Римвийриз 14
14
Имандал кӀевибурукай ва зайифбурукай
1 Имандал зайиф инсан, адан фикиррикай гьуьжет тавуна, кьабул ая. 2Садан иманди адаз вири недай ихтияр гузва, амма имандал зайифда анжах салан майваяр незва. 3Вири незвай кас акӀ тийизвайдаз виняй килигна кӀандач, ва са вуч ятӀани тинезвайда незвайдак тахсир кутуна кӀандач, вучиз лагьайтӀа а кас Аллагьди кьабулнава. 4Чарадан лукӀрак тахсир кутаз вун вуж я кьван? Ам вичин иесидин патал кӀвачел акъвазнавани ва я ярх жезвани тафават авач, ам мад кӀвачел акъвазар хъийида, вучиз лагьайтӀа иесидивай ам кӀвачел акъвазариз жеда.
5Са ни ятӀани йикъар важиб тирбур ва я тӀимил важиб тирбур яз чара ийизва, амма масад патал вири йикъар сад хьтинбур я. Къуй гьар сад вичин фикиррал кӀевиз акъвазрай. 6Са югъ муькуьдалай важиб яз гьисабзавайда и кар Ребби патал ийизва. Са вуч ятӀани незвайда Ребби патал незва, вучиз лагьайтӀа и тӀуьнай ада Аллагьдиз шукур ийизва. И затӀ тинезвайдани Ребби патал незвач ва Аллагьдиз шукурзава. 7Чакай садани жув паталди уьмуьр тухузвач ва садни жув паталди рекьизвач. 8Чна уьмуьр тухузватӀа, Ребби патал уьмуьр тухузва. РекьизватӀа, мадни Аллагь патал рекьизва. Чна уьмуьр тухузвани ва я чун рекьизвани – Гьадаз талукь я.
9ГьикӀ лагьайтӀа и кар патал Месигьни кьена ва чан хтана, Адакай чан алайбурунни, кьенвайбурунни Агъа хьана. 10Бес вучиз вуна жуван стхадик тахсир кутазва ва я вучиз адаз винедай килигзава? Чун вири Аллагьдин дувандин вилик акъвазда эхир. 11Кхьенва кьван:
«За жуван уьмуьрдал кьин кьазва, – лугьузва Реббиди, –
турус я: зи вилик гьар са мет яда чилиз,
гьар са меци шагьидвалда Аллагьдин» #
Яшай 45:23. .
12Гьа икӀ чакай гьар сада жуван паталай Аллагьдин вилик жаваб гуда.
13Гьавиляй мад сада садак тахсир кутун техъйин. Куь стхадин кӀвач галкӀидай ва ам гунагьдал гъидай хьтин мад са карни тахъвун патал, жув жувал мукъаят хьухь. 14Вич вичелай чиркин са тӀуьнни авачирди заз, Ребби Исадихъ иман ийизвайдаз, чизва ва идахъ зун кӀевелай агъунва. Амма инсанди са вуч ятӀани чиркин яз гьисабзаватӀа, ам гьа кас патал чиркин я. 15Вуна незвай тӀуьн себеб яз ви стхадин-вахан намусдик хкӀазватӀа, вун муьгьуьббатдив кьурвал эгечӀзавач. Вич патал Месигь кьейи стха жуван тӀуьналди барбатӀмир. 16Куьне хъсанди яз гьисабзавайдаз себ гудай багьна инсанриз гумир. 17Аллагьдин Пачагьлугъ тӀуьникайни хъуникай ваъ, Пак Руьгьди гузвай гьахъ-михьивиликай, ислягьвиликай ва шадвиликай ибарат я. 18А саягъда Месигьдиз къуллугъзавайда Аллагьдиз шадвал гузва ва инсанрин патай разивал къачузва.
19Гьа икӀ ислягьвилихъ ва сада садаз несигьат гунихъ тухузвай крар авун патал, ша чна вири къуватар эцигин. 20ТӀуьн себеб яз Аллагьдин крар чӀурмир. Вири тӀуьн михьиди я, амма жуван мукьув гвайди тӀуьнин куьмекдалди гунагьдал гъизвайда пис кар ийизва. 21Як туьтӀуьн, чехир тахъун ва ви стха татабарзавай са карни тавун хъсан я. 22И гьакъиндай ви фикир Аллагьдин вилик кьилдин ви фикир яз хьурай. Жува хкянавайдай жувак тахсир кутун тийизвайди бахтавар я. 23Нез ва гьа са вахтунда вичи кьетӀнавай кар дуьзди тирдал шак гъизвайдак гьакӀни тахсир кутунва, вучиз лагьайтӀа ада вичин имандив кьадайвал ийизвач. Имандив кьан тийизвай вири лагьайтӀа, гунагь я.
Избрани в момента:
Римвийриз 14: ЛезПК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2010-2024