ВЫСЛОЎІ 20:13-30
ВЫСЛОЎІ 20:13-30 Біблія (пераклад В. Сёмухі) (ББЛ)
Ня любі спаць, каб табе не зьбяднець; расплюшчы вочы твае, і будзеш удосыць есьці хлеб. «Дрэнна, дрэнна», кажа пакупнік; а як адыдзе - хваліцца. Ёсьць золата і шмат жэмчугу, але найкаштоўнейшы посуд - вусны разумныя. Вазьмі вопратку ягоную, бо ён паручыўся за чужога; за незнаёмага вазьмі зь яго заклад. Салодкі чалавеку хлеб, набыты няпраўдаю; але пасьля - рот ягоны пяском напоўніцца. Намеры набываюць пэўнасьць праз нараду, і пасьля нарады вядзі вайну. Хто абгаворвае, той раскрывае таямніцы, і хто шырока разьзяўляе рот, з тым не вадзіся. Хто ліхасловіць бацьку свайго і сваю маці, таго сьветач патухне сярод глыбокае цемры. Спадчына, сьпешна захопленая напачатку, ня будзе дабраславёная пазьней. Не кажы: «я адплачу табе за зло»; даверся Госпаду, і Ён ахавае цябе. Агідныя Госпаду - дваякія гіры, і дваякія шалі - не дабро. Ад Госпада кіруюцца крокі чалавека; а чалавеку як зьведаць дарогу сваю? Сетка чалавеку - неадумна даваць зарок, і пасьля зароку - абдумваць. Мудры цар расьцярушыць бязбожных і паверне на іх кола. Сьветач Гасподні - дух чалавека, які вывярае ўсе глыбіні сэрца. Ласка і праўда ахоўваюць цара, і на ласцы ён трымае свой трон. Слава юнакоў - сіла іхняя, а акраса старых - сівізна. Раны ад удараў - лечаць ад зла, і ўдары, якія пранікаюць усярэдзіну чэрава.
ВЫСЛОЎІ 20:13-30 Біблія (пераклад А.Бокуна) (БББ)
Не любі спаць, каб табе не зьбяднець, адкрый вочы свае, і насыцішся хлебам. «Дрэннае, дрэннае», — кажа пакупнік, а калі адыйдзецца, тады хваліцца. Ёсьць золата і мноства пэрлінаў, але найкаштоўнейшая рэч — вусны разумныя. Забяры адзеньне яго, бо ён паручыўся за чужога, і за чужынца вазьмі заклад ад яго. Салодкі чалавеку хлеб ашуканства, але потым пяском напоўняцца вусны ягоныя. Думкі ўмацоўваюцца парадамі, і з разважлівасьцю вядзі вайну. Хто ходзіць абмоўнікам, той выяўляе таямніцы, дык ня зьвязвайся з тым, хто рот свой разьзяўляе. Хто кляне бацьку свайго і маці сваю, у таго сьветач патухне сярод глыбокай цемры. Спадчына, на пачатку пасьпешліва здабытая, ня будзе пры канцы дабраслаўлёная. Не кажы: «Я адплачу за зло», спадзявайся на ГОСПАДА, і Ён выбавіць цябе. Агіда для ГОСПАДА — неаднолькавыя вагі, і шалі падманлівыя — ня добра. Ад ГОСПАДА крокі чалавека, і як жа чалавеку зразумець шлях свой? Пастка для чалавека — пасьпешліва зрабіць шлюбаваньне, а пасьля абяцаньня разважаць. Мудры валадар раскідае бязбожнікаў і зьверне на іх кола [малатарнае]. Сьветач ГОСПАДАЎ — дух чалавечы, ён дасьледуе ўсе сховы нутра. Міласэрнасьць і праўда ахоўваюць валадара, і міласэрнасьцю ўмацоўваецца пасад ягоны. Слава юнакоў — сіла іхняя, а веліч старых — сівізна. Вытні і раны — лекавальная масьць, [якая пазбаўляе] ад ліхоты, і ўдары [ачышчаюць] глыбіню нутра.