Buka ya Pili ya Makabaeusi 4
4
Ndwa ya kwa Emausi
1Gorgiasi a nga mpi ya masole ba likiti ze ketalizoho, ni ba lipizi ba sikiti, mi mpi ya funduka busihu. 2N'a lelile ku lwanisa mpi ya Majuda ni ku t'o ba tuba ba si ka libelela. A etelelwa ki banna ba ba ne ba zwa mwa lukwakwa lwa Munzi wa Davida. 3Judeasi a lemuha kapili mi ni yena a ba katanyeza hamoho ni mpi ya hae, ku y'o lwanisa makuta a mulena kwa Emausi. 4Ka nako yeo makuta a Gorgiasi n'a zwile mwa mafulo. 5Cwalehe, Gorgiasi h'a y'o fita kwa mafulo a Judeasi, a fumana ku si na batu, mi a kala ku bata Majuda mwa malundu. A komoka mi a li, “Ba lu saba.” 6Lizazi ha li pazula, Judeasi n'a s'a li mwa libala ni batabani ba hae ba likiti ze talu, niha ne ba si na liapalo za ndwa ni mikwale ye ba likana ka mo ne ba tokwela. 7Ba bona mafulo a bahedeni a tiile a n'a silelelizwe, hamoho ni masole ba lipizi ba ba ne ba a potolohile, ili batu ba ba ne ba lutilwe hande za ndwa.
8Judeasi a li kwa masole ba hae, “Mu si ke mwa saba buñata bwa bona, kamba ku saba ha ba mi lwanisa. 9Mu hupule mo ne ba piliselizwe bo kukw'a luna kwa Liwate le Lifubelu ha ba ne ba lelekiswa ki mpi ya Faro. 10Cwalehe, ni luna lu kupe Mulimu kuli a be ni musa ku luna mi a hupule bulikani bwa hae ni bo kukw'a luna, ni kuli a yundise mpi ye, ye lu talimani ni yona kacenu. 11Cwale macaba kamukana a ta ziba luli kuli ku na ni yo muñwi ya pilisa ni ku lamulela Isilaele.”
12Bazwahule bao, ba bona mpi ya Maisilaele i sutelela ku t'o ba lwanisa. 13Bazwahule ba zwa mwa mafulo ku t'o lwana. Masole ba Judeasi ba liza tolombita. 14Ba lwana ni bona mi bahedeni ba tulwa, ba sabela mwa libala. 15Ba ba fokola ba bulawa ka mikwale. Ba zwelapili ku ba lelekisa mane ku y'o fita kwa Gezeri ni mabala a Edomo, Azoto, ni Jamunia, mane lila za shwelwa ki masole ba likiti ze talu.
16Ha s'a tuhela ku ba lelekisa, Judeasi a kuta ni masole ba hae. 17A li kwa batu, “Mu si ke mwa bilaela ka za tutu ye hapilwe kakuli lu sa na ni ndwa ye ñwi hape. 18Gorgiasi ni makuta a hae ba sa li mwa malundu fakaufi ni luna. Pili mu talimane ni lila za luna, mi mu li lwanise. Ku zwa fo kihona mu ta hapa tutu mo mu latela.” 19Judeasi a si ka feza kale ku bulela, sikwata sa lila se si batisisa sa bonahala fa njetumuko ya lilundu. 20Sikwata seo sa lemuha kuli makuta a sona a tuzwi ni kuli mafulo n'a cisizwe, kabakala ku zibiswa ki musi o n'o bonahala hahulu. 21Ha ba bona cwalo ba kenelwa ki sabo. Ba bona ni makuta a Judeasi a yemi mwa libala a nz'a itukiselize ku lwana. 22Cwale kaufel'a bona ba sabela mwa naha ya Mafilisita. 23Judeasi a kuta ku t'o hapa tutu ye ne li mwa mafulo kaufela, mi ba nga gauda ni silivela ye ñata hahulu, hamoho ni masila a mibala ye minde a matalanyana, ni a mapuzwa, ni linto ze ñwi ze ñata za butokwa. 24Ha ba kuta, Majuda ba zamaya ba lumbeka Mulimu ka lipina, ba li, “Mulimu u na ni sishemo, mi musa wa hae ki wa kuya kuile.” 25Lizazi leo la ba la ku lamulelwa ko kutuna mwa Isilaele.
Ndwa ya pili ya Lisiasi
(2 Mak 11.1-12)
26Ba ba ne ba bandukile kwa bazwahule bao, ba t'o taluseza Lisiasi ze ne li ezahalile kaufela. 27Litaba zeo za mu filikanya ni ku mu zwafisa, kakuli mwa Isilaele lika ha li si ka y'o zamaya sina mw'a n'a hupulezi, ni kuli hape ze ne ezahalile ne li fapahana hahulu ni mw'a n'a laelezwi ki mulena.
28Ka silimo se si tatama, a kopanya mpi ya masole ba ba ketilwe ba likiti ze mashumi a silezi, ni masole ba lipizi ba likiti ze ketalizoho, ka muhupulo wa ku felisa maata a Majuda. 29Ba liba mwa Edomo, mi ba toma mafulo kwa Beti-Zuri, ko ne ba til'o katanyezwa ki Judeasi ni masole ba hae ba likiti ze lishumi. 30#1 Sam 17.41-54; 14.1-23 Ha s'a bona fo ne i kuma mpi ya bona, a lapela tapelo ye, a li, “U lumbekwe, wena mupilisi wa Isilaele, ya n'a tubakile maata a muhali wa Mafilisita ka lizoho la mutang'a hao Davida, mi wa fa mafulo a bona mwa mazoho a Jonatani mwan'a Saule ni mulwali wa lilwaniso za hae. 31U pyatake ni yona mpi ye kamukwaoswana, ili ka mazoho a sicaba sa hao sa Isilaele. U ba swabise ka makuta a bona a mañata, ni masole ba bona ba lipizi. 32U felise sepo ya mapyeha kuli ba palelwe ku sepa maata a bona, mi ba njanjiswe ki ku tulwa kwa bona. 33U ba shandaule ka mikwale ya ba ba ku lata, mi ba ba ziba libizo la hao kaufela ba ku lumbeke.”
34Limpi zeo ze peli za lwana, mi mwa ndwa yeo kwa shwa masole ba makuta a Lisiasi ba likiti ze ketalizoho. 35Lisiasi, h'a bona ku tulwa kwa mpi ya hae ni bundume bwa masole ba Judeasi ni ku itukiseza kwa bona ku lwanela ku shwa kamba ku pila, a kutela kwa Antioke, kw'a n'a il'o bata masole ba ku lifa mali kuli ba t'o lwanisa naha ya Judea ka maata a matuna hahulu ku fita pili.
Ku keniswa ni ku kakulwa kwa Tempele
(2 Mak 10.1-8)
36Cwale Judeasi ni banabahabo ba li, “Cwale ha lu bona kuli lila za luna li se li tuzwi, a lu yeñi lu y'o kenisa Tempele ni ku i kakula.” 37Kiha ba kopanya mpi kaufela mi ba ya kwa Lilundu la Sione. 38Ba y'o fumana kuli Tempele ne s'e li matota feela, katala ka silafezi, likwalo li cisizwe, mi macacani n'a s'a melile mwa malapa a Tempele kaufela sina mo ne ku inezi mwa mishitu kamba mwa malundu, mi ni ona mandu a libyana a lutuluhile. 39Ba pazaula liapalo za bona, mi ba lila hahulu mane ba isasa liluli kwa litoho. 40Ba patama fafasi, mi litolombita ha li lila, ili ku fa temuso, ba huweleza ku kupa tuso ku Mulimu.
41Cwale Judeasi a laela masole ba hae ku lwanisa bahedeni ba ba ne ba inzi mwa Lukwakwa ku fitela a kenisa sibaka se si kenile. 42Ku zwa fo a keta baprisita ba ba ne ba tokomela hahulu Mulao. 43Musebezi wa bona n'o li wa ku kenisa sibaka se si kenile ni ku zwisa macwe a bumaswe bo bu sabisa ku a isa kwa sibaka se si si ka kena.
44Ba ambolisana ka se ba swanela ku eza bakeñisa katala ka litabelo za ku cisa ka ka ne ka silafalizwe. 45Ba hupula ku ka lutulula kuli ba si ke ba nyazwa kabakala kona, kakuli ne ka silafalizwe ki bahedeni. Kiha ba ka lutulula. 46Ba y'o beya macwe a kona mwa sibaka se si a swanela, ili fa Lilundu la Tempele, ku libelela nako y'a ta fita mupolofita kuli a t'o bulela se siñwi ka ona. 47#Mut 20.25; Mul 27.5-6 Cwale ba nga macwe a si ka betiwa ka m'o taluseza Mulao, mi ba yaha ka ona katala ka kanca mwa sibaka sa ka kale. 48Ba yaha sinca Sibaka se si Kenile ni Sibaka se si Kenile Hahulu, mi ba kenisa malapa. 49Ba eza lipiza ze nca ze kenile. Ba tisa sipahekelo sa lilampi, katala ka insense ni tafule mwa Tempele. 50Ba ciseza insense fa katala, ba tumbula lilampi fa mapahekelo a zona, mi za benya mwahal'a Tempele. 51Ba beya linkwa fa tafule, ba paheka masila a ku kwalisa, mi ba feza misebezi kaufela ye ne ba sebeza.
52 #
1 Mak 1.54
Ka la bumashumi a mabeli ni a ketalizoho la kweli ya busupa ni ze peli, ili yona Kisilevu, mwa silimo sa mwanda ka mashumi a mane ni ze supile ka si li siñwi, ba pakela malungasiku. 53Ba eza sitabelo se si swanela fa katala ka kanca ka litabelo za ku cisa ka ne ba ezize. 54Katala ka kakulwa ka lipina za lihalepa ni ze lizwa kamukana, ili ka nako ye swana ya silimo, ni ka lona lizazi le ka kile ka kala ku silafazwa ki bahedeni. 55Sicaba kamukana sa patama fafasi ka likute le lituna, ba nze ba lumbeka yena Mulimu ya ba konisize ku tula.
56Ba eza sebelezo ya ku kakula katala, ba eza litabelo za ku cisa, za ku tiisa bulikani, ni za buitumelo. 57Ba kabisa limota la fapil'a Tempele ka likabisa za likuwani za bulena ni milamu ya gauda. Ba lukisa sinca minyako ni mandu a libyana mi ba a beya likwalo. 58Tabo ya batu ne i sa feli mi kashwau ka bahedeni ka fela. 59Judeasi ni banabahabo, hamoho ni sicaba sa Isilaele kamukana, ba toma mulao wa kuli mazazi a mukiti wa sebelezo ya ku kakula katala a swanezi ku bulukwa ka silimo ni silimo ka nako ye swana, ili mazazi a supile ka li li liñwi, ku kala ka lizazi la bumashumi a mabeli ni a ketalizoho la kweli ya Kisilevu, ba nze ba tabile ba nyakalalile.
60Cwale ba zwelapili ku yaha mamota a matelele, ni litawala ze tiile hahulu ku potolosa Lilundu la Sione, ili ku paleliswa bahedeni ku t'o lwanisanga ni ku lutulula katala sina mo ne ba ezezanga pili. 61Judeasi a beya kwateñi masole ku sileleza lilundu. Hape a beya Beti-Zuri mwa lukwakwa ili ku sileleza batu kwa Maedomo.
Цяпер абрана:
Buka ya Pili ya Makabaeusi 4: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.