Правілы арганізацыі часу паводле Божага СловаУзор

Сабярэце вашыя забавязаньні

Ісус загадаў, каб нашае слова было “Так — Так”; але ж хрысьціянскае "Так" усё часьцей фактычна азначае "Не". Кожны раз, калі мы не выконваем нашыя забавязаньні, спазьняемся, не завяршаем праект упару, або парушаем нашае абяцаньне з галасавой пошты, што "мы адтэлефануем вам пры першай нагодзе", мы не падпарадкоўваемся Ісусаваму загаду, каб нашае слова было "Так — Так". У нашым паскораным жыцьці мы часта кажам "Так", нярэдка пры гэтым парушаючы нашыя абяцаньні. Той факт, што гэты грэх падаецца такім бяскрыўдным, павінен падняць трывогу ў Царкве. Мы — вобразы Бога, мадэль Ісуса Хрыста згубленаму сьвету. Каб добра прадстаўляць нашага Збаўцу, мы мусім трымаць нашае слова. 

Але як мы можам тое рабіць? Можам пачаць з усталяваньня сыстэмы эфэктыўнага збору ўсіх нашых забавязаньняў — проста на кавалку паперы або карыстаючыся складанай электроннай сыстэмай кіраваньня заданьнямі, як напрыклад OmniFocus. Прылада, насамрэч, ня мае значэньня, бо галоўнае — гэта сам працэс. Калі мы вырашылі, што жадаем выконваць Ісусаў загад, каб нашае слова было "Так — Так", то мы павінны сачыць за ўсім тым, на што мы адказваем "Так". Гучыць як здаровы сэнс, праўда? І гэта сапраўды так. Але, на жаль, вельмі мала каму ўдаецца тое рабіць. Добрая навіна заключаецца ў тым, што гэтую праблему вельмі проста вырашыць.

Вылучэце 30 хвілінаў сёньня на тое, каб запісаць кожнае абяцаньне, якое вы зрабілі самі сабе, сваім сябрам, сужэнцу, дзецям, калегам, і інш. Калі сьпіс будзе гатовы, адшукайце забавязаньні, аб якіх вам трэба дамовіцца зноў або якія вам трэба выканаць неадкладна. Напрыклад, магчыма, што вы паабяцалі вашай бабе патэлефанаваць на мінулым тыдні, але дагэтуль не зрабілі гэтага. Вылучэце 5 хвілінаў, каб патэлефанаваць бабулі і выканаць гэтае забавязаньне. Хай вашае слова будзе "Так - Так", нават калі марудзіцеся. Абяцаю, што як толькі вы скончыце гэтае практыкаваньне і вы ўпэўненыя, што ў вашай галаве больш не згубілася аніякае забавязаньне, то вы адчуеце вялікае палягчэньне й супакой.

На маю думку, кніга Дэйвіда Элэна  Getting Things Done — найлепшая крыніца, каб дапамагчы вам сачыць за ўсімі вашымі забавязаньнямі. Тут  можаце спампаваць кароткі сынопсіс кнігі, а таксама больш карысных парадаў, каб вашае "Так" заўсёды азначала "Так".