MALAKAI 3
3
Sa parofisaitaki Joni na dauveipapitaiso nai talatala ni Mesaia, kei na nona cakacaka vakalou na Mesaia ni sa lako mai ko koya, 1-6. Sa tukuna na nodra daucaka cala vakalevu ko ira na Juta, 7-15. Sa kalougata ko ira era rerevaka na Kalou, 16-18.
1Mo dou raica mada, au na tala na noqu i talatala, ka na caramaka ko koya na sala e mataqu; ia na Turaga, o koya dou sa vakasaqara, ena lako vakidacala mai ki na nona vale tabu, io, ena lako mai nai talatala ni veiyalayalati, o koya dou sa rekitaka; sa kaya ko Jiova ni lewe vuqa. 2Ia ko cei me na yalo dei e na siga ni nona lako mai? ia ko cei me na tu rawa ni sa rairai mai ko koya? ni sa vaka na nona bukawaqa na dausava koula ko koya, ka vaka na nodra sovu na dausavai sulu: 3ia ena tiko ko koya me vakawaicalataka ka vakasavasavataka na siliva: ia ena vakasavasavataki ira na Livai, ka savai ira me vaka na koula kei na siliva, me ra vakacabora vei Jiova nai madrali sa dodonu. 4Ena qai ka vinaka vei Jiova na nodra i madrali na Juta kei Jerusalemi, me vaka e na gauna eliu, ka vaka na veiyabaki makawa.
5Ia ka'u na toro voleka vei kemudou me ia na veilewai, ia ka'u na kusarawa ni tukuna na nodra ca na daucakaisausau, kei na dauveibutakoci, kei na daububului vakailasu, kei ira era butakoca nai voli ni tamata cakacaka, kei na yada, kei na luveniyali, kei ira era bureitaka vua na vulagi na ka sa dodonu me nona, ka ra sega ni rerevaki au, sa kaya ko Jiova ni lewe vuqa. 6Koi au ko Jiova, ka'u sa sega ni veivukiyaki; o koya oqo, dou sa sega kina ni rusa oi kemudou na Jekope.
7Ia mai na gauna ni nomudou qase dou sa vuki tani ga mai na ka ka'u sa lesia, ka sa sega ni vakabauta: dou lesu mai vei au, au na qai lesu yani vei kemudou, sa kaya ko Jiova ni lewe vuqa. Ia dou sa kaya, Me keitou lesu vakaevei? 8E dua li na tamata me butakoci koya na Kalou? Ia dou a butakoci au. Ia dou sa kaya, Keitou a butakoci kemuni vakaevei? Dou sa butakoca nai sigana kei nai madrali. 9E na dua na veicudruvi dou sa cudruvi kina: ni dou sa butako vei au, io, koi kemudou na matanitu taucoko oqo.
10Dou kauta kece mai nai sigana ki na lololo, me so kina na kakana e na noqu vale, ka vakatovolei au mada kina, sa kaya ko Jiova ni lewe vuqa, se'u na dolava, se segai, na katuba ni lomalagi, ka sovaraka vei kemudou na ka ni veivakalougatataki, me na sautu dina sara. 11Ia ka'u na vunauca na dauvakacaca e na vukumudou, me kakua ni vakacacana na vua ni nomudou qele; ena sega talega ni sewaruta na vua ni nomudou vaini e na were, sa kaya ko Jiova ni lewe vuqa. 12A ra na vosavakalougatataki kemudou na lewe ni veivanua kecega: ni dou na vanua e daurekitaki, sa kaya ko Jiova ni lewe vuqa.
13Dou a vosa vakaukauwa vei au, sa kaya ko Jiova. Ia dou sa kaya, A vosa cava li keitou sa vosavakacacataki kemuni kina? 14Dou a kaya, Sa sega ni yaga na qarava na Kalou; ia ka cava na betena na noda vakabauta na ka sa lesia ko koya, ka ni da sa lako vakaloloku voli talega e na mata i Jiova ni lewe vuqa? 15Ia eda sa qai kaya era sa kalougata ko ira na viavialevu; ka ni ra tamata yaco talega ko ira na daucaka ca; ka sa bula ga ko ira era vakatovolea vakaca na Kalou.
16Sa ra qai dauveivosaki vakataki ira ko ira era sa rerevaki Jiova: a sa vakarorogo ko Jiova, ka rogoca, a sa volai e dua nai vola ni veivakananumi e matana e na vukudra era rerevaki Jiova, ka vakananuma na yacana. 17A sa kaya ko Jiova ni lewe vuqa era na noqu ga, e na siga ka'u na kumuna kina na noqu i yau talei; ia ka'u na lomani ira, me vaka na tamata sa lomani koya na luvena sa qaravi koya. 18Ia dou na qai kunea sara ni sa dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa sega ni qaravi koya.
Цяпер абрана:
MALAKAI 3: FOV
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Vakavakadewa Makawa (Fijian Old Version) © Bible Society of the South Pacific