Mateu 18
18
Yo muhulu ki mañi?
(Mar 9.33-37; Luk 9.46-48)
1 #
Luk 22.24
Honafo, balutiwa ba taha ku Jesu, ba mu buza, ba li, “Kanti yo muhulu ku fita ba bañwi kaufela mwa Mubuso wa Lihalimu ki mañi?”
2Jesu a biza mwanana, a mu yemisa fapil'a bona. 3#Mar 10.15; Luk 18.17 A li, “Luli na mi bulelela kuli konji ha mu ka fetuha, mwa ba sina banana, ha mu na ku kena mwa Mubuso wa Lihalimu. 4Yo muhulu ku fita ba bañwi mwa Mubuso wa Lihalimu ki ya ikokobeza mi a swana sina mwanana yo. 5Mi mutu ya amuhela mwanana ya swana sina yo, ka libizo la ka, u amuhela na kasibili.
Miliko ye isa kwa sibi
(Mar 9.42-48; Luk 17.1-2)
6“Haili ya ka sitatalisa yo muñwi wa ba banyinyani ba, ba ba lumela ku na, i ne i ka ba hande ha n'a ka tamelelwa licwe le lituna mwa mulala, mi a nepelwe mwa buliba bwa liwate. 7Lifasi li na ni bumai kakuli ku na ni lika ku lona ze sitatalisa batu! Lika ze cwalo li ta ba teñi kamita, kono u na ni bumai mutu yo li taha ka yena!
8 #
Mat 5.30
“Haiba lizoho la hao kamba lihutu la hao li ku isa mwa sibi, u li pume, mi u li nepele kwahule! Kakuli i ne i ka ba hande ha n'o ka kena mwa bupilo ni lizoho li li liñwi kamba lihutu li li liñwi ku fita ku ba ni mazoho kamba mahutu a mabeli, mi u y'o nepelwa mwa lyangalilo. 9#Mat 5.29 Mi haiba ki liito la hao le li ku isa mwa sibi, u li longole, mi u li nepele kwahule! Kakuli i ne i ka ba hande ha n'o ka kena mwa bupilo ni liito li li liñwi feela, ku fita ku ba ni meeto a mabeli, mi u y'o nepelwa mwa lyangalilo.
Nguli ya ngu ye latehile
(Luk 15.3-7)
10 #
Tob 12.15
“Mu tokomele, mu si ke mwa shwaula yo muñwi wa ba banyinyani ba, kakuli na mi bulelela, ni li, ‘Mangeloi a bona, mwa lihalimu, a inzi kamita ni Ndate ya mwa lihalimu. 11#Luk 19.10 Kakuli na, Mwan'a Mutu, ni tezi ku t'o pilisa ba ba latehile.’
12“Mina mu hupula cwañi? Mutu ya na ni lingu ze mwanda u ka eza cwañi haiba ye ñwi ku zona ya lateha? U ta siya ze mwanda ha ku zwiswa i liñwi li nze li fula kwatas'a lilundu ku y'o bata ngu ye latehile yeo. 13Mi na mi bulelela ni li, ha s'a i fumani u ta i tabela hahulu ku fita ze mwanda ha ku zwiswa i liñwi zeo ze ne si ka lateha. 14Kamukwaocwalo, Ndat'a mina ya kwa lihalimu h'a lati kuli yo muñwi wa ba banyinyani ba a latehe.
Mwanahenu h'a ku foseza
15 #
Luk 17.3
“Haiba mwanahenu a ku foseza, u ye ku yena, u y'o mu bonisa foso ya hae, kono u eze cwalo kwa mukunda, mu li ba babeli feela. Haiba a ku utwa, i ka ba u mu pilisize. 16#Mul 19.15 Kono haiba a sa ku utwi, u nge mutu kapa batu ba babeli, kuli taba i atulwe ki lipaki ze peli kamba ze talu, sina mo ku ñolezwi. 17Kono haiba a sa ba utwi ni bona, u y'o bulelela ba Keleke taba kaufela. Mi haiba a sa utwi ba Keleke, u mu nge sina muzwahule kamba mutelisi.
Ku hanisa ni ku lumelela
18 #
Mat 16.19; Joa 20.23 “Luli na mi bulelela, ni li, ‘Ze mu ka hana fafasi, li ta haniwa ni kwa lihalimu, mi ze mu ta lumelela fafasi, li ta lumelelwa ni kwa lihalimu.’
19“Hape ni ekeza ku mi bulelela, ni li, ‘Haiba ba babeli ku mina ba utwana fafasi ku lapelela nto ye ñwi, Ndate ya kwa lihalimu u ka ba fa yona. 20Kakuli batu ba babeli kamba ba balalu ha ba kopana ka libizo la ka, ni na, ni teñi mwahal'a bona.’ ”
Nguli ya mutanga ya sa swaleli
21 #
Luk 17.3-4
Cwale, Pitrosi a taha ku Jesu, mi a mu buza, a li, “Mulena, kana ni ka swalela hakai mwanahesu haiba a nz'a ni fosezanga? Kana ku swanela ku ba hasupile?”
22Jesu a mu alaba, a li, “Batili, isiñi hasupile, kono hamashumi a supile ha i taimiswa hasupile. 23Ka yona taba ye, Mubuso wa Lihalimu u swana ni mulena ya n'a lelile ku tatuba libuka za mali za babeleki ba hae. 24N'a sa z'o kala ku li tatuba, ha ku tiswa ku yena mutu ya n'a mu kolotezi mali a mañata-ñata. 25Mutu yo n'a si na mali a ku lifa sikoloti seo, cwale mulen'a hae a laela kuli a lekiswe, sina mutanga, hamohocwalo ni musal'a hae ni bana ba hae ni liluwo la hae kaufela, kuli sikoloti si lifwe. 26Mubeleki yo a wa ka mañwele fapil'a mulen'a hae, a li, ‘U ni eze ka mukekecima, mi ni ta lifa!’ 27Mulena a mu shwela makeke, a mu swalela sikoloti sa hae, mi a mu lukulula.
28“Mubeleki yo a zwa, mi a katana ni mubeleki yo muñwi ya n'a mu kolotezi mali a manyinyani feela. A mu swala, a mu lindaula a nz'a li, ‘Lifa sikoloti s'o ni kolotezi!’ 29Mubeleki yo a wela kwa mahutu a hae, mi a mu kupa, a li, ‘U ni eze ka mukekecima, mi ni ta lifa!’ 30Kono yo a hana, mane a mu kenya mwa tolongo ku fitela nako y'a ka lifa sikoloti sa hae. 31Babeleki ba bañwi, ha ba bona s'a n'a ezize, ba swaba hahulu, mi ba y'o bulelela mulen'a bona ze ne ezahalile kaufela. 32Cwale mulena a biza mubeleki yo, mi a li ku yena, ‘Wena mutu ya maswe! Ni ku swalezi sikoloti s'o n'o kolotile ku na kaufela, kakuli n'o ni kupile cwalo. 33N'o swanezi ku ba ni mukekecima ku mwanahenu sina mo ne ni bezi ni makeke ku wena.’ 34Mulen'a hae a nyema hahulu, mi a mu lumela kwa tolongo kuli a y'o bakiswa, ku fitela h'a ka lifelela sikoloti sa hae kaufela.”
35Mi Jesu a ekeza, a li, “Ndate ya kwa lihalimu u ta mi eza cwalo haiba mu sa swaleli banabahabo mina, yo muñwi ni yo muñwi ka pilu ya hae kaufela.”
Цяпер абрана:
Mateu 18: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.