मत्याल 16
16
येसु परुसिरा, सदुकिरा तप तोहतह्तोग़
(मार्कल 8:11-21)
1पया पेग़्के “देवुळ नीक लोहता इन्जि, माक उंदि सीना तोहा,” इनजोरे सदुकिर, परुसिर, वेर रेंड तुंगानोर उय्तुर, येसुना पट ऊळलाहि, ओनगा वासि ओन ताल्ह्कतोर. 2अस्के येसु वेरिन इतोग़, “मीटु पोग़ोन मोयुलतके ऊळिसि नेह्ना, लाग्वा दिया पुनदलाह उसर मह्निर. नुल्पे इह्निर, ‘कम्कल मोयुल मन्ह्ता अस्के, नाळताह पेग़ वावो, पङ्ने आयग़ा.’ 3ओसो नग़्कम कार्यल मोयुलताङ कोकिन ऊळिसि मीट इह्निर, ‘नेंड गंगा पोयता, दूंद-मुर्गम आयग़ा.’ मीटु पोग़ोटा मोयुलतुन गंता कीस पुह्निर, मति इद कालमते देवुळ बाताल कीस्ता, ताना अर्तम मीट पुनदा पग़विर!#लूकाल 12:54-56 4लाग्वोरु, देवुळतुन केंजवोरु, नावाङ बेरा डीसाताङ कबस्किन ऊळतोरु, इद पीळतोरु सीना ताल्ह्किह्तोर. मति योनाल इनवाल देवुळता कबुरतोन्क बह बह आता, सिरप अदे सीना नना ओरिह्क तोहतकन, तान विळ्सिस दुस्रा सीना तोहोन,” इन्जि येसु ओरिन वेहतोग़. पया ओग़ तनाङ कग़यवालोर बार ओरिन विळ्सिस अतोर.#16:4 इद बेद्रमता सीना मन्ह्ता इन्जि, मत्याल 12:39-40 इगा ऊळाटु.
5सम्दुरतुन वेंडिसि अबर बाजे अतस्के, “अरे! माट आरिङ ततलाह माग़्ङतल, रा,” इन्जि कग़यवालोर सीता कीतोर. 6अस्के येसु ओरिन वेहतोग़, “परुसिर, सदुकिर, वेरा ओयता पिंडटा लोप्पा उसरते मन्ह्टु,#16:12; 1 कुरिंततोर 5:6; गलातितोर 5:9 ताना अग़दुह्क आयमाट,” इन्जि इतोग़.#16:6 बेद्रमि ओयवद पिंडटगा, उचुन ओयतद पिंड काल्ह्पतेके, पूरा पिंडि ओयिह्ता, अद्रमे परुसिर, एरोद अंतिपस, वेरा लाग्वद काग़्हमुळि, लोकुरगा आबुर आंदु. अदिह्क येसु ओरग्डाह उसरते मन्ह्टु इन्जि वेहतोग़. 7“माट आरिङ तवाह्के बहे, (गूरु माक इह वळ्ह्किह्तोग़,)” इन्जि कग़यवालोर तमा-तमाय वळ्ह्किंदुर. 8तेन पुन्जि येसु इतोग़, “एय विस्वसलेवोरिर, आरिङ इलवाह्कु, मीट बाराह्क इचोन आलिह कीय्ह्निर? 9नाकु आरिना पर्वा इले इन्जि मीट इंका पुनविरा? मुने नना वेट एयुङ आरिने एयुङ अजर्क (5000) मन्कलोरिह्क तीहतन, अस्के तिनदलाह अचोन मयतप मता इतेके, वेल्लाङ डालाने पिसतविन गुम कीतिर, तेना सीता मन्ह्ताया? 10अद्रमे नना वेट एळुङ आरिने नालुङ अजर्क (4000) मन्कलोरिह्क तीहतन, अस्के बेचोक डालाङ आरिङ पिसिसि, तेना तेला सीता मीक इले? 11नना आरिना लोप्पा वळ्ह्कोन आंदन, इदिन मीट बह पुनविर? मति नना ओसो वेहतह्नन, परुसिर, सदुकिर, वेरा पिंडटा लोप्पा उसरते मन्ह्टु,” इन्जि येसु ओरिन इतोग़. 12अस्के गूरु आरिङ पंडनद ओयतद पिंडटा लोप्पा वळ्ह्कोग़ आंदोग़; मति परुसिर, सदुकिर, वेराङ गलत काग़्हमुळता लोप्पा नमनायो इन्जि गूरु वेहतह्तोग़, इद्रम ओर पुतोर.
येसु बोग़ आंदोग़ इन्जि पत्रु पुन्ह्तोग़
(मार्कल 8:27-29; लूकाल 9:18-20)
13येसु तनाङ कग़यवालोरा संगे केसरिया-पिलिपि इनदनद सहरता एरे वातस्के, “लोकुर माने-मन्कना नडुम पुटटोनु, बोग़ इनजोर मनदनुर कोनि?” इन्जि येसु ओरिन ताल्ह्कतोग़. 14अस्के ओर इतोर, “गूरु, निमा मुनेतोग़ बोग़ो कबुरतोग़ जीवा अर्स मनदनोग़ इन्जि, लोकुरा विचर मन्ह्ता. अहे नीक वेल्लाटोरे इन्ह्तोर, ‘एते मीहवाल योहन मनदनोग़.’ ओसो उय्तुर इन्ह्तोर, ‘एलियाल कबुरतोग़ मनदनोग़.’ ओसो इन्ह्तोर, ‘यिर्मयाल कबुरतोग़ मनदनोग़,’ अद्रमे ओसो ‘बोग़ ओर्वोग़ देवुळता कबुरतोग़ मुनेतोग़ मनदनोग़,’ इद्रम इन्ह्तोर,” इतोर. 15“इंगो, मति मीट पया नाक बोग़ इनजोर इह्निर?” इन्जि येसु ताल्ह्कतोग़. 16अस्के सिमोन पत्रु इतोग़, “सामि, निमा इतेके जीवात मनदनद देवुळता मग़निन,#मार्कल 1:1; तोहचीतव पोल्लोङ 2:18 अहे अद लोहतोग़ पिसिह केवानिन किर्स्तुनिन,” इह इतोग़.#मत्याल 4:3; 26:63; मार्कल 1:1; 14:61; लूकाल 22:70; योहन 3:16-18; 11:27; बळयिर 9:20; 13:33
17येसु सिमोनिन इतोग़, “सिमोन, योनाना मग़निन, निमा देय्वातोनिन, बाराह्क इतेके मन्कना बुदते इद पोल्लोतुन निमा पुनविन, मति नावा देवुळदीपतोग़ बाबाल, ओग़े नीक पुनाह कीतोग़.#1 कुरिंततोर 2:9-10 18नीवा पेदिर पत्रु (इतेके ‘बंडाये’) नना तासिह्नन. बेद्रम आदतगा दोहतद लोन डिङ इनाह मन्ह्ता, अद्रमलेह्काने नना इदे आदतगा नावा मुडुन निल्पिह कीकन,#इपिसुसतोर 2:20 अस्के हामुर वने नावा मुडुन आरे कीया पग़वो आयग़ा#16:18 हामुर वने नावा मुडुन आरे कीया पग़वो आयग़ा मोदुल कागिदते: “हानादीपता दर्वजा वने नावा मुडुन गेल्सो आयग़ा.”. 19अहे नना नीवा कयदे देवुळता राजेमताङ तालम कय्क ईतपु, नीक अदिकर ईकन. इतेके निमा ‘इद पोलिह्ता,’ ‘अद पोलो’ इन्जि वेहतेके, नीवा वेहतद पोल्लोतगा देवुळता अदिकर वने मनदग़ा.”#18:18; योहन 20:23 20पया “बोग़ देवुळ लोहवाल पिसिह केवाल वावाल मतोग़, ओग़ ननाने, इदिन बार इंजेके बोने वेहमाट बहा,” इन्जि येसु तनाङ कग़यवालोरिन उकुम ईतोग़.
येसु तना वायना हामुरतुन पुनाह कीस्तोग़
(मार्कल 8:31—9:1; लूकाल 9:22-27)
21अस्केडाहि येसु तनाङ कग़यवालोरिह्कु वेहता बोटटोग़, “नाकु येरुसलेम सहरते दायाय पोयह्ता. अग्डोर पेदल्कु, पेर्मालोर, सास्त्रमगूरुर, नाकु वेल्लाय तिपल कीयनुर, हव्कनुर, ताना पया मूंड दियाने नना तेग़्ककन, इव करलि, अद्रम आयनुङे!”#मार्कल 9:12; 1 कुरिंततोर 15:4 इन्ज वेहतोग़. 22अस्के पत्रु येसुन बाजेते अबर ओसि इतोग़, “सामि, अद विचरे केमा निमा! अह मुर्तिय आयमाकि,” इन्जि येसुना वेहतद पोल्लोता अडम वळ्ह्कतोग़. 23अस्के येसु पत्रुनके मल्स ऊळिस इतोग़, “एय देयमदीपता बुदते वळ्ह्कवानिन,#13:38-39; योहन 8:44; बळयिर 13:10 अद्रमता बुदतुन पोहचीम! निमा नाकु कटळ वाटटप एग़्कुळ आय्ह्निन. नीवा विचरि मन्कना विचरतेह मन्ह्ता, मति देवुळता विचरतके इले,#कुलुसितोर 3:2-3” इनजोर इतोग़.
24पया कग़यवालोरिन येसु इतोग़, “बोर नावाङ कग़यलाह वायना विचर कीस्तोर, ओर तमा हव्कनागुटा कांजतप, नयेनाह्क वायनव तिपल्किन आपिर. ओसो तमाये गिर्दातुन पोहचि, नावा अग़दे ताकिर.#1 पत्रु 2:21 25बोर इद बूमते तमा कुदता जीवातुन पिसिह कीयलाह ऊळिह्तोर, ओर आक्रिते बूळेम आयनुर. मति बोर नयेनाह्कु सबे पोहतह्तोर, ओरिह्क देवुळि पूना जीवा ईयग़ा.#10:39; लूकाल 14:26; 17:33; योहन 12:25 26मन्कल पूरा दुनियातुन गेल्सतोग़ तेला मति, तना कुदता जीवातुन पिववद किसबटटगा लेसिह कीतोग़ इतेके, ओन्क बाताल पाय्दा आयग़ा? नीवा जीवा लेसता इतेके, ताना बद्लातुह्क बातय ईया पग़विन! 27केंजाटु, माने-मन्कना नडुम पुटटोनन, नना नावा बाबाना डीसाते, नावाङ देवतुल्कना संगे वायकन.#यहुदाल 14 अद तूकने नना सबेटोराङ, बोना ओना कबळतुन ऊळिसि, नेयह्क कीकन;#देवुळताङ पाटाङ 62:12; बुदताङ पोल्लोङ 24:12; रोम सहरतोर 2:6; 14:12; 2 कुरिंततोर 5:10; 1 तिसलुनितोर 1:10; तोहचीतव पोल्लोङ 20:12-13; 22:12 28इह केंजाट, नना सेतेम वेहतह्नन, माने-मन्कना नडुम पुटटोनन इद दुनियाते राजेम कीयलाह वायकन अस्के, मियग्डाहि उय्तुर नावा संगे मनवालोरिर, हायनामुनेन नाक ऊळकिर,” इतोग़.
Избрани в момента:
मत्याल 16: माडियाबाय्बल
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2021, Wycliffe Bible Translators, Inc. All rights reserved.