Chiyambo 3
3
Kwananga kwaku Adamu ndi Eva
1Sono njoka yenga yakuchenje kwakuruska chamoyo chose chamu dondo cho Ambuya Chiuta wanguchita. Yinguti ku munthukazi, “Kumbi Chiuta wanguti, ‘Mungarghangapo cha vipasi vya muti we wose wamu munda wo’?” 2Ndipo munthukazi wanguti ku njoka yo, “Tingarghapo vipasi vya miti yamu munda; 3kweni Chiuta wanguti, ‘Kuti mungarghapo cha vipasi vya muti wo we mukati mu munda; chingana nkhuwukwaska, vinu mungafwa.’ ” 4Kweni njoka yo yinguti ku munthukazi, “Kuti mukafwanga cha. 5Pakuti Chiuta waziŵa kuti penipo murghengepo cho, maso ghinu ghakajurikanga, ndipo mukaŵanga uli ndi Chiuta, wakuziŵa umampha ndi uheni.” 6Viyo penipo munthukazi wanguwona kuti muti wo wenga wamampha kurgha, ndi so kuti wenga wamanyanda mu maso, ndi kuti muti wenga wakukhumbikwa kupaska zeru, wanguto chipasi ndi wangurgha; ndipo wangupaskako so murumi wake, ndipo wangurgha. 7Sono maso ghaku wo ŵaŵi ghangujurika, ndipo ŵanguziŵa kuti mbankhuli; ndipo ŵangusonerezgana mani gha mkuyu ndi ŵangujichitiya matheŵera. 8Ndipo ŵanguvwa muswayo wa Ambuya Chiuta wachenda mu munda pa msana wakuzizila; ndipo munthu yo ndi muwoli wake ŵangubisama ku chisku cha Ambuya Chiuta mukati mu miti yamu munda. 9Kweni Ambuya Chiuta wangudanirizga ku munthu yo, ndi wanguti kwaku iyo, “We pani?” 10Ndipo iyo wanguti, “Ndinguvwa muswayo winu mu munda, ndipo ndingopa chifukwa ndenga nkhuli; ndipo ndingubisama.” 11Iyo wanguti, “Njani wangukunene kuti wenga nkhuli? Kumbi wargha vya muti wo ndingukuchenjezga kuti ungarghapo cha?” 12Munthu yo wanguti, “Munthukazi yo mungundipaska kuŵa nane, ndiyo wandipaska chipasi cha muti wo, ndipo ndargha.” 13Sono Ambuya Chiuta wanguti ku munthukazi, “Nchine ichi cho wachita?” Munthukazi wanguti, “Njoka yo yingundinyenga ndipo ndingurgha.” 14Ambuya Chiuta wanguti ku njoka:
“Chifukwa wachita ichi,
ndiwe wakutembeka kuruska vyakuŵeta vyose,
ndi nyama zose zamu dondo;
pamoyo pako ndipo wendiyenge,
ndipo ukarghanga fuvu mazuŵa ghose gha umoyo wako.
15Ndikaŵikangapo umawongo pakati pako ndi munthukazi,
ndi pakati pa mphapu yako ndi mphapu yake;
iyo watemenge mutu wako,
ndipo iwe utemenge chitende chake.”
16Ku Munthukazi wanguti:
“Ndikandaniskanga ukongwa urwirwi wako pakuzuwuka,
ukapapanga ŵana mu urwirwi;
kweni utunthwiyenge murumi wako,
ndipo iyo watufuliyenge iwe.”
17Ndipo kwaku Adamu wanguti:
“Chifukwa wavwiya mazu gha muwoli wako,
ndipo warghapo muti wo ndingukuchenjezga kuti,
‘Ungarghanga cha,’
njakutembeka nyata yo chifukwa chako;
mu kutakataka ukarghanga vyake mazuŵa ghose gha umoyo wako;
18minga ndi visoyo vikakumezgiyanga,
ndipo ukarghanga vya miti yamu dondo.
19Ukarghanga chiŵande,
mu dukutira la chisku chako
mpaka penipo uweriyenge ku nyata.
Pakuti ungutoleka mwenimo;
ndiwe fuvu, ndipo ukaweriyanga ku fuvu.”
20Munthu yo wangudana zina la muwoli wake Eva, chifukwa wenga nyina wa ŵamoyo wose. 21Ndipo Ambuya Chiuta wanguchitiya Adamu ndi muwoli wake vivwalo vya vikumba, ndi wanguŵavwalika.
22Sono Ambuya Chiuta wanguti, “Awona, munthu yo waŵa nge njumoza nafwe, kuziŵa umampha ndi uheni; ndipo sono, vinu wangatambaluwa janja lake ndi kutoko so vya muti wa umoyo ndi kurgha ndi kuja wamoyo muyaya.” 23Chifukwa cho Ambuya Chiuta wangumutuzga mu munda wa Edene, kwachilima nyata kwaku yeniyo wangutolekako. 24Wangumudikiskiya kubwalo munthu; ndipo ku vuma kwa munda wa Edene wanguŵikako ŵaKerubi,#3.24 ŵaKerubi: aŵa mbangelo ŵakuŵala ukongwa. ndi lipanga lakulipuka lo lang'anamukiyanga kose-kose, kuvikiriya nthowa yakuya ku muti wa umoyo.
Избрани в момента:
Chiyambo 3: TongaMw
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Bible Society of Malawi