Lituto za Siraki 40
40
Bumai bwa mutu
1Manyando a matuna a ezelizwe
batu kaufela,
mi coko ya bukiti i fa milala
ya bana ba Adama,
ku tuha mutu f'a pepelwa,
mane ku fitela ba kutela ku mushemi
wa bona kaufela.
2Se si ba sabisanga hahulu
ni ku ba tulisa lipilu
ki bumaswe bwa lizazi la lifu.
3Ku kala ku mutu ya li mwa lubona
lo lunde,
ku t'o li ku mubotana ya inzi
mwa maluli ni mwa mulola,
4ku zwa ku ya apezi ze nde hahulu
ni kuwani ya bulena
mane ku ya apezi masaka,
kaufela ba tezi lunya ni muna,
lipilaelo ni ku sa iketa,
hamohocwalo ni sabo ya lifu,
litakano ni likomano.
5Mane nihaili busihu mutu h'a lobali
hande
kakuli u filikanyiwa ki lipilaelo
za hae.
6U lobala hanyinyani feela,
u katazeha inge mulibeleli,
mi u katazwa ki lipono ze sabisa hahulu
sina mutu ya balehile kwa ndwa.
7Ka nako ya ku puluha
u zuha a nz'a komokile kuli
sabo ya hae n'e li ya kwa buloko feela.
8Ze pila kamukana li na ni manyando a,
mi lifolofolo hamoho ni batu
li na ni ona,
mi ki ona a kataza baezalibi hasupile.
9Ku na ni lifu, mali ni likomano,
mikwale, likozi ni tala ye tuna,
manyando hamoho ni matuku.
10Ze kaufela ne li ezelizwe
ba ba maswe
mi ki bona ba ba tahisize muunda.
11Ze zwa mwa mubu kaufela li kutela
mwa mubu,
mi ze zwa mwa mezi li kutela
mwa liwate.
Lika za niti ze fapahana-fapahana
12Likweta ni ku sa sepahala kaufela
li ta feliswa,
kono busepahali bu ta ba teñi kamita.
13Bufumu bwa ba ba maswe
bu ta oma sina mezi a kala.
Bu ta fela inge mushika wa pula
ha i nela.
14Mutu ya otolozi mazoho a hae
kamita u tabile,
kono ba ba maswe ba ta sinyeha.
15Lusika lwa muezalibi
ha lu na ku ata,
kakuli mibisi ye maswe i fumananga
licwe le litata kwatasi.
16Mataka a kwa minanga ya masa
ni ya linuka
a ta kumulwa pili bucwañi kaufela
bu si ka zwiswa kale.
17Bufani bu tisa limpo ze ñata sina
simu ya limbuyoti
mi bunde ha bu feli, kuya kuile.
Ku likanyeza
18Ku ipelekela u sa bilaeli
ni ku isebeleza ka tata,
ki ko kunde,
kono ki ko kunde hahulu ku fumana
bufumu.
19Ku ba ni bana ni ku yaha munzi
ku tumisa mutu,
kono se situna ki ku fumana butali.
Likomu ni masimu a veine
li ku zibahaza hande,
kono se sinde hahulu
ki ku ba ni musali ya lukile.
20Waine ni lipina li tabisa pilu,
kono ki ko kunde hahulu ku lata
butali.
21Pala ni halepa li ekeza bunde
kwa pina,
kono se si li fita ki linzwi le linde.
22Liito li lata ku buheha ni bunde,
kono ki hande hahulu ku bona butala
bwa mabele a hula mwa simu.
23Mulikani ni mwanahabo mutu
kamita ba latana,
kono ba fitwa ki musali ni munn'a hae.
24Banabahabo mutu ni batusi
ki ba bande ka nako ya ziezi,
kono bufani bu tusa hahulu ku fita
bao.
25U ta tiiswa ki gauda ni silivela,
kono kelezo ye nde ya li fita.
26Mali ni maata li tiisa pilu,
kono li fitiwa ki sabo ya Mulimu.
Mutu h'a saba Muñ'a Bupilo
h'a tokwi se siñwi
mi ka yona h'a tokwi ku fumana
batusi.
27Sabo ya Mulimu i swana ni simu
ya limbuyoti,
mi i apesa mutu hande hahulu
ku fita kanya.
Ka za mukumbeleti
28Mwan'a ka, u si ke wa pila
ka ku kupa ku ba bañwi.
Ki ko kunde ku shwa ku fita
ku kupa.
29Bupilo bwa mutu ya talimezi ku fiwa
ki yo muñwi
ha si bupilo ni hanyinyani.
U silafaza mumizo wa hae ka lico
za ba bañwi,
mi mutu ya hulisizwe hande
h'a na ku eza cwalo ni kamuta.
30Ku kupa ku bunolo ku mutu
ya si na maswabi,
kono ku ta be ku mu tumbulezi mulilo
mwa mba.
Цяпер абрана:
Lituto za Siraki 40: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.