Ovaroma 8
8
Okukala modhonkono dhOmbepo yaKalunga
1Iya napano kape na tja ekoyo okupa onkali mbave li muKristus Jesus, 2mena lyokutya oveta yOmbepo yomwenyo muKristus Jesus ya nkutulula moveta youlundhi noyet̯o. 3Kalunga wa undapa soka oveta hiya anyenwa oku tji undapa, mena lyokutya omuntu otjingone. Kalunga wa koya oulundhi momuntu, hiaa tuma Omuna ngoka ngwee ya molupe lwomuntu omulundhi, a ithe po odhonkali, 4opo ouvyuuki hembu mbumau pulwa koveta, u hwithilwe po munt̯e hemba mbahatu ende mountu, iya mbatu enda paMbepo. 5Iya mbava enda mountu, ve lipula ovipuka vyountu, iya mbava enda paMbepo, ve lipula ovipuka vyopaMbepo. 6Iya omalipulo ountu et̯o, omalipulo opaMbepo omwenyo nouwa. 7Iya omalipulo ountu a kondjetha Kalunga, mena lyokutya kaa tee koveta yaKalunga, oo kae tji ulu. 8Mbava tuminwa kehalo lyountu, kaava ulu okuthevelwa Kalunga.
9N̯e kamu tuminwa kehalo lyountu, iya mu tuminwa kOmbepo yaKalunga, andaa Ombepo yaKalunga i li mun̯e. Iya andaa Ombepo yaKristus kai li mun̯e, kamuvaKristus. 10Iya andaa Kristus u li mun̯e, nandaku tiwa omalutu en̯i a t̯a mena lyoulundhi, ombepo yen̯i i na omwenyo mena lyouvyuuki mbutwa pewa kuKristus. 11Andaa Ombepo yaKalunga, ngwaa imuna Jesus kout̯e, i li mun̯e, Kalunga ngwaa imuna Kristus kout̯e ma imuna wo omalutu en̯i omat̯e okupitila mOmbepo ye ndjii li mun̯e.#1 Kor. 3:16
12Vakwetu, iya tu na ongele, atjaa hayokukala monkalo yetu yountu. 13Iya ngamu kala monkalo yountu wen̯i, matji mu etele et̯o. Iya andaa mamu yetha ovilinga vyoulundhi, Ombepo hai mu yethetha vyo, okutya mamu kala nomwenyo. 14Iya ovantu avehe mboka mbava endethwa kOmbepo yaKalunga, ovanwaKalunga. 15Iya Kalunga ke mu pele ombepo youpika, mu kale uke nowoma. Mwa pewa Ombepo youyumukwa, ndjitu ithana amatu tyaa: “Abba! Taa!”#Gal. 4:5-7#Mark. 14:36; Gal. 4:6 16Ombepo yaKalunga yo oyene oyo mai hipulula pamo nodhombepo dhetu okutya nt̯e tudhondele dhaKalunga. 17Iya andaa tudhondele dhaKalunga, tudhompinga wo, odhompinga dhaKalunga nodhompinga pamo naKristus, andaa matu tatethwa pamo naye, opo tu laimithwa wo pamo naye.
Ekevelelo lyelaimo
18Ame me mono okutya omatatetho henga anapano kaa ulu okuyelekwa nelaimo ndimatu ka holololelwa. 19Ovyuutwa avihe mavi kevelele nehalo unene Kalunga hima ka hololola ovana. 20Iya ovyuutwa vya yumanekwa, hakehalo lyavyo, iya Kalunga oye a tokola tji kale nyahoka, atjaa pe na ekevelelo#Gen. 3:17-19 21okutya ovyuutwa vyo ovyene mavi ka kutuluka moupika woluwolela, havi i mekutuluko lyelaimo lyodhondele dhaKalunga. 22Iya tu tji i okutya katee napano ovyuutwa avihe vi kema koviihamo ngovyedhimo amali kweya, alya imuka. 23Havyuutwa vala aviika vi kema, iya nant̯e wo mbatwa pewa otjali tjolutenga tjOmbepo yaKalunga, tu kema amatu kevelele Kalunga e tu ninge ovana, ye e tu hupithe.#2 Kor. 5:2-4 24Iya mekevelelo hendi twa hupithwa. Ekevelelo ndyuu lwete, hakevelelo. Mo kevelele vi hiuu lwete? 25Iya andaa matu kevelele hihatu lwete, matu tji kevelele amatu likambulithile.
26Iya Ombepo nayo wo mai tu popile moungone wetu, mena lyokutya katu tji i hitwa thele okukumba, iya Ombepo oyene oyo mai tu kumbile nomukemo mbuhau tjiiwa okutumbulwa. 27Iya Kalunga nguu thongonona omitima, omalipulo Ombepo u e i, mena lyokutya Ombepo i kumbila ovantu ovadhilikwa monkalo moka Kalunga ndjima hala.
28Tu tji i okutya movipuka avihe Kalunga u undapela ouwa ovantu mboka mbave mu hole, mboka mbaa ithana kehalo lye. 29Kalunga mbaa holowola ae lukulu, we likalekela wo, ve lithe kOmuna, Omuna opo a ile otjiveli tjovakwawo ovengi. 30Iya ovantu mboka mbae likalekela, we ve ithana wo, mbaa ithana, we ve ninga wo ovavyuuki, mbaa ninga ovavyuuki, we ve laimitha wo.
Ohole yaKalunga muKristus Jesus
31Atjaa napano movipuka hembi ngatu tye vi? Andaa Kalunga wa ama kunt̯e, aan̯i ngume tu kondjetha? 32Kalunga ka hupithile Omuna okutya ahama ihamethwa, iya we mu yandja mena lyetu atuhe, ye kee tu pa mpaeli ovipuka avihe otjali? 33Aan̯i nguma kondjetha ovaholowolwa vaKalunga? Kalunga ye omwene oye me ve ningi ovavyuuki. 34Aan̯i ngume ve koyo? Kristus Jesus hengu ngwaa t̯a, ha imunwa kout̯e, napano u li kokulyo kwaKalunga, me tu kumbile. 35Aan̯i ngume tu yapula kohole yaKristus? Oudheu ngaile ne okun̯in̯ikidhwa ne okutatethwa ne ondjala ne oluhepo ne otjivangi ne et̯o? 36Ngahi kwa sonekwa okutyaa:
“Etango alihe ovantu va hala oku tu dhipaa mena lyoye,
tu talwa ngodhondhu amadhi ka dhipawa.”#Eps. 44:22
37Iya movipuka hembi avihe matu ton̯a, hatu ton̯a naa mena lyangoka nguu tu hole. 38Ame ndji tji i tjatjili, hát̯o ne omwenyo ne ovaengeli ne ovatumini ne ovipuka vyanapano ne ovipuka mbimavi ya ne ovanadhonkono 39ne oule wopeulu ne oule wopohi ne otjuutwa tjimo himatji ulu oku tu yapula kohole yaKalunga muKristus Jesus, Muhona wetu.
Цяпер абрана:
Ovaroma 8: DBNT
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Dhimba New Testament © Bible Society in Namibia, 2010.