MACIU 7
7
Sa vakatakila ko Jisu ni sa ca me da daulelewa vei ira na tamata, 15; e vinaka me da vakatavuvuli vakavuku, 6; e vinaka me da daumasu vua na Kalou; kai valavala dodonu vei ira na tamata, 712. Na matamata-ni-koro qiqo, kei na sala rabailailai, 13,14. Nai vakavuvuli lasu, 1520. Me da kakua ni rogoca walega na vosa ni Turaga, me da cakava talega, de sa da vaka na tamata sa tara na vale e na nuku, 2127. Sa kurabui na lewe vuqa e na nonai vakavuvuli, 28,29.
1Dou kakua ni daulelewa, de dou lewai. 2Ia na lewa dou na kitaka, dou na lewai kina: kei nai vakarau dou sa vakarautaka, ena vakarautaki tale vei kemudou. 3Ia ka vakaevei, ni ko sa raica na malamala e na mata ni wekamu, ka ko sa sega ni nanuma na kau e matamu? 4Se ko na kaya vakaevei vua na wekamu, Meu leuta mada na malamala mai na matamu; ka raica, sa tu e matamu na kau? 5Na dauveivakaisini, mo cavuta mada eliu na kau mai na matamu; ia ko na qai raica vinaka mo leuta na malamala mai na mata ni wekamu.
6Dou kakua ni solia na ka tabu vei ira na koli, se biuta na nomudou mata-ni-civa e matadra na vuaka, de ra butuka sobu e yavadra, ka vuki mai ka basuraki kemudou.
7Dou kerekere, ka na soli vei kemudou: dou vakasaqara, ka dou na kunea; dou tukituki, ka na dolavi vei kemudou: 8ni sa rawata ko koya yadua sa kerekere; ka sa kunea ko koya sa vakasaqara ka na dolavi vua sa tukituki. 9Se ko cei mada vei kemudou, kevaka e kere madrai na luvena, ena solia vua e dua na vatu? 10se kere ika, ena solia vua e dua na gata? 11Ia kevaka dou sa kila koi kemudou na tamata ca, mo dou solia na ka vinaka vei ira na luvemudou; sa na gu vakalevu cake, me solia na veika vinaka na Tamamudou mai lomalagi vei ira sa kerekere vua.
12O koya, na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira; ni sa vakaoqo na vunau kei ira na parofita.
13Dou curu ki na matamata-ni-koro qiqo: ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina; 14ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.
15Ia dou qarauni kemudou vinaka maivei ira nai vakavuvuli vakailasu, era sa lako mai vei kemudou ka vakaisulu vaka na sipi, a ra sa wolifa daukata e lomadra. 16Dou na kilai ira e na vuadra. Sa veti li na vua-ni-vaini mai na wa-vakavotona, se na lolo mai na soni? 17sa vakakina sa vuataka na vua vinaka na kau vinaka kecega, a sa vuataka na vua ca na kau ca. 18E sega na kau vinaka me vuataka rawa na vua ca, se na kau ca me vuataka rawa na vua vinaka. 19Na kau vakaaduaga sa sega ni vuataka na vua vinaka sa ta laivi, ka biu ki na bukawaqa. 20E dina ga, dou na kilai ira e na vuadra.
21Ena sega ni curu ki na matanitu vakalomalagi ko ira kecega sa kaya vei au, Turaga, Turaga; ko koya ga sa cakava na loma i Tamaqu sa tiko mai lomalagi. 22Era na lewe vuqa ena kaya vei au e na siga ko ya, Kemuni na Turaga, na Turaga, keimami a sega li ni vakavuvuli e na yacamuni? ka vakasevi ira na tevoro e na yacamuni? ka kitaka na cakacaka mana e vuqa e na yacamuni? 23Ia kau na qai tukuna vei ira, Au sa sega sara ni kilai kemudou; dou lako tani vei au, koi kemudou sa daukitaka nai valavala ca.
24Ia oqo, ko koya yadua sa rogoca na noqu vosa oqo, ka cakava, kau na vakatautauvatataka kei na tamata vuku, sa tara na nona vale e na dela ni vatu: 25a sa tau mai na uca, ka coka mai na dobui, ka liwa na cagi, ka tabaka na vale ko ya; a sa sega ni bale: ni sa tauyavutaki e na vatu. 26Ia ko koya yadua sa rogoca na noqu vosa oqo, ka sega ni cakava, ena vakatautauvatataki kei na tamata lialia, sa tara na nona vale e na dela ni nuku: 27a sa tau mai na uca, ka coka mai na dobui, ka liwa na cagi, ka tabaka na vale ko ya; a sa bale kina: ia na ka levu na kena bale.
28A sa yaco, ni sa tinia na vosa oqo ko Jisu, era sa kurabui sara na lewe vuqa e na nonai vakavuvuli. 29Ni sa vakatavulici ira me vaka e dua sa tu ga vua na lewa, ka sega ni vakataki ira na nodra vunivola.
Цяпер абрана:
MACIU 7: FOV
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Vakavakadewa Makawa (Fijian Old Version) © Bible Society of the South Pacific