Lituto za Siraki 51
51
Pina ya buitumelo
1Ni ta itumela ku wena,
Mubusi ni Mulena,
ni ku ku lumbeka, wena Mulimu,
mupulusi wa ka,
mi ni itumela kwa libizo la hao.
2U bile musilelezi ni mutusi wa ka,
mi u pilisize mubili wa ka kwa lifu,
kwa lulaba lwa lulimi lo lu buhata
ni kwa milomo ye bulela buhata.
Fapil'a nyangela u bile mutusi wa ka
mi u ni pulusize.
3U ni pulusize ka butuna bwa musa
ni libizo la hao,
kwa meeno a ikweca a ba ba ne ba bata
ku ni tafuna,
kwa mazoho a ba ba ne ba bata bupilo
bwa ka,
ni kwa manyando a mañata a ni tahezi.
4U ni pulusize kwa ku cisa ko kutuna,
ni mwahal'a mulilo
o ne ni si ka tukisa.
5U ni pulusize ni mwa butungi
bwa mwa libita,
ni kwa lulimi lo lu silafezi,
ni kwa linzwi la buhata,
ni kwa lipulelo za buhata
fapil'a mulena.
6Moya wa ka n'o s'o li fakaufi ni lifu,
mi ne ni se ni li mwa libita.
7Ne ba ni beile mwahali mwa maneku
kaufela,
mi ne ku si na ya n'a ka ni tusa.
Na bata ya n'a ka ni tusa,
kono na mu tokwa.
8Cwale na hupula sishemo sa hao,
Muñ'a Bupilo,
ni likezo za hao ku kala kwa linako
za kwaikale,
m'o silelezanga ba ba ku sepile
hahulu
ni m'o ba pulusezanga kwa maata
a lila za bona.
9Cwale na eza tapelo ya ka,
ni li mwa lifasi.
Na kupa ku zwiswa mwa lifu.
10Na kupa ku Mulimu,
ndat'ahe Mulen'a ka, na li,
“U si ke wa ni siya ka lizazi
la manyando,
ka nako ye ni ka palelwa
ku itamulela kwa baikuhumusi.
Ni ka tumisa libizo la hao kuya kuile,
ni ku li lumbeka hahulu ka lipina
za buitumelo.”
11Mi cwale tapelo ya ka ya amuhelwa,
kakuli u ni pulusize kwa lifu
mi u ni silelelize ka nako ya bumaswe.
12Mi kikabakaleo ni ta itumela ku
ku wena ni ku ku lumbeka,
mi ni ka tumisa libizo la Muñ'a Bupilo.
Manzwi a ku kupa butali
13Ha ne ni sa li mwanana,
pili ni si ka kala ku zamaya misipili,
na kupa hahulu butali mwa litapelo
za ka.
14Ha ni li kwand'a Sibaka se si Kenile
ne ni lapelelanga butali,
mi ni ka zwelapili ku bu bata
kuya kuile.
15Kamita pilu ya ka ne i lakaza butali
feela,
mi ku kala ni sa li mwanana
ni bu latelezi hande ni sa latehi.
16Ka ku teeleza feela ni konile
ku bu amuhela,
mi ni fumani hahulu tuto ku bona.
17Kabakala bona ni se ni zwezipili.
Kanya i be ku yena ya ni file butali!
18Kakuli ni tundamezi ku bu sebelisa,
kaniti ni latelezi se sinde,
mi ha ni na ku swabiswa.
19Ni lwanezi butali ka pilu
ya ka kaufela,
mi ni bile ya tiile hahulu
ka ku buluka Mulao.
Ni nanulezi mazoho a ka mwahalimu,
ni ku bu kupa hahulu kuli ni be ni bona.
20Ni bu isize pilu,
mi ni bu fumani ka ku bu batisisa hande.
Cwale kakuli pilu ya ka i kumalezi
ku bona ku zwa kwa makalelo,
kabakaleo ha ni na ku lateha ni kamuta.
21Cwale pilu ya ka ha i latile hahulu
ku bu fumana,
ni se ni fumani siluwo se sinde.
22Mi mupuzo w'a ni file Muñ'a Bupilo
ki lulimi,
lo ni ka mu lumbeka ka lona ka lipina.
23Mu sutelele ku na,
mina mu si ka laelwa,
mi mu be mwa sikolo sa ka.
24Mu bilaelelañi bakeñisa ku tokwa
lika ze,
mioya ya mina ha i nz'e li nyolezwi?
25Na kwalula mulomo wa ka, mi na li,
“Mu bu leke ku si na mali.
26Mu inamise milala ya mina mwatas'a
joko ya bona,
mi mioya ya mina i fumane tuto,
kakuli bu fakaufi ku ba ba bu bata.
Mi ku ba ba sepahala, kwa fumaneha.
27Mu iponele mo bu konezi
bunyinyani bwa likezo za ka
ku ni fumanela kozo ye tuna cwalo.
28Mu leke tuto ka palo ye tuna
ya silivela,
mi ka yona mu ta fumana gauda ye ñata.
29Mioya ya mina i tabe ka sishemo
sa Mulimu,
mi mu si ke mwa swaba ni hanyinyani
ku mu lumbeka kuya kuile.
30Mu eze musebezi wa mina
pili nako ye tomilwe i si ka fita,
mi yena u ta mi fa mupuzo ka nako
ya hae.”
Bo ki bona butali bwa Jesu mwan'a Sira.
Цяпер абрана:
Lituto za Siraki 51: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.