Buka ya Bubeli ya Makabaeusi 6
6
Ku kenywa mikwa ya Sihedeni
1Kasamulaho a nakonyana, mulena a luma munna-muhulu yo muñwi, ya zwa mwa Atene, ku t'o hapeleza Majuda kuli ba tuhele mikwa ya sizo sa bona, mi ba si ke ba pila ka milao ya Mulimu. 2Ba silafaze Tempele mwa Jerusalema, ni ku i fa Zeusi wa Olimpia. Hape ni ye fa Lilundu la Gerizimi i be ya Zeusi, musilelezi wa bazamai, sina mo ne ba kupezi bona bañi ba naha.
3Ku hapelezwa kwa bumaswe bo ne ku nyandisa, mi mane bupilo bwa ba tata hahulu. 4Tempele ya tala ya mikwa ye maswe ye ne tiswa ki bahedeni ba ba ne ba ezeza mwateñi mikwa ya buhule, mi ne ba lobala ni basali mwa sibaka se si kenile. Hape ne ba tisa mwateñi linto ze ne li sa swaneli ku eziwa litabelo. 5Fa katala ka litabelo ne ku tezi lika ze taluswa ka Mulao kuli ha li si ka kena. 6Batu kamukana ne ba haniswa ku buluka Lizazi la Pumulo kamba ku latelela mikiti ya sihabo bona, kamba ku ipiza Majuda. 7Ka nako ya mukiti wa ku pepwa kwa mulena, o n'o eziwanga ka kweli ni kweli, batu ne ba hapelelizwe ka tata ku ca mala a sitabelo. Kwa mukiti wa Denisi batu ne ba hapelezwanga ku apala likuwani za matali a matala ni ku zamaya mwa munyololo wa mukiti wa Denisi. 8Kwa tomwa mulao ka muhupulo wa batu ba Pitolemaisi, ili wa kwa mileneñi ya Magerike ye ne li fakaufi, kuli Majuda ba ba mwateñi ba hapelezwe kamukwaoswana ku ca kwa lico za litabelo. 9Hape ba laelwa ku bulaya ba ba hana ku latelela mikwa ya Sigerike. Cwale kwa bonahala hande kuli manyando n'a s'a li fakaufi hahulu.
10 #
1 Mak 1.60-61
Lu nge taba ya basali ba babeli ba ba ne ba filwe mulatu bakeñisa ku isa bana ba bona kwa mupato. Basali bao ba zamaiswa ba nze ba potolohiswa munzi, ba tamelezi bana ba bona fa lifuba mi cwale ba ba nepela fafasi ka ku ba tulisa limota la lukwakwa lwa muleneñi. 11#1 Mak 2.32-38 Batu ba bañwi ba ba ne ba kopani mwa lihaha ku buluka Lizazi la Pumulo ka ku pata ba bihiwa ku Filipi, mi kamukan'a bona ba ciswa, kakuli ne ba sa lati ku ipulusa ili bona ka ku loba mulao wa la Pumulo.
Taluso ya Mulimu ka za manyando
12Cwale batu kaufela ba ba ta bala buka ye ba si ke ba kenwa ki sabo bakeñisa bumai bwa likozi ze tuna cwalo, kono ba hupule feela kuli likozi ze ha si za ku timeza lusika lwa luna, kono ki za kuli lu be ni mikwa ye minde. 13Kaniti baezalibi ha ba sa tuhelelwi ku eza bumaswe ka nako ye telele, kono ba fiwa mulatu kapili-pili, fohe, ki yona poniso ye nde ya lilato le lituna hahulu luli. 14Ha ne li ka macaba a mañwi ona, Mulimu u nga nako ye telele a sa a fi mulatu ku fitela a fose hahulu. Kono ku luna u hupuzi ku lu eza ka mukwa u sili. 15U lu fa mulatu pili libi za luna li si ka ata hahulu. 16Mi yena ni kamuta h'a zwisi musa wa hae ku luna. U kona ku lu luta kuli lu be ba ba lukile ka ku lu tiseza manyando, kono hape h'a hani batu ba hae. 17Taba ye, ye lu bulezi, i tuse ku ba kupuzo, mi cwale lu lukela ku zwelapili mwa taba ya luna kapili.
Pulao ya Eliazare
18 #
Malivi 11.7-8; Maheb 11.35 Munna yo muñwi ya bizwa Eliazare, ili yo muñwi wa baluti ba bahulu ba Mulao, ya n'a s'a supezi mi a bonahala ku luka, n'a kile a hapelezwa ku atama hahulu kuli a mize situnula sa nama ya kulube. 19Kono yena ka ku iketela ku shwa a kutekehile, ku fita ku pila a nz'a tompolozwi, a ikisa ili yena kwa libulaelo. 20Ka ku kwa nama yeo, a ba sisupo sa mutu kaufela ya na ni bundume bwa ku hana se si sa lukeli ka Mulao kuli si ciwe, nihaili ka ku shwa. 21Bazamaisi ba malyalya ao, a mukiti o maswe cwalo, kabakala ku pila hande ni yena nako ye telele, ba mu isa kwatuko mi ba y'o mu eleza kuli a lumele ku tisezwa nama ya n'a lumelelezwi ku ciwa, kuli a t'o ca a nz'a ikezisa inge ya ca kwa nama ya sitabelo sina mw'a n'a laelezi mulena. 22Kezo ye ne i ka mu konisa ku punyuha kwa lifu leo, mi n'a ta ezwa hande hahulu ka musa kabakala silikani sa bona sa kale.
23Kono Eliazare a ba ni muhupulo o munde hahulu. Muhupulo wo n'o tisizwe ki lilimo za hae, buhulu bwa hae, ni limbi za hae. N'o zwile kwa bunde bw'a hulile ni bona, m'o lumelelana ni milao ya Mulimu ye Kenile. A bulezi patalaza kuli ba mu bulaye kapili hona foo. 24A bulela, a li, “Bupumi bo bu cwalo ha bu lukeli buhulu bwa ka. Batu ba banca ba bañata ne ba ta hupula kuli mwendi Eliazare, ha s'a fitile fa lilimo ze mashumi a supile ka a mabeli, n'a lumezi ku pila bupilo bwa bazwahule. 25Kabakala bupumi bwa ka bakeñisa ku lata ku pila nako ye telelenyana, ne ba ta lateha kabakala ka. Ha ne ni ka eza cwalo ne ni ka be ni isilafalize feela, ni ku itiseza maswabi mwa bucembele bwa ka. 26Kakuli niha ni ka hana ku bulawa ki batu ka nako ye, i ka ba i nze ni pila kamba ni shwile, ha ni na ku picuka maata a Mulimu. 27Cwale haiba ni shwa ni lindume, ni ta iponahaza kuli ni ezize se si swanela bucembele bwa ka. 28Ni ta siyela ba banca mutala o munde wa ku shwa lifu le linde ka ku lata ni ka ku luka, ili ku kuteka milao ye kenile.”
A sa feza feela ku bulela manzwi a, a ya kwa libulaelo. 29Mi cwale bazamaisi ba hae, ba ba ne ba mu kutekile nakonyana pili a si ka bulela cwalo, ba mu fetuhela kakuli manzwi a n'a bulezi, ka mihupulo ya bona, ne ba nga kuli ne li a bupulumuki. 30Kapili-pili honafo a si ka shwa kale, a huweleza, a li, “Mulena, ya ziba hande linto kaufela, wa bona hande kuli niha ne ni ta punyuha kwa matuku kaufela a mubili, a ni utwa ka mabumu a, mwa moya wa ka ni tabile ka ku nyanda cwalo kakuli na mu lata, kabakala tompo y'a ni sinulezi.”
31Wo ki ona mukwa w'a n'a shwile ka ona. U siile lifu la hae li li mutala wa ku luka ni wa kupuzo, isiñi ku ba banca feela, kono ni kwa buñata bo butuna bwa sicaba.
Цяпер абрана:
Buka ya Bubeli ya Makabaeusi 6: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.