Nahumu 2
2
Kuguwa kwa Ninawi
1Gwee Ninawi mngondu kiza kukukomanga.
Guloleri maboma gaku!
Gutuli ulolera mnjira
guweri kala!
Gujojoniri mashonta gaku goseri! 2Mtuwa Mlungu kankumwuzilira Israeli nemera yakuyi, nakaka, hawapanani kayi nemeru yawu,
3Nzegeyu za wamashonta wakuyi ndo nsheri,
wanjagira wakuyi wavala nguwu nsheri nentu.
Matayili yagakwegwa na farasi gang'ereng'eta nentu,
farasi wanyamalandiri kwa nfiru ya kukomanga.
4Mbutuka za kukwegwa na farasi zyankutuga munjira,
zigenda aku na aku mluwaga.
Zimilika handa mambamba ga motu!
Zituga kalongola gambira umemi.
5Mkulu gwa mashonta kasyagula Wamashonta waherepa kugenda kulongolu,
pawatuga walikwala,
watenda kalongola kugenda kushibambaza
kulitanda kwa makomangu.
6Migomi ya nshemba ivugulwa,
na liboma lya mfalumi liguwa.
7Mji guwera lupalahera nakamu,
wantu watolwa lopola.
Wadala wakuyi wankudaya gambira ng'unda,
na walikomangakomanga muvifuwa vyawu kwa hinginika.
8Ninawi iwera gambira litanda lyalibomokiti,
wantu wakuyi watuga vuluvulu. Wantu wankula pawalonga,
“Mgoloki! Mgoloki!”
Kumbiti kwahera ata yumu yakawuya kumberi.
9Mtoli lopola za feza,
mtoli zahabu!
Toziya luhanja lwakuyi lwahera upeleru!
Kwana uvuwa wa kila shintu sha mana!
10Ninawi gwagamiziwa, Ninawi gwagamiziwa!
Wantu wawera na lyoga, manung'unu galendemera,
makakala gawapelera, vyeni vyawu viwera mbuu.
11Lyakoshi vinu lipanga lya simba,
pahala peni wawaliyiziya wana wawu?
Peni simba mpalu na simba mdala wagenda, peni wana wa simba wagenda pota kutira shoseri?
12Simba mpalu kawapapulira wana wakuyi vinofu vya kutosiya,
kawabatira simba wadala mawinka gawu,
kazimemiziya mbaga zakuyi mawinka,
na pahala pakuyi pakulikala vinofu vya nyama.
13“Neni na mkondu gwaku!” Mtuwa Mlungu Yakana Makakala goseri kalonga hangu. Hanizilunguziyi mbutuka zaku za kukwegwa na farasi, haniwalagi wana simba waku wantemba kwa ligumba, lopola yaguzilopoliti hanizagamiziyi kulawa muisi na liziwu lya walagilagi waku hapeni lipikiniliki kayi.
The Bible version in the Pogoro Language. @The Word for The World International and Pogoro Language translation. All rights reserved.