuus uvaʼs laʼ taqʼax jatvatzul taqʼon quBʼaal Tiuxh s-te, eche u qutxhiʼoʼl uvaʼ nimlen elnaʼqle. Tan jabʼiste kuxh aqʼon nik ibʼan junun, echetz laʼ itxhusuxe vitenam quBʼaal Tiuxh tiʼ ibʼanax inqʼa bʼaʼnla txhaq bʼanoʼm. Tan aʼ isaʼ uvaʼ vaʼlxh quyol tiʼ inimal inqʼa bʼaʼnla txhaq yol tiʼ Jesuus. Atz vaʼlxh quyol tiʼ qootzaqit viKʼaol quBʼaal Tiuxh; atz tetxhal quchʼij tuchʼ u qutxumbʼal kʼatz quBʼaal Tiuxh, atz tuchʼ u qutxhabʼat tiqʼol viyolbʼal quBʼaal Tiuxh s-bʼaʼn, tetxhal qopoon tiʼ qubʼant eela tuchʼ vitxumbʼal u quBʼaal JesuKriisto.

Echetz yeʼ qaqʼ qibʼ eesaloq t-bʼey taʼn inqʼa xaol, inqʼa txhabʼamal kuxh subʼuʼm taʼn, atz kam kuxh invaʼtoʼq txhusbʼal laʼ itxhuli. Pet jit ech oʼ qubʼan, eche invaʼq neʼ uvaʼ tal kuxh laʼ bʼenk u titzʼabʼal. Atz jit ech oʼ qubʼan, eche invaʼq vaarko uvaʼ tal kuxh laʼ iqʼolik taʼn kaqiqʼ jabʼal. Pet aʼxh qal vinuqul s-quvatzaq. Tul aʼxh laʼ qukʼutxh uvaʼ atxh qaanima s-qiʼ s-quvatzaq tiʼ talax vinuqul. Echetz laʼ quchʼije tiʼ tiqʼol viyolbʼal quBʼaal Tiuxh s-kaqaayil, eche uvaʼ ibʼan u quBʼaal JesuKriisto, u quqʼesal, uvaʼ ech tatin, eche u quviʼ tiibʼa u qutxhiʼoʼl.